影片
以上資料只供參考, 請與餐廳確認詳情
如果你都係嗰啲「唔想行街排隊、又想食到啲精緻中菜」嘅人，咁荃灣呢間私房菜就啱哂你，隱身喺Plaza 88商廈16樓，但食物水準完全唔低調！以下係我對幾道主打菜式嘅真心評價：🥇堂灼鮑魚以最簡單嘅方法突出鮑魚本身鮮味，質感煙韌有咬口，唔會過鹹，唔失細緻。食完鮑魚飲埋清湯再灼芽菜，我其實好想添飲，不過廚師話唔建議，因為我之後會勁飽。🍊橙味酒杯帶子甜中帶酸、微微酒香，配上晶瑩剔透嘅帶子，啖啖都係驚喜，擺盤仲要打卡able✨。🦞芝士龍蝦多士龍蝦肉彈牙又入味，仲有浮誇嘅長碟，俾壽星仔壽星女影相一流。🦀手剁肉餅籠仔蒸蟹飯精華係蟹汁滲入飯粒嘅味道，每啖飯都有蟹膏香，搭配手剁豬肉餅更有層次。🐟鴛鴦剁椒蒸龍躉面珠墩剁椒及蒜蓉蒸帶出不同風味，將龍躉滑嫩魚肉推到另一層次！仲食到少見部位「面珠墩」，有驚喜！🐦秘製炸乳鴿外皮香脆唔乾柴，調味啱啱好，皮脆肉嫩，係經典中菜中不可少的一員！🍜特色海鮮麵 / 金湯燴千絲兩款主食各有特色，金湯香濃帶點蟹黃味，海鮮麵滿滿鮮味，收尾食到碗底都唔捨得停。🍠時令拔絲最後甜品畫龍點睛！拔絲糖衣好脆，唔會過甜，熱辣辣食落真係滿足
繼續閱讀
之前有跑友組團去3A廚房食生日飯，睇片俾佢既長腳蟹三食入面既” 蟹粉芝士爆漿伊麵”吸引左🤩所以知道係貴都報名參加😂當晚菜單：1. 堂灼澳洲黑邊鮑魚2. 三蔥炒龍蝦3. 避風塘琵琶蝦4. 椒鹽汁瀨尿蝦5. 長腳蟹三食 (牛油芥辣蟹身/蟹粉芝士爆漿伊麵 /椒鹽蟹腳）6. 蒸時令星斑7. 時令蔬菜8. 時令燉湯9. 秘製炸乳鴿10. 特色海鮮麵11. 楊枝甘露波波12. 時令拔絲當晚我地book左6點半，我地大約8點齊人開始上菜，第一道菜係「堂灼澳洲黑邊鮑魚」。鮑魚係預先切片，再用好大隻既盤，擺喺鮑魚殼旁邊好靚咁上檯，旁邊仲有青邊鮑同象拔蚌(好似話係送既🤔)。等我地所有人影晒相之後，傳菜員就將整碟鮑魚攞去後面用湯灼熟再次上檯。鮑魚味道鮮甜，口感煙韌，係全晚其中最好食既一道菜👍🏻第二道菜係「三蔥炒龍蝦」，龍蝦預先切件，以調味汁料同紫洋蔥、乾蔥、青蔥一齊炒，味道唔錯，龍蝦肉亦爽口彈牙，但略嫌汁料味道有啲「功高蓋主」。第三道菜係「避風塘琵琶蝦」，琵琶蝦炸得較為乾身，辣味略為蓋過琵琶蝦本身味道，最好食反而係配菜「薯片」😂，個個夾完又夾，食唔停口🙈第四道菜係「椒鹽汁瀨尿蝦」，其實就係椒鹽瀨尿蝦，唔明點解多個「汁」字🤔瀨尿蝦略為細隻，比油塘三家村既起碼細1/3，味道方面都係「功高蓋主」，椒鹽味過重，搶左瀨尿蝦本身味道。第五道菜係「長腳蟹三食 - 牛油芥辣蟹身/蟹粉芝士爆漿伊麵/椒鹽蟹腳」，哩道係大家當晚最期待既一道菜，黎之前大家都俾網上既相同片吸引🤩牛油芥辣蟹身其實好難就咁食，因為係將蟹身既肉拆出黎再用牛油同芥辣煮成既一個芡汁，食左一啖，一個字形容 - 「漏」，真係唔建議就咁擺入口😅蟹粉芝士爆漿伊麵，一如上網影片，職員將圍住伊麵既圈攞開果一刻視覺上係震撼既，大家都「嘩！」左出聲😂但係食左一小碗，感覺同牛油芥辣蟹身一樣，都係「漏」之餘蟹味較為淡，不過都明既，始終長腳蟹賣點唔係蟹膏，又何來會多蟹粉🤷🏻♂️再同較為濃味既芝士溝埋…椒鹽蟹腳，同之前既避風塘琵琶蝦、椒鹽汁瀨尿蝦一樣，都係椒鹽味過重，蟹腳炸得太過火，蟹肉乾晒仲要黐殼，三食之中最為失敗👎🏻總括哩道菜係完全糟蹋同浪費左隻長腳蟹…第六道菜係「蒸時令星斑」，味道可以，但斑魚蒸得略為過火，魚肉口感略為鞋口同結實。第七、八道菜係「時令蔬菜」同「時令燉湯」，前者賣相精緻，好有心思咁擺左幅圖畫，味道清甜👍🏻後者做得返酒樓應有水準。(唔記得影相🤷🏻♂️)第九道菜係「秘制炸乳鴿」，鴿肉鮮嫩有肉汁，鴿皮炸得香脆而唔膩口，平均每人都食到半隻，不過如果可以早啲上會好啲，因為已經有啲飽😂第十道菜係特色海鮮麵，食之前諗住會係湯麵，原來係炸麵，賣相特別，麵條炸得香脆乾身，味道合格。之後黎既係兩道甜品「楊枝甘露波波」同「時令拔絲」，前者其實係楊枝甘露炸麻薯波波，麻薯波波外脆內軟帶啲煙韌，楊枝甘露味道正常，但對於鍾意食糖水既我係絕對唔夠喉，我會情願飲一碗楊枝甘露。後者上桌前大家都估賣相會係點樣，有人講笑問會唔會好似港產片「食神」開場果味「鮮花彩虹拔絲」咁呢？🤔(睇過既會明🤣)直到傳菜員喺走廊出現，大家見到個拔絲都係「嘩！」晒出聲🤣拔絲係一座用糖膠拔絲形成既一座尖塔，下面擺左一盤香印提子🍇，試左少少拔絲，原來糖膠係用左桂花糖(我至愛😍)，所以有淡淡既桂花味😋不過哩道甜品需要同時間鬥快，因為拔絲擺到上檯都開始變「比薩斜塔」😅總括今晚視覺上的確係滿足既、係一場視覺上既盛宴，但味道、口感、質素方面都係一般，有啲甚至唔合格(個人黎講)…坦白講以哩個價錢，我可以喺好多唔同地方食好多好食，又豐富既野(賣相當然唔及哩度😅)賣相固然緊要，但係咪應該返璞歸真，追求左最基本既味道、口感、質素等等先呢？
繼續閱讀
3A⋯⋯大約係兩年前，響社交網站見到佢哋嘅資訊、食物相之後，已吹雞相約一班朋友去食。但因為路程稍遠而冇人睬我⋯⋯兩年後嘅3A，原來已開埋分店，但今次終於去得成！今次成行係因為年初，於海外出生嘅外甥結婚！但當時我哋無緣遠赴出席！所以⋯⋯(下刪幾百字，淨係知今晚呢餐飯，係外甥搵佢香港啲friend安排），見到係去3A，心底裏即時暗爽！見到$1200/1位期待...新店地方並唔難搵，緊記喺荃新天地二期旁邊就得！今晚一行12人12道菜。打頭陣嘅係「堂灼澳洲黑邊鮑魚」，全程由侍應開住個爐，響你面前淥淥下，後再位上送到我地面前。鮑魚灼致啱啱熟，完全唔需要調味，簡單、好食。之後嘅「雞油花雕蒸琵琶蝦陳村粉」，淨係聽到「雞油+花雕」就知道係精品啦！但⋯⋯主角琵琶蝦嘅味道，竟然唔及墊底，吸晒雞油同花雕嘅陳村粉咁好味⋯⋯頂！「三蔥炒龍蝦」嘅擺盤十分精緻，醬汁豐盈，熱辣美味嘅一道菜。「椒鹽汁瀨尿蝦」外觀好亂，我有懷疑過係咪『擺盤』冧咗（因為見到其他食友嘅相片，係堆到成個燈塔咁架（笑））！侍應為我哋逐一剝殼後，逐一以位上碟，當晚選用嘅瀨尿蝦，大大隻兼肉質結實！建議享用呢度菜嘅時候，連同椒鹽配料同食，香口惹味。「長腳蟹三食」我哋當晚揀選咗：蟹身以上湯煮；蟹腳用椒鹽炒；而蟹膏用嚟炒粉絲。蟹腳經椒鹽快炒，實在並唔係我杯茶（唉）！ 蟹身經上湯烹煮後，蟹嘅鮮味出晒嚟！至於蟹膏粉絲我『隊』左兩碗！味道唔使講啦⋯⋯食咗幾道濃味炒海鮮後，飲返碗「時令燉湯」清一清先前嘅油膩！但呢煲燉湯：肉肉肉肉肉⋯⋯碗湯遞到埋嚟嘅時候『立立令』，於碗內嘅雞件『甘香油爽』係睇得到嘅！頗好燉湯嘅味道得宜。「清蒸時令星斑」唔知點解個條星斑咁『樣衰』！好彩火候拿捏得宜，魚肉啱啱離骨，個人喜歡配以香蔥一同進食，美味之極！食過魚、蝦、蟹之後，賣相極為精緻嘅「時令蔬菜」上枱，一眾iPhone、Samsung、華為⋯⋯搶閘食先！但呢碟時蔬，份量實在太少，味道亦太清淡。清淡過後，手瓜起𦟌嘅服務員為我哋奉上，外觀瘋狂搶眼、誇張嘅「秘製燒乳鴿」，一啖咬落去已經感覺到呢度菜係「上品」，皆因乳鴿燒得皮脆肉嫩也！或許3A收到風！今晚有一對新婚夫婦⋯⋯所以店方準備咗個錘仔，俾佢哋扑扑扑⋯⋯⋯⋯！呢個「特色海鮮麵」有蝦、蟹、蜆，佢哋扑完隻蟹我哋就食，都幾好食！甜品有兩款，分別係「楊枝甘露波波」，顧名思義已預計到預期嘅味道，只係外觀改變成波波。咀嚼緊波波嘅時候，手瓜起展嘅店員，送上另一款招牌甜品「草莓拔絲」。一眾iPhone、Samsung、華為再次爭位拍攝之際，店員建議我哋：「45度低炒」⋯⋯即係咁！話咁快12道菜食得晒！臨走時再次感謝，一眾強勁臂彎店員殷勤招待，成就咗今晚夜晚宴。
繼續閱讀
以私房菜黎講，3A廚房私房菜簡直係低食。私人度高，設有單獨房間。套餐有幾個選擇，每一道都好適合打卡當然亦充滿驚喜，絕對唔會令你失望。好食到已經成為我的飯堂了！非常非常值得一試👍重點推介：·拔絲生果🍓·黯然炒蟹hi🦀·堂灼鮮鮑魚燉雞湯😍·特色麵🍜其他美食仲有：·芝士龍蝦多士·手剁肉餅龍仔蒸蟹飯·橙味酒杯帶子·龍躉面珠燈鴛鴦刹椒·嫩滑肉汁乳鴿·金湯燴千絲·火山排骨全部人都食得好開心，好滿足～ 想食嘅朋友記得要提早預訂喔！
繼續閱讀
位於荃灣的「3A廚房」給人一種高雅舒適的用餐體驗。他們的菜單多樣豐富，每道菜都讓人驚艷不已。我特別推薦他們的堂灼鮑魚，鮮嫩多汁；泡沫帶子，清爽海味；以及黑松露芝麻汁龍蝦，濃厚的松露香氣令人難忘。不得不提的是他們的招牌菜「龍王乾坤魚」，口感絕佳，讓人回味無窮。另外，乳鴿烹調得恰到好處，金湯燴千絲清爽可口。菜脯炒飯入口香脆，時令拔絲則是完美的結尾。價格方面，每位650元的價格以私房菜來說不算便宜，但絕對物有所值。整體而言，「3A廚房」是一個值得再訪的餐廳，無論是用餐環境還是菜品質量都讓人滿意。強烈推薦給喜歡享受美食的朋友們！
繼續閱讀
您可能會有興趣的...