辦館 (The ONE) (已結業)

同朋友行完街想食少少野，飲杯啡～朋友就提議過黎呢度：）呢度人流唔算多，既有吐司蛋糕，又有果茶咖啡可以揀，店員仲好親切同友善添=）我地各自要左杯飲品，再share一份吐司~我要既呢杯係法式燉蛋泡沫咖啡， 朋友嘅就係黑糖焙茶鮮奶；）我呢杯咖啡嘅味道唔錯啵面層有一份薄薄嘅脆焦糖， 飲落都幾香濃：）我哋share呢份係芝士松露油吐司~吐司厚切，即叫即整，邊位香脆！！芝士同松露既味道好夾～仲有拉絲效果添啵！！！我地食開左個胃，仲追加左份朱古力棉花糖吐司xppp熱溶後既棉花糖加上朱古力醬，真係又香又甜又好吃！！

行街行到好累想坐低飲杯野諗起呢度雖然未黎過但經過左幾次今日終於試到了點左~鮮奶抹茶呢個黎到好靚未飲已經FEEL到抹茶好濃飲左啖真係無估錯奶味唔算重濃濃抹茶味啱晒抹茶控呀~熱情果梳打(仲夏限定~其實有個學名的,我忘記左~)呢個黎到都係幾靚有幾個顏色層次的飲落都OK熱情果味唔會好藥水下次可以再黎歇一歇

今日同亞囡去左尖沙咀The One行下，當然要搵個地方坐一陣，諗住搵一間飲品店，間間都好多人，上到5樓，見到辦館，見到好多位又好舒服。就試試啦！先去可以在櫃臺叫野，然後送上來坐位。比較有特色係咖啡上印自己選擇的字句，好有打氣的力量。心大心細之下😄，我選了 “Good Things Take Time”。👍仲有更特別的是可以在指定的Apps上，放自己like的圖像印到咖啡面上。特別！吐司方面，我選了咸牛肉芝士吐司。咸牛肉好吸引呢，芝士味香濃，配搭出來的味道也很夾，好味，好飽。

係THE ONE做完GYM, 想搵個地方坐下, 最岩就係樓下半開放式既小CORNER, 辦館。下午2點左右, 人唔太多, 自己隨便坐就可以, 係依度食野既人多數1-2個, 靜靜地飲杯野或者食件多士。日式冰滴咖啡 $58冰滴咖啡味道純粹, 唔算太濃但香味依然。MOCHA $42唔會太甜, 朱古力同咖啡比例BALANCE得幾好, 不錯。咸牛肉芝士吐司 $48咸牛肉份量好足, 面頭鋪滿CHEESE, 味道咸香滋味。黑松露油芝士吐司 $45芝士味焗到好焦香, 啖啖都食到芝士口感同香味, 黑松露味道相對冇咁突出, 但岩岩出爐脆邊點都好食~ 

☕️ ℂ𝕠𝕗𝕗𝕖𝕖 𝕨𝕚𝕥𝕙 𝕒 𝕋𝕨𝕚𝕤𝕥 @ 🌟 辦館《👽食神大媽食西餐》.💁‍♀️ 圖片展示美食為：Black Truffle Oil Cheese Toast HKD 45Red Beans Matcha Toast HKD 30Kyoto Grape Soda HKD 38Caramel Latte HKD 38Selfie on Your Latte HKD 18.👽 大媽今次黎到呢間又好玩，又好味，最近超有人氣嘅CAFE！😍 點解話佢好玩？文末話你知，依家先睇下佢D嘢食如何 😗.🧀 呢塊黑松露油芝士吐司，淨係望下佢上面D芝士有幾厚，再加埋D黑松露油有幾油，就幻想到有幾香幾邪惡啦 😝.🍞 抹茶紅豆吐司係食完鹹加D甜平衡嘅最佳選擇 😋 D抹茶醬好濃郁，紅豆好大堆，但唔會過甜。.☀️ 夏日炎炎當然要配一杯清涼消暑嘅飲啦，顏的靚靚嘅巨峰提子梳打非常吸睛，飲落仲要唔太甜好好味 😋.🤩 重點黎啦，飲品點解有得玩？因為呢度提供文字或者照片打印起指定飲品上面嘅服務！購買指定飲品，只需要加 HKD 18就可以將自訂照片打印起飲品上面！成個過程好好玩！大媽今次叫左焦糖鮮奶咖啡試下打印大媽愛犬嘅相，

假日去咗尖沙咀The One的「辦館」，嘆返個悠閒的下午茶～餐廳主打咖啡、茶飲、吐司、蛋糕等等輕食，週末放假同朋友來chill一下的不錯選擇鹹牛肉芝士吐司厚多士放滿鹹牛肉&芝士後烘烤至金黃色，多士好香脆，配上美味鹹牛肉同半溶芝士，飽肚又滋味花生奶醬吐司煉奶加花生醬簡直係perfect match，花生醬滿滿的覆蓋着吐司，充滿花生香氣，不得了哦凍泡沫咖啡牛奶及Espresso比例恰當剛好，口感順滑，咖啡味道濃厚醇香且突出熱鮮奶咖啡咖啡可以另加$10升級Coffee Print服務，可以將指定圖案或自選相片打印落咖啡表面，別具心思❤️

驚喜竟然在後🥰辦館我食過佢嘅主食，估唔到呢間係輕食，主要係蛋糕，多士同嘢飲。呢個地方真係好適合坐下傾吓計。雖然地方唔算大，但坐得舒服，鹹牛肉芝士吐司 $48邪惡嘅吐司，唔知幾耐冇食過鹹牛肉，加上拉到絲嘅芝士，點解可以有咁完美嘅組合。棉花糖吐司 $48其實呢個吐司興起咗好耐，但bbq咁多次我都未食過，所以就試吓去，啲棉花糖黐住嗰種感覺就好似芝士拉絲咁樣。榛子鮮奶咖啡 呢個真心要介紹，雖然佢咖啡平平無奇，但最出位嘅係竟然你可以自己揀相然後佢會印上去個咖啡面度佢呢個同之前我飲嘅任面咖啡有少少唔同，就係佢冇色素，主要係用奶同埋咖啡去整啲色出嚟，感覺健康好多。我即場影咗張相去佢印，好正呀。如果唔揀相可以印文字都得，選擇會唔會太多太正。

週末去尖沙嘴行街，下午唔太肚餓就去The One一間咖啡店食個輕食lunch。呢間cafe辦館位於The One 5樓，環境舒適好適合飲杯咖啡chill下。我地就叫咗一份吐司、牛角酥、兩件蛋糕同兩杯咖啡。-火腿芝士牛角酥🥐牛角酥焗得好香脆可口，食落滿滿牛油香🧈 味道同裡面夾嘅芝士同火腿好夾，做light lunch或下午茶都唔錯。-黑松露油芝士吐司🍞芝士份量好足料，切開有芝士拉絲效果，鍾意食芝士嘅朋友仔必點🧀 吐司都係即場即叫即焗嘅，所以食落熱辣辣夠曬新鮮呀👍🏻-北海道蛋糕🍰最後我地試咗兩款蛋糕，分別係抹茶紅豆蛋糕同柚子芝士蛋糕。柚子芝士蛋糕味道好清新，芝士味濃郁，唔會太甜。抹茶紅豆果然係無敵組合，味道好夾，但紅豆就略嫌有少少甜，蛋糕質感柔軟易入口。-嚟到辦館就當然要試吓佢哋嘅咖啡啦☕️ 我地叫咗鮮奶咖啡同玫瑰鮮奶咖啡。最特別係可以自選圖片印到咖啡上面，真係幾有趣😆 打卡必試呀📷

Lunch time要喺尖沙咀搵位食飯真係一大苦事，仲加上而家咁熱嘅天氣，都唔想喺條街度排隊。同同事嚟到The One，行吓行吓就見到呢一間位於商場一個比較偏嘅位置，主要都係輕食為主，啱晒減緊肥嘅我！🧀黑松露油芝士吐司 $45吐司即叫即做大概等咗10分鐘邪惡嘅芝士加上黑松露油配搭新穎落咗兩款芝士所以會有好重嘅芝士味仲要有拉絲嘅效果好食！🧂鹹牛肉芝士吐司 $48鹹牛肉三文治就食得多鹹牛肉配搭芝士真係第一次食鹹牛肉唔會太咸亦都唔會搶咗芝士嘅味平時都係食火腿芝士吐司原來鹹牛肉配搭芝士呢個組合真係幾好食🍇巨峰提子梳打 $38整得咁靚梗係打咗卡先啦巨峰提子味道剛好唔會過甜🍵鮮奶抹茶 $36 叫指定嘅咖啡仲可以幫你印字用嚟打卡影相一流抹茶味好濃郁唔會太苦但如果可以熱啲就好啦

最近天氣好熱，同朋友行咗陣街就決定喺附近搵間咖啡店坐下傾吓計，意外地發現原來The One五樓有一間咖啡店，人流唔多，咖啡都有唔少選擇，亦有提供幾款輕食，味道都唔錯㗎_黑松露油芝士吐司 $45餐廳有提供甜同鹹嘅吐司，今次試嘅呢兩款味道都唔錯，食落去好重黑松露香味，芝士仲有少少拉絲鹹牛肉芝士吐司 $45呢款都好好食！好欣賞佢哋嘅鹹牛肉分量非常充足，食落去好香口，下次有機會試吓佢哋嘅甜版吐司日式冰滴咖啡 $58上網見到好多人推介呢款冰滴咖啡所以叫咗嚟試吓，味道正常，小編覺得如果可以更濃郁酸味更加重會比較好玫瑰鮮奶咖啡 $38+$10 印花另外想打卡嘅朋友仔可以試吓佢哋嘅印花咖啡，有12款印花選擇，今次小編同朋友就揀咗enjoy every moment，圖案唔算話好出，另外佢哋仲可以印自己個樣，不過價錢就有唔同，有興趣請向店員查詢

<The One • 歇一歇😎>_尖沙咀LOF10 辨館 - 黑松露油芝士吐司$45 、棉花糖吐司$48 、Rose Latte $38 、冰搖蜜桃伯爵茶$38 _期待以久嘅F9 : The Fast Saga 嘅大佬Dom 約會🥰終於完成，作為為LOF10 嘅小fans ，嚟到尖沙咀當然要去The One 食返個吐司飲返杯野討論一下啱啱劇情🙈_The One 嘅LOF10 主要提供輕便小食同飲品，位置都幾便利，有時候行街行到攰都成日上去歇一歇，比個機會自己休息一下🤓_黑松露油芝士吐司：黑松露味香，配上芝士有咸香咸香嘅感覺，熱辣辣食，有種食緊小pizza 嘅感覺😌_棉花糖吐司 ： 鐘意食棉花糖嘅人類，絕對要試試，因為糖度十足配埋朱古力醬，正！😎_Rose Latte : 喺LOF10 Latte 系列真係好有愛🥰因為可以印正能量Slogan 或者自己個樣上去Latte 度，同自己打打氣💪🏻Rose Latte 玫瑰味夠重奶泡亦夠滑不錯，今次揀咗Good Things Take Time 😋鼓勵一下自己😚_冰搖蜜桃冰茶：炎炎夏日，面對住34度，飲住依杯嘢，完全喺可以下下

行完山頂搭巴士去中環，再坐天星⛴ 去尖沙咀食個tea☕️ 去到the One 5樓見到呢間辦館有輕食😋好似幾吸引就去試下。呢度係自助買完野食佢再送埋位，店員話 呢個牌既野飲可以印字/相🤩好吸引野食黎啦😍🥪 黑松露油芝士吐司$45🤩好香黑松露味，仲要勁多芝士，味道啱啱好唔會太鹹，芝士仲要超級拉絲👍🏻推❤️🥪 鹹牛肉芝士吐司$45🥰鹹牛肉鋪滿成個麵包表面，食落唔會好似平時食公仔麵咁鹹，調味啱啱好，再加埋啲芝士同埋烘底嘅麵包✨推👍🏻👍🏻👍🏻🍵 鮮奶抹茶$36💚 抹茶味好濃，面頭奶泡好滑👍🏻 仲要可以揀喺表面印字，或者download佢個app去upload自己張相印係個面，打卡一流❣️我揀左印佢預定既英文字😍靚🍹 冰搖蜜桃伯爵茶$38好清新嘅蜜桃味，本身我想叫少甜，但係店員話個甜味係來自水果本身，所以就冇得減甜💕結果又係超好飲唔會過甜，飲得出蜜桃本身嗰個味同埋茶味🤗💫 呢度嘅人流唔多，完全唔會有一種趕時間食完要即刻走嘅感覺

今日同朋友喺尖沙咀食完飯，之後冇掟去，諗住搵一間飲品舖飲一飲野，順便吹一吹水行咗去The One，本身諗住去樓下嘅台式飲品舖，點知搵唔到位，所以就上咗一層，黎到辦館見到好多位喎，咁就是但叫杯嘢飲坐下啦<柚子薑蜜$32>話說Fatbrown 近排啲氣管麻麻哋，所以叫咗杯柚子薑蜜，諗住潤一潤個喉嚨薑味都算重嘅，其實就好似柚子蜜咁樣，無咩特別30幾蚊杯，中規中矩啦不過夜晚可以坐到幾粒鐘，吹到10:00收舖先走，都幾爽嘅

次次行街行到攰, 都會中意去辦館坐下, 因為佢真係好就腳, the one, 美麗華同雅蘭中心呢啲平時去開嘅地方都有分店. 而且神奇地每次都唔多人. 舖頭都唔會理你坐幾耐. 係一個幾啱chill下嘅地方.佢主要食物係toast同cake, 都有好多唔同類型飲品. 每次叫嘅toast都唔會令我失望, 咖啡嚟講都唔錯. 反而難得一次叫嘅茶就真係好麻麻, 覺得嘥錢.我自己都買過佢嘅咖啡豆返屋企沖, 價錢適中而且好香, creama都好足, 拉花好正.Japanese Iced Hand Drip $58唔知係咪日式嘅關係, 個hand drip味道偏淡, 佢畀咁多冰我溝一溝就更加淡, 但係都ok嘅.Honey Ginger Pomelo Tea $32我會話衰過出邊餐廳嗰啲加幾蚊嘅薑蜜柚子茶, 起碼人哋有味仲會同你攪均. Corned Beed Grilled Cheese Toast $48試過佢嘅幾個toast都係覺得好好味, 烘得啱啱好跟住入邊又鬆軟, 仲幫你切埋.推薦: 🌕🌕🌕🌑🌑味道: 🌕🌕🌕🌗🌑價錢: 🌕🌕🌕🌑🌑服務: 🌕🌕🌕🌗🌑環境: 🌕🌕🌕🌑🌑地點: 🌕🌕🌕🌗🌑

2021年4月4日下午4:30行街行到攰，打算坐低飲杯野，於是揀左呢間小店。我叫左杯柚子梳打，正常。我先生叫左枝日本手工啤酒，佢飲左一啖後，我發現係過咗best before date😱，咁立即叫佢出去同個店員講。個店員答覆係:我哋查過食環，咁樣係無問題嫁！都仲食得！跟住就冇理我哋了.......我同老公都明白，過咗best before date 唔代表食物變壞，只係可能會影響口感，亦食得落肚。但作為食客，相信餐廳會提供新鮮保質期內嘅食品！個店員咁答，即係一早知情，點解唔事先同食客講聲？你表明左，大家願意明買明賣，成個感覺會舒服好多囉！我不認同呢間餐廳嘅做法！唔會推薦呢間餐廳！