養生糊甜品專門店 (已結業)

居然而家仲可以食到咁平嘅中式糖水! 有次經過蜆殼街諗住食隔離餐廳，點知要等位，所以留意到依間糖水舖。成間舖頭好細，但明明晚飯時間已經好多人幫襯買外賣。佢門口已經係一格格擺滿糖水嘅鐵櫃，我哋見咁旺，所以就去堂食，仲要只係$20碗, 而家真係好少有咁平嘅。坐低堂食先知道原來本身執咗，老闆同老闆娘已經諗住退休休息，但最近又開返舖，所以街坊們都好支持。有咁多捧場客果然係名不虛傳，食落真係係好足料，好濃味，似係好多材料煲咗好耐，唔會淡茂茂，亦唔會太甜，味道剛剛好。個名無改錯，真係有種養生嘅感覺。同埋好大碗，真係好抵食呢！

喺炮台山食飯，食飽飽打算散個步先走，走到小街見到呢間「養生糊」，因爲居住地方比較少中式糖水鋪，所以即刻拉埋朋友試試。之後睇到訪問，先知道原來佢地大有來頭！神隱六年，最近先出山繼續賣糖水，真係覺得自己當晚好好彩。店鋪空間有限，只有數個座位，多以外賣爲主，半個鐘的糖水時間，店外都Keep住有人外賣糖水，可見好受街坊歡迎。《甘香合桃糊 $23》用上優質合桃，自己烘焗再磨成漿，質感濃稠，幼滑細膩，入口充滿合桃甘香。《招牌芝麻糊 $23 + 芝麻湯圓 $4》將白芝麻和黑芝麻炒至金黃再磨成漿，色澤黑潤，未入口已經有好濃的芝麻香，入口細滑。另外加左一粒芝麻湯圓，同樣自家製，大大粒。老闆話佢地無落豬油，食落健康啲，湯圓皮煙韌，咬開有微微流沙效果，食到磨得好幼細的芝麻碎，真材實料，芝麻味超香濃。

喺北角要搵好食嘅糖水唔容易，但最近發現有一間叫養生糊糖水專門店，專賣傳統中式糖水，款式亦多而且好好味，今次就揀咗 雪耳木瓜糖水、薑汁湯圓、綠豆沙、同埋喳咋外帶返屋企食。 雪耳木瓜糖水入面有兩粒紅棗，提起曬成個糖水嘅味道，木瓜好香好甜而且雪耳好滋潤，煲咗好耐好好味！薑汁湯圓個薑汁就好濃烈，鍾意薑嘅朋友一定要試，湯圓就係黑芝麻餡，好香濃，湯丸亦都好煙韌有五大粒，抵食。綠豆沙入面亦都有唔少嘅海帶同埋滿滿的綠豆，夏天食絕對係解暑之選。而喳咋入面有好多唔同嘅豆類，加埋花奶食又係食到停唔到口。總括而言，四款甜品都好好味，下次我一定會再嚟試埋其他嘅甜品。

嚟到北角呢間手工中式甜品 - 養生糊，有幾款甜品都係我必點嘅！腰果糊$23腰果糊唔係咁多地方有得食架！呢度嘅腰果糊，果肉打磨得非常幼滑，食落完全唔會有顆粒感，細味果香味十分濃郁，絕對係我嘅首選。合桃糊$31 (+$4加湯丸) 合桃糊堅果味香濃，口感綿密，湯丸皮非常柔軟，入口流出芝麻餡料，香甜味美。凍木瓜雪耳露$24（+$4加芋圓）雪耳露膠質很重，木瓜夠熟帶自然甜味，雪耳煲得非常軟滑，秋天滋潤一下就最啱。三色芋圓口感軟糯，同雪耳露好夾。

本想到天后那條食街買甜品回公司，但同事推介不如試試這家中式糖水小店，餐牌一頁而已，選擇不多，都是傳統的味道。而對於中式糖水來說，特別鍾愛芝麻糊。沒想到這碗生磨芝麻糊真材實料，有驚喜。小店人手不多，只有兩個人一手一腳包辦。等候期間看看牆壁上那些報導訪問，原本舊店在北角，店主每天自家炒製黑白芝麻再加入泰國米，磨成漿。既然如此，那就要一試這店的芝麻糊，買了幾碗芝麻糊，若嫌單寡的話，可加添雞蛋、湯圓、蓮子、芋圓等材料。我們分別加了芋圓及湯圓在糊裡，增加口感。回去一打開蓋子，隨即傳出濃烈的芝麻香。芝麻糊濃稠烏黑，每舀都很細滑，而且甜度剛好。以這個價錢，甜品卻高質，性價比十分高。

女仔食甜品就係第二個胃😆！就算食到飽一飽，都要食返碗甜品，先至係圓滿！朋友介紹，呢間中式糖水店，出名好正宗兼足料！因為兩個小朋友同我一樣 都鍾意煙韌野，費時佢哋爭，我就每一款都加左芋圓，加$4就有一份芋圓，真係好抵食！芋圓煙韌彈牙，唔會太甜，食落感覺好健康❤️綠豆沙～非常高質，啖啖都食到幼細嘅海帶，夾喺煲到起晒沙嘅綠豆，好Flash！因為老公鍾意凍食，我買咗返屋企之後就擺咗落雪櫃，雪過變得非常濃郁，比較杰身。下次都係熱食會更滑！芋頭椰汁西米露～芋頭和椰汁味都夠好濃，裏面仲食到好多芋頭粒，超級香！芝麻糊～超級濃郁幼滑，而且唔會太甜，自己磨嘅真係唔同啲👍碗碗都係$20就買到，又足料又正宗，去邊度搵！回頭率十足💕💕❤️❤️❤️支持小店❤️❤️❤️

同家人食完晚飯見口淡淡，就去咗養生糊甜品專門店買外賣返屋企食。🤤甜品叫咗兩碗薑汁湯圓加芋圓，一碗喳咋同埋一碗綠豆沙。😍4碗甜品都係20蚊一碗，80蚊就有4碗足料甜品，真係抵食！👍湯圓1碗有五粒，黑芝麻餡，鍾意食黑芝麻嘅我就最愛。而且每粒湯圓都煙靭，加埋qq嘅芋圓帶出唔同嘅口感真係好好味。😋綠豆沙就超多豆，呢排熱氣所以家人都好鍾意食呢個綠豆沙。😋喳咋入面就有好多唔同嘅豆類同埋芋頭，落埋花奶食超香。😋食埋個甜品真係好滿足嘅一夜，下次大家有機會去北角一定要去養生糊買傳統中式甜品啦！👍

阿妹係咁話呢一間糖水舖好鬼正 搞到我同老公夜晚喺銅鑼灣食完飯之後都忍唔住過嚟 黎到之後九點幾 本來想食蛋白杏仁茶 但係賣晒 所以最後就食咗合桃糊加蓮子 老公就叫咗椰汁西米露加芝麻糊 再加埋芋圓 合桃糊食落好濃郁 蓮子亦都係好高質 不過兩樣野溝埋一齊唔算超級夾 下次都係試下淨合桃糊 整體來講成個糊嘅味道都好出色 由於我哋兩個星期五出去拍拖 丟低小寶寶係屋企比公公婆婆湊 所以臨走就決定買多芋圓芝麻糊 補償下佢哋 而且呢度啲甜品唔係好甜 好啱小朋友食熱芋頭椰汁西米露 加芝麻糊 加芋圓 亦都好驚艷 無論芋頭定係椰汁個味 都好濃 裏面仲有一粒粒芋頭粒 超級正 芋圓煙韌彈牙 而且唔甜 感覺上食得多都唔會肥 熱芝麻糊陣味就超級香 自己磨嘅係唔同啲 阿妹果然冇介紹錯❣️養生糊甜品專門店 (北角)北角蜆殼街6-16號寶榮大廈地下D1號舖

做完義工，朋友介紹下來到尼間養生糊專門店。鋪子不大，但整潔條理，靠墻木台有些日系感覺，配合養生主題。望下有咩食先，雖是中式為主，但選擇挺多，價錢廿十蚊左右，堅系平，加雞蛋、蓮子、湯圓、芋圓都系加4蚊😆，雙拼都係原價。我地叫左樣野，芝麻糊，蛋白杏仁露，核桃。記得上次來食唔到，賣曬，今次可以滿足翻。四碗糊陸續登場，糊香撲鼻👃🏻而來，急不及待食。烏黑的芝麻糊濃度剛好，擺入口，自動溜入食道，熱度夠，不會好甜，對人健康d.啡色核桃糊好香，跟芝麻糊一樣香滑。另外蛋白杏仁露朋友最愛，杏仁香百聞不厭，淡淡，蛋🥚白增添了口感，相對糊無甘“傑”，味道令人回味。整體而言，健康又美味，價錢甚吸引。

小巷裡的驚喜高質養生中式甜品～～～夜晚收工同大嚿嚟咗天后呢邊食飯 今晚我哋食串燒 食完之後覺得口乾乾 所以就行咗黎附近呢間 之前同事推介過話好好食嘅甜品鋪食糖水～～～舖頭店面唔係好大 但係人流不絕 裡面持續滿座 亦都好多人買外賣 ～～～睇完餐牌之後 我哋就叫咗綠豆沙加蓮子 同埋合桃芝麻糊雙拼 呢度嘅雙拼好抵食 係唔使額外加錢嘅 蓮子都只係加$4 分量仲比得好足～～～綠豆沙加蓮子： 我哋本來想食凍 但係嚟到嘅時候 凍已經賣晒 所以最後就要咗熱 雖然食唔到凍嘅 但熱嘅綠豆沙非常好食 尤其是係最近天氣已經有啲凍 熱熱地食落特別舒服 佢哋嘅綠豆沙煲得好用溶 入口好沙 唔會太甜 中間仲有一絲絲嘅海帶 而蓮子更係有驚喜 入口即化 超好食 ！後來聽到好多外賣嘅人 都有加蓮子 睇嚟我哋真係冇叫錯😄～～～合桃芝麻糊雙拼：合桃非常香 芝麻亦都非常好香 食落去兩種味道 各有各特色 誰也沒有搶去誰的風頭 要我揀一款我最鍾意嘅 我真係揀唔到 而食食下見到佢哋嘅餐牌寫住 全部糊類甜品都係自家磨製 難怪咁濃郁 咁好食 真心好耐都未食過咁有心機 同好食嘅中式甜品 臨走忍唔住叫多個芝麻糊加湯圓加蓮子 返屋企俾阿爸阿媽試

食完野到周圍行下，見前面有幾個人買外賣，又八卦睇下賣咩，原來係糖水舖。簡單不花巧的糖水舖，款式不多，賣的都係傳統糖水。主要做外賣生意，但都有幾個位堂食的，行左咁耐就入去坐低食碗糖水先，朋友點左芋圓芝麻糊，個樣幾靚呀。第一次食芋圓唔係跟仙草，哈哈，同芝麻糊都夾呀。芝麻糊好杰身，好有芝麻香，熱辣辣好正。自己就貪心啲要個兩溝，合桃腰果糊再加湯丸，一上枱就聞到香味啦。合桃腰果糊杰身得黎勁滑，聞落香食落仲香，堅果味無得彈，而且甜度剛剛好，好啱口味。加左三粒湯丸，大大粒。內邊係芝麻餡，好多餡，湯丸煙韌又滑嘟嘟，好味。好耐無食過真材實料的傳統糖水了，見住佢潷出嚟熱辣辣就知道童叟無欺，之前食過一間用微波爐叮水歸水路完全冇味嘅，價錢仲唔平，呢間養生糊好食好多，又價錢實惠，值得支持。

聽人講北角有間傳統舊式嘅糖水舖，呢啲舖頭買少見少，一直想搵機會去試吓，今日出開北角就專登帶埋外賣盒買個外賣返屋企食。雖然舖頭細細，座位唔多，但感覺親切。門口個車仔一格格，裝住好多款唔同嘅糖水，芝麻糊、合桃露、紅豆沙、西米露、寄生茶等等，各適其適，大部份有凍有熱，而且只係$20至$23一碗，相當抵食！易拉架上仲會寫住食材有咩功效。木瓜雪耳露（滋陰潤肺、補脾胃）：木瓜好大嚿，雪耳煲得夠淋，感覺好滋潤。香芋椰汁西米露（生津止喝）：好多西米，芋頭煲到溶晒咁滯，所以質地較杰，唔會太甜，我幾鍾意喎。最後仲有平氣止咳和養顏功效嘅蛋白杏仁露，仲加咗三粒湯圓和一隻蛋添！（每粒加$4 ）杏仁露磨得好滑，裏面都有蛋白，湯圓係芝麻湯圓，大大粒，另外隻蛋冇乜特別，飲完都覺得塊面滑左，哈哈！

秋意漸濃, 除了計劃到哪裡吃火鍋，到哪間煲仔飯最好，其實一碗熱呼呼的糖水，已經足夠把你由外暖到內，還可同時滋潤養顏、補血健脾胃。昨晚就來到位於炮台山蜆殼街的中式糖水小店，品嘗到價廉物美的手工糖水，絕對值得推介給大家。甘香合桃糊 $23加$4蓮子合桃保腦養顏, 一打開蓋就聞到香濃嘅合桃味，非常濃郁香醇，保持到傳統味道，加上一粒粒嘅蓮子，食落非常好味道﹗招牌芝麻糊 $23芝麻糊香濃黏稠，用料十足，芝麻糊都是經店主人手炒香，十分推薦!香芋椰汁西米露 $20加$4芋圓芋頭口感細軟，綿甜香糯.。西米煮出晶瑩剔透、粒粒分明. 加上芋圓煙煙韌韌的口感，真係非常絕配。

天后區好難得搵到一間糖中式水舖， 見到忍唔住去買咗三碗，但得我同老婆兩個人食😂養生合桃糊💲23又香又滑🤤， 合桃磨得好幼細😋。仲加咗兩粒芝麻湯圓， 大粒嗰啲乒乓波😨， 入面啲芝麻都好香。芝麻糊 💲23香滑幼細， 非常突出嘅芝麻味， 佢埋兩粒芝麻湯圓增加口感👍🏼腐竹薏米蛋 💲20份量充足嘅薏米，咬落去夠曬煙韌， 隻蛋仲大粒嗰啲湯圓好多。食完非常滿足， 啱曬想去水腫嘅女仔😏順帶一提， 湯丸逐粒計的， 真心大粒自己量力而為😂

今晚突然想食甜品，記起公司附近有一間糖水鋪，放工後火速前去買回家做飯後甜品。店舖雖然細小，都有幾個位可供客人堂食。是中式糖水舖，基本上有齊想食的款式。買了兩款：腰果露和蛋白杏仁茶。蛋白杏仁茶好正啊！杏仁香噴噴，甜度怡到好處。蛋白滑溜，增加口感，美顏功效一流。腰果露一樣好正啊！打開蓋子，腰果的香氣樸鼻，質感濃稠，有點起沙，每啖充滿腰果的脂香，甜而不膩，養生喎，吃多碗都可以啊！小店有如此的質素，相當不錯。