香港冰室 (已結業)

發覺近年叫冰室o既餐廳越開越多，諗諗下究竟同茶餐廳有咩分別呢？🤭😄今日lunch周圍都要等，見呢間唔駛等好耐，一行七人就黎到呢間叫做香港冰室食下，未有大枱所以要分開左坐。地方雖小，但裝潢都見有花過心思呢。冰室最常見到又最多人叫莫過於焗飯類同茶餐類。星期一至五有唔同指定午餐，唔係餐其實都係+$3有凍飲，係少左個餐湯。我地呢枱三位女士都揀左焗野食🤭分別係「焗芝士咖哩牛腩飯」$53「水牛城芝士焗豬扒飯」$50同「焗芝士肉醬意粉配西冷牛扒」$55整體唔錯，份量亦夠，可以係lunch 選之一😊

今日行經旺角，見下午茶餐有出前一丁食，但竟然唔使加錢，(平時D茶記至少加4以上)，仲有奶油脆豬講真，味道就一般，個炒蛋唔係嫩滑，仲有D太熟，但二個人，加埋凍飲都唔使$90, 算OK LA

侍應叫極都唔應，叫到3，4個先落到單，食物質素差，與價錢不相乎。難怪隔離茶餐廳多人要排隊朱古力係溝水，紅豆茶太多糖水落。豬扒撈丁塊豬扒韌過張紙......真係可一不可再🤦🏽‍♀️

放假約咗best friend去咗太子籌備朋友生日party，中午見肚餓，又係lunch Time，所以就去咗食香港冰室！呢度好多間冰室，但係好多都要排隊，所以就揀咗唔使點排隊，睇落幾好味嘅呢一間！見佢menu有好多唔同嘅花巧嘢，好多選擇，又可以自選，下午茶都好多款式揀!! 我哋入咗去揀咗卡位，呢間有最低消費，所以點都要叫下嘢食！朋友本身唔肚餓，但係都逼住要叫杯野🙈🙈唯一唔好處！我叫咗芝士薯仔焗牛柳（唔係好記得全名）！睇佢賣相唔差，一出場香噴噴～ 飯底幾唔錯👍🏻 粒粒分明，唔會一pat pat🤤 牛柳就一般，冇乜驚喜🙈 芝士味都好重，焗汁配芝士再配飯，食落好味👍🏻👍🏻 不過，價錢就貴左少少，一個焗飯加嘢飲都差不多$70😅

同男朋友係旺角諗唔到食咩行下行下就見到呢間裝修幾靚幾特別就入去食下。隔離係高質紅茶冰室，食完真係好後悔冇食紅茶🤦🏻‍♀️🤢芝麻醬撈烏東配雞排 $55黎到時真係嚇一跳😂😂份量小，食物又hea。味道冇咩特別，白烚烏東加芝麻醬，真係有d hea😂 但個雞排係幾好食既，好多汁🤪又易咬。雖然有配飲品，但呢個價錢配上呢個份量女仔真係唔夠飽😂由於上面個餐黎先搞到心情差左之後個餐冇影相，但之後個餐係ok既唔會好差~😀常餐C $55花膠冬菇撈公仔麵，料都算多但好似煮得太耐。花膠好薄身，但撈丁食ok既。個蛋真係唔得，勁老，奶油豬偏乾但接受到

就黎中秋，我呢d大專生明明學校假期唔包中秋假，但當然要放下自己假食個tea先啦😆今次因為朋友要去旺角買野，所以黎到金魚街睇下有咩食，因為今日好累好累要坐下，所以就搵左間冰室坐！其實我唔係好肚餓，朋友叫左野食，本身諗住等完佢就出去買野飲，點先佢話有最低消費，咁其實我食野都ok既，咁咪叫左個茶餐，西多士加熱狗腸！點知黎到時同我想像中既份量足足cut左一半！半份西多，半條腸😅仲貴過大xx d下午茶，成$40蚊！食完好似無食過野咁，難怪隔離餐廳多人咁多啦！雖然員工唔算無禮貌，但呢個價錢唔會再黎

今日無聊諗住無野做同朋友落去食個tea,但因為朋友未食lunch,所以就揀番個冰室去下啦,香港冰室其實開左好耐,聽過人講好食,但自己一路都無食過,今日我呢個香港人黎到香港冰室食番d香港地到菜：常餐！招牌既沙嗲牛肉麵,再加番杯冰檸茶,估唔到呢到既麵,可以揀福麵or出前一丁,真係好有屋企既感覺👍🏻呢排頻頻有約,連係屋企煮個頹麵既時間都無！仲要佢個出前一丁都煮得好好食,屋邨長大既我差d連d湯都飲晒🙈蛋同牛肉就略為老左少少,不過奶油豬都好脆,個tea太滿足,唔洗食晚餐喇😂

打完風四圍都塞車，放工後搵個地方食埋飯先返屋企，就諗住搵間茶記食就算，見依間新裝修又叫冰室，諗住唔會太差點知...先講吓我哋叫咗咩食先，一個焗芝士魚柳飯，一份常餐豬扒撈麵...落完order唔夠5分鐘個焗芝士魚柳飯就到，面個D芝士少到嚴格嚟講不可叫芝士焗飯，最多都係白汁焗飯，味道一般。之後就係個常餐，個奶油豬仔係唔脆嘅，個炒蛋無味之外仲好老...算諗住撈公仔麵好少衰，點知個麵太淋個汁又唔甜唔咸，個塊豬扒乾到好似食豬肉乾咁成餐唯一可取只有杯凍檸茶，下次都係附近較老字號嘅茶記食。

今日食lunch時黎到呢間香港冰室,之前聽同事講話呢到過左午餐時間幾好坐又有歌聽,咁我就見今日都係tea time先食lunch就過黎坐下啦,睇下有幾好坐嘛,望望餐牌,先記得好肚餓,叫左個牛魔王！姐係焗牛飯,店員話呢個有牛排喎,咁咪試下😋焗飯黎講唔算等得耐,飯好多,但個牛排呢?原來切上😂ok la,唔算難食既,不過本身對塊牛排有d期待姐😂😂仲以為係好大塊既,不過飯好多,又有薯仔,都好夠飽,同埋d歌都勉強係我年代有聽過,無咁悶囉

今日晏晝去咗食下午茶，喺太子附近搵黎搵去都搵唔到啱心水嘅下午茶，經過香港冰室，見到佢嘅下午茶Menu，就想試吓！我同一個同事叫咗下午茶，另外同事就叫咗午餐~ 呢度最唔好就係有最低消費！所以點都要消費$20以上，因為一杯嘢飲差不多呢個價錢😡 味道方面，佢嘅下午茶餐沙嗲牛肉麵配炒蛋加豬仔包～ 佢既豬仔包好好味！上枱嘅時候仲係熱熱地👍🏻👍🏻 炒蛋就一般，唔係好滑！沙嗲牛肉麵就中規中矩～ 唔係好驚喜，不過下午茶餐都係呢啲質素，但係佢加埋嘢飲都差不多$50🙈 試一次好了～

週未來食午飯，現場座無虛席，可能係遊客區，好多遊客。叫左一個自選扒餐，送湯和餐飲。湯無得揀，今日係紅色的忌廉湯，得個濃濃的湯底，無任何粟米粒或者紅蘿蔔粒，味道都好濃郁。飽肚的湯。個餐叫左香煎龍脷柳，自選配炸蝦餅和薯菜，燒汁。得一塊大龍脷柳，輕輕焦左少少。少少地，切左一細塊試下味先。一入口，太大陣味精味啦！重到一個點我連燒汁味都食唔到魚肉都夠淋，不會太“鞋”。炸棋子蝦餅只有兩件，但味道正常啲，唔多味精，但入面啲肉比較“淋”，唔夠彈牙。

西冷牛扒拼司華力腸配薯菜。 冇得揀餐湯只有忌廉湯可以飲，叫咗一杯奶茶多奶。我覺得個忌廉湯實在太多粉啦！ 西冷牛扒啲肉唔夠firm，啲肉好“削”，好似食緊一個牛肉漢堡咁，冇牙都食到。都有牛肉味既，不過不失......司華力腸只有半條，煎香咗，皮脆味濃，係最正宗既司華力腸味。薯菜可以再炸脆少少，加少少鹽會更加好。奶茶無茶味，同招牌寫係招牌奶茶真係有啲距離。座位都算不錯，坐得都舒服。裝修有老香港味道，感覺良好。

黎到香港冰室,每次都覺得佢既環境係幾舒服,但係坐到入黎每次都要諗好耐食d咩,一黎油煙味比較多,坐得耐就會想走,今次點左瑞士汁雞翼撈面,配爆脆奶油豬加奄列,奶油豬可能牛油唔夠,煉奶同個包唔係好夾,好似食緊餅乾咁,但由於佢煉奶都比幾多,肥仔愛甜吃所以都食晒,至於個瑞士汁撈面,雞翼比之前細隻左,雞翼就咁係唔錯既,但個面好乾,乾得黎揚散左又好林,瑞士汁撈落去唔係好夠色,雞翼好食但面同奶油豬都麻麻地,係失手定係退步啊?好耐無黎香港冰室,講真有少少失望😅

早上到旺角工作，隨便搵間茶記食早餐，見到這間有位置，便進去座了。我點了雪菜肉絲米配餐肉炒蛋厚多士，其實味道真的不錯，米粉分量多，雪菜肉絲不會太鹹，炒蛋夠滑，杯奶茶都好得。朋友點了沙嗲牛肉出前一丁$36，丁麵加$3。

首先間鋪內通風幾差，好似無開冷氣咁，擺滿細風扇喺度吹，但係都係有朕味。睇Menu期間，有個姐姐埋黎問食咩，先坐低2分鐘未揀好食乜，就同姐姐講”未揀好，轉頭嗌丫唔該”，點知個姐姐”JIP”一聲轉頭走左😦間鋪嗰陣個場仲要唔爆...仲以為自己得罪佢嗌左個扒餐同一個雞翼炒蛋飯，炒蛋飯50蚊，瑞士雞翼唔入味，炒蛋十分乾，撈哂成兜汁都食唔哂個飯，奶茶唔好飲，忌廉湯無料，得幾粒粟米，好慘。完全唔值50蚊，差過好多其他茶餐廳。