魚米 (已結業)

今日朋友帶咗我去荃灣食魚魚🙆🏻🙆🏻朋友話食咗幾次覺得幾好食👍🏻👍🏻平時我都好鍾意食魚🐟🐟🐟🐟今日呢條冇令我失望🤗🤗🤗F11 煎封馬友魚 配白飯 $65(熱飲+$7 凍飲+$10)條魚🐟煎得外皮夠脆夠香口 魚肉鮮嫩 肉質唔會煎到乾爭爭  冇腥味唔油膩 甜豉油同條魚好夾 撈飯好夠味 白飯份量好大 🍚R11 椒鹽魷魚仔 $32有7舊魷魚仔🦑 白灼後再晒上椒鹽 煮得幾腍 椒鹽味唔太濃

嬲到一個點，叫米線，嗌左三個送，個阿姐全程黑面，落單淨係同我落左一個餸，叫佢加返餸比我，竟然話無得加，廚房整緊，依係你落少左單唔係我既錯喎，咁既服務態度真係好味都無用

魚米其實我每個月都食一次或以上。野食唔差，都幾近我公司，所以我間中都會黎食。菜式選擇都多，有飯有米線有烏冬，平時黎都係食米線多，今日想食飯，所以點了果醋汁豬扒飯。都幾大碗架，果醋汁有少量肉碎，酸酸甜甜，送飯係一流的。配有兩塊厚切豬扒，豬扒係煎，但唔乾身，唔硬好夠“冧”唯一唔夠好就係有少少雪味，但都可以接受，配埋杯熱檸檬茶就為我一個勞碌既朝早，補充左大大既能量呢度出名魚，下次黎試下原條魚既米線或者飯先。

一個人，悶悶地，最岩食米線。食黎食去都係個幾間米線鋪。今次試一間特別 d，魚米。中午去食都幾爆場，幾乎全滿，要等5分鐘。入到去比佢原條魚上的米線吸引。但由於太大碗，怕食唔哂，叫左自制魚腐米線。佢地最出名係魚湯煮米線，所以我今次都無食酸辣湯。第一口，當然要飲一淡湯，湯味真係好鮮好甜，但個度鮮甜絕對唔係加味精的甜，再食個米線，比起其他某某米線鋪的米線更滑身，好彈牙，再咬一口魚腐，感覺有少少像魚肉球的感覺，好彈牙，輕微炸過一下，口感更香口。成個米線唔需要加任何調味料都好好食真係好難得，你會從口中感受到當中何謂鮮甜，唔會有魚腥味。

早兩日腸胃不適，今日中午好返少少就走左去魚米食碗魚湯米線。太愛食辣啦，忍唔到口點左麻辣，今次叫左麻辣炸醬豬肚牛肉米線小辣，有芹菜同炒香蒜蓉做配菜，即時香味提升仲有少量炸菜個湯真係無味精，我食米線係吸湯皇，食左好多次都無口渴好正呀！雖然d腐皮煲到好碎，但我好鐘意撈埋湯同米線一齊食，牛肉超大塊，好軟唔難咬，豬肚都好大夠，麻辣好香......好足料夠大碗加埋杯足料柚子蜜......成個午餐有個完美句號呀！

放假訓到自然醒，睜大眼已經下午1點幾...天氣依然涼涼地，忽然間勁想食煲仔飯，嗱嗱林梳洗完碌出街。記得荃灣眾安街有間餐廳有煲仔飯，一個個瓦煲放門口煮真係好吸引，但吾知lunch 有冇...出到荃灣，不出所料，lunch 真係冇...咁冇計啦，唯有求其搵間餐廳食啦。最後揀左附近既魚米。呢間餐廳自稱係"原條魚米線專門店", 因為真係想有粒米落肚，所以最後揀左果醋豬軟骨菜飯+熱奶茶。先黎熱奶茶，麻麻地吾夠滑，不過我都吾期望有太興既水準，所以都可接受。再黎果醋豬軟骨菜飯，菜飯熱辣辣好似岩岩煮好咁。豬軟骨份量中等，勝在夠入味同個汁夠濃，因為加左果醋，所以酸酸地好開胃，食完仲好黏嘴。最後埋單45蚊落樓，以荃灣區黎講吾算平，但可以接受。

重未到食晚餐時候，但口痕想食米線😋年三十晚好多店舖都早收，見到呢到有開，咁就入去叫個米線食叫左酸辣米線，豬軟骨加蟹子丸試啖湯先😕淡淡既酸但唔辣，就好似一碗放左酸菜就算既野咁講真無下次🙁

魚米，幾乎每個小區都有，價錢定位大眾化，四十元左右雙餸，荃灣店來過兩次，以前不喜歡吃魚的我，下了單點原條魚米線(馬友)，此約60-70元左右。價錢相當平民，和百數元的拉麵相比不會遜色，反而整條魚更反映震撼。蒸魚及小菜也50-60元， 豐儉由人，健康冇味精。原條馬友魚，賣相實在吸引，讓人食指大動。酸菜酸辣深海魚柳，酸湯不太正宗、偏甜，沒有了川菜應有的口味。不過魚柳十分新鮮，採用淡水魚切片，去鱗起骨，充滿魚肉 嫩滑質感，鮮味不凡。簡單便餐不過，一個fine dining的晚上。

冬天最岩食熱辣辣既野，用魚湯做生招牌既餐廳多不勝數，但真正魚湯而冇味精未必間間都係，今日終於試到真正魚湯味道倉魚煎到剛剛熟，外脆內軟左口魚半煎炸到非常香口，連魚鰭都可以食得兩款魚雖然冇調味，但食落非常鮮味

行街到半路…兩人就係附近簡單先食飽再作戰!!.........叫個酸辣魚片腩肉炸醬米線吧!!…又魚片又腩肉…圖片望落好豐富…耶!!小店裝修就冇乜講究…已經係近兩點過左最繁忙果轉時段…….揾左靠牆”自閉位”…兩位員工阿姐仲好自在咁走尼坐响我地隔離take a break開飯…!!碗麵上啊!!...好大一碗呢!!...多片腩肉肥瘦適中, 屬於比較爽口…酸菜好開胃, 炸醬令湯底帶小辣…又夾少許鮮枝竹...美味!!...食著食著...且慢...魚片呢?? 哈哈!!...隔離阿姐聞言即時放下碗筷…話可能有時廚子一時執漏吾出奇!!...隨起身去廚房打理一番…好快阿姐就用細碗裝番幾塊炸魚片我…而令我為之驚喜係浸著魚片o既奶白魚湯…極為鮮甜魚味濃郁啊~~ 滋味過本身碗酸辣湯底添!! ...情不自禁飲晒!!!...三十多元一碗湯麵…著實抵食呢!!

今日打去叫外賣過$100， 呀姐又話唔夠人手又叫自取， 到肯送外賣啦 來到樓下都唔送上來，打來叫到樓下接外賣。服務態度極差，唔憂做都唔洗咁。 大家叫外賣時請三思，以免勞氣。*十分失望失望失望失望失望*

我們5個人一齊叫外賣，打電話去，個丫姐話:"唔送外賣，你地自己叫第二間啦。"嘩，都唔知咩態度，咁你間魚米派外賣紙，我地咪叫外賣囉，好正常啫，但係你唔送，都唔好態度咁差丫！😡😡簡直不知所謂！未試遇上咁差嘅食店，你一係唔好派外賣紙啦！😡😡😡

荃灣....太多人與車 鋪頭就更加多 多到都吾知食咩所以盲中中行到魚米門口就好吾小心咁入左去男朋友鐘意食魚所以可以食招牌菜我就食次招牌菜醋豬軟骨菜飯酸酸地帶小小甜 菜飯落左鹽略咸魚湯米線 魚湯帶小小胡椒粉但米線好淋 冇咬口 但條魚新鮮煎熱辣辣好香口 正

今日放咗學，跟兩位同學仔去醫肚，但這間魚米餐廳很好生意，都已經晚上八點啦，還是要等位，因只好企在門口等位，先看餐牌食咩好等左10分鐘終於有位，我們即刻點餐了，其實佢啲湯底是魚湯所以奶白色，冇加味精，真材實料黃花魚米線魚$59真係好新鮮，不過好似我的黃花魚冇相嗰張咁大條，細條左啲$69 煎左口魚跟滷肉飯，台灣滷肉飯做得唔錯有台灣地道feel ，魚肉好實淨，食得出新鮮魚，不錯不錯比目魚跟滷肉飯$61賣相一樣很吸引，條魚煎到香金黃色，食落都好新鮮下次再幫襯

之前聽朋友講話這間食店幾好食，好，一於去試下，但結果令人失望。先講服務，D侍應態度好差，對客人呼呼喝喝，食物又唔掂，叫左個魚湯魚角米線，魚湯冇乜味，魚味好淡，魚角唔口爽口，都係冇乜味，米線就太淋，食左半碗已經鼎唔住，下次都唔會再來。