鴻福海鮮四季火鍋 (已結業)

星期天晚上天氣轉涼了一點, 有點吃火鍋的興致, 兩口子行過大街穿過小巷, 來到一間隱蔽而有風味的火鍋店, 店子裝修簡單, 通風系統充足, 坐低後亦覺得舒服.出門時雖帶了紅酒同行, 但遇上了這個風味火鍋, 還是改用啤酒伴襯會更有風味, 點了芫茜皮蛋和沙嗲湯底, 三吋高十吋闊的小鐵鍋十分有趣; 預先配好的辣椒豉油亦很香口討好; 點了肥牛, 羊肉各一碟, 兩者肉味香濃, 而且帶有羶香味; 第一次品嚐鱘龍片, 肉質有點像鱔片, 味道輕清; 冬菇, 香滑可口; 生蠔肥美可口份量十足; 雲吞水餃各半打, 餃皮同餡料質感偏向爽口, 味道亦討好.第一輪點菜已飽了一大半, 太座意猶未盡, 再點了肥鹿片, 肉味重, 質感偏韌, 肥糕部份香口; 最後點了一碟蔬菜一清腸胃. 臨走時已喝得半醉, 帶著醉意行出小巷, 一個深吸引, 方發覺身體吸收了不少火爐的風味~

變態，晚上10時忍唔住都要打個宵夜邊爐。仲要唔記得地址，途中要打電話求救。終於搵到門口，行入去的確要些小勇氣，坐底都要勇氣。但只要試過個豉油，邊個夠膽響我未食夠喉時要我走，就絕對要更大的勇氣！由於宵夜關系，只係單食火鍋，燒烤留番下次先。只點了火鍋3寶：生蠔，鵝腸、手切牛。佩襯蔥粒辣豉油（鍾意的更可加生蒜）加埋藍妹同忌廉，構成一個難捨難離的場面。由於炭火猛，肥牛一放入去外層已經被封，肉汁全留在肉內，咬落特別好味。鵝腸雖然唔爽口彈牙，但烚完仍然帶膏，入口必油。生蠔肥大肉厚…同我一樣…弊！會唔會比人湯左我打邊爐咖？

因為"無間道","爭分奪秒"關係令呢間隱蔽於土瓜灣既火鍋店得以暴光, 加上以炭火打邊爐可能觸犯消防條例(唔肯定),舖位亦不在顯眼地方, 需要穿過一條又濕又暗既冷巷, 衛生情況未必人人可以接受, 總之就係大牌檔格局。呢度好玩之處除左炭爐打邊爐外, 仲可以炭爐燒野食; 黎過呢到兩次, 兩次都係開兩個爐, 一邊火之餘一邊可以燒下蜆, 雞翼, 雞腎等。火鍋材料方面, 手切肥牛有水準, 但墨魚滑就好唔掂, 鵝腸新鮮肥美, 仲有好多其他食物包括海鮮; 湯底亦有多款選擇, 一般都係$40 - $50, 試過番茄薯仔牛肉湯唔錯,佢無落茄膏, 感覺清D天然D。黎呢到打邊爐就要預左時間耐D, 因為炭爐關係, 火力唔係咁強, 再加埋又燒下野食, 起碼玩你兩三個鐘頭, 好在呢到又唔會趕客, 夜晚開到零晨4點, 消費又唔貴, 三個人飲埋啤酒大概都係$130/人。不過記住唔好著咁靚去, 如果唔係件衫會吸左好大陣炭燒味。香港用炭火打邊爐已經瀕臨絕跡, 襯仲有既時候大家不防體驗一下。