美味坊

營業中

休息中

石塘咀熟食中心有間高CP值嘅餐廳——美味坊，除左固定餐牌，每日都有唔同嘅午餐menu 供應，價錢親民，而且好味道，今次叫左白汁煙肉火腿意粉同五香肉丁炒飯。《白汁煙肉火腿意粉》$44呢碟意粉好有兒時嘅味道，奶香濃郁嘅白汁，配上煎香嘅煙肉同火腿，味道豐富，意粉都煮到岩岩好，唔會過腍，令人食唔停。《五香肉丁餐肉炒飯》$44炒飯好有鑊氣，雖然炒飯偏濕，配上五香肉丁同餐肉粒，每一啖都有豐富的肉香味，而且份量十足，食得相當之滿足。《是日靚湯》（送）午餐除左跟野飲之外，仲送多一碗例湯，今日系青紅蘿蔔湯，相當之足料，平衡返多肉無菜嘅飲食。

位於西環石塘咀嘅一間熟食餐廳賣嘅嘢食好特別，好少熟食會有呢啲食物叫叫左個蕃茄紫蘇蝦仁意粉好香嘅蕃茄味，配上紫蘇醬，真係絕配呀同行仲叫埋個大奄列整要好好嘅手法廚師整得幾好，色水賣相一流高度推薦呢間餐廳

【街市大排檔】23/5/2022今日都算行運，話說早幾日發現 #石塘咀熟食中心 入面有一間幾多人食既檔口叫 #美味坊，當中有一張相係 #咖喱炸雞髀意，好似好正，所以就去試吓。去到睇個主餐牌，前後左右睇晒都搵唔到，唔通我睇錯🤔 正當落單時，店員同我講出面塊黑板仲有幾個 #是日午餐，我一睇見其中之一，就係咖喱雞髀飯😍坦白講，街市大排檔成日去，好壞參半，所以冇太大期望。#凍檸茶 幾好飲，都算有茶味唔會淡口，主菜隻雞髀真係正，皮脆肉嫩👍唔會變成乾柴🐔。 咖喱汁都好惹味，唔會水汪汪做得唔錯。唯一稍差係個飯，有一部分比較乾硬，可能煮得未夠透。原來仲有一碗例湯，以為飲品同例湯二選其一，都夠熱夠濃，好飲👍埋單$45，有飯有湯有野飲，算 #抵食 🤣#港飲港食

終於唔係菲臘牙科睇牙,去左再遠既港大睇,睇完餓到凹左,睇地圖最近石塘咀街市有良心食店,就係門口兩隻生果檔貓之間行上扶手電梯,上到哩間美味坊,地方係好細,等兩三張枱,睇下餐牌先...見到黑板上寫左有是日餐單,有西芹鮮菇肉粒飯,想食西芹但唔食肉粒,老闆知道立即表示可以幫我轉雞柳,太好啦,於是我有得食西芹鮮菇炒雞柳啦.個樣幾靚,西芹翠綠無根,雞柳炒得剛好,冬菇滑嘟嘟,係d 飯差dd,不過用蒸出黎d 飯都係咁上下啦,牙科診所冷氣好凍,飲返杯熱檸水先.......

好味又抵食，同埋又好傾。每日有6個餐的選擇，正。仲有其他選擇，都係嗰句，抵食。有女食客叫套餐，加油菜，可以食得健康！枱面同埋週邊未放咗唔少搓手液，方便自己清潔雙手。中午1點前人無咁多。

『熟食中心覓食・心機製作印尼炒飯拼雞肉串燒』✨美味坊, 𝑺𝒂𝒊 𝑾𝒂𝒏⠀⠀那天跟媽媽探望完外婆，在附近的熟食中心試了這間茶餐廳，價錢便宜之外份量也大，最重要是質素也不錯，頹食立即都感覺不太頹了！⠀⠀꧁印尼炒飯꧂⠀炒飯不會很濕潤，但如果更加乾身就好了！味道方面是鹹中帶一點甜的，還有雞肉絲一起炒呢。伴隨炒飯的還有兩串烤雞肉串燒‼️肉質嫩滑不會有雪味，加上沙嗲醬真的很惹味呢😚⠀𝑅𝑎𝑡𝑖𝑛𝑔: 7.85/10⠀𝑃𝑟𝑖𝑐𝑒: $46⠀⠀꧁秘製豬頸肉煎蛋飯꧂⠀相對印尼炒飯，這個就顯得有點普通了，不過上桌時有兩隻太陽蛋其實我是很驚訝的。豬頸肉肉質爽口，不會很油膩，不過秘製醬汁其實就是蜜糖汁，對我而言真的有點太甜了。而且它的醬汁很多，令整個飯的甜度都增加了⠀𝑅𝑎𝑡𝑖𝑛𝑔:7.45/10⠀𝑃𝑟𝑖𝑐𝑒: $42⠀⠀☕︎檸檬茶⠀這裡的茶底好像不錯，下次試試奶茶⠀⠀☕︎凍咖啡⠀咖啡跟平時茶餐廳喝到的不太一樣，有點偏酸的，不錯哦⠀⠀——————————————————⠀🌟推薦 ʀᴇᴄᴏᴍᴍᴇɴᴅᴀᴛɪᴏɴ⠀⠀⠀印尼炒飯⠀🤰🏻回訪 ʙᴀᴄᴋ ᴀɢᴀɪɴ? ⠀⠀⠀Yes⠀——————————————————⠀⚡美味坊⠀西

唔出名嘅石塘咀黃店💛💛💛隱身於石塘咀熟食中心之中本身諗住嚟食早餐嘅 因為佢個早餐b好出名點知過咗12點🤦咁我唯有試佢另一個名物啦就係印尼炒飯啦（$46配飲品）碟飯勁大碟應該有兩碗飯佢飯裏面仲有啲肉粒配埋佢個醬 成碟飯 真係可以食得曬🤤另外佢配左兩串雞肉炸到皮好脆肉好嫩另外叫咗個葡式雞扒飯 （$42配飲品）坦白講個汁就好普通但係個雞扒先至係出神入化外皮煎到極脆啱啱熟 所以非常嫩口同juicy高手呀👏👏👏同埋呢間 飯店非常抵食一定會再翻兜

西環想幫襯返d有良心又好食的小炒，原來選擇真係唔多。好好彩比我地搵到石塘咀街市內的美味坊，我住哩頭到廿幾年都係第一次去 (平時會直接去酒樓)... 之前見到d食評見到個印尼炒飯已經好想試今次我地仲叫左星洲炒米。午市套餐都係$42-46蚊，仲有野飲。兩樣野都十分好食，好大碟(下次我會叫少飯)，好有鑊氣。食左當自己去左一轉東南亞石塘咀街市d位其實spread 得好開，所以應該可以保持到1.5米距離，員工都有戴口罩，一定會再去。

//#黃店地圖系列間野叫：美味坊邊度黎：西環石塘咀皇后大道西470號石塘咀市政大廈2樓熟食中心C2號舖環境點：熟食中心的街坊風味 不過呢排都係盡量避免搭檯🌝：參與罷市 老闆娘派水派物資予手足▪印尼炒飯連餐飲 $468.5分你點估到港式茶記 會出現碟印尼炒飯至得架 梗係要試試佢 炒飯份量好夠 質感好濕潤 秘制醬汁絕對係未曾嘗試過嘅味道 鹹中帶甜 夾雜少少雞肉雞蛋同洋蔥 惹味香口 最估佢唔到係搭埋兩串雞肉串燒 仲要燒得好鬼正啊陰公 焦香帶微甜 加上少少沙嗲醬 濃而不膩 ▪早餐B連餐飲 (自選奄列+自製薯餅+厚多士) $388分個奄列好足料 有芝士火腿蘑菇 不過我唔好火腿 走左 估唔到佢咁嫩滑 生熟程控制得剛剛好 芝士有流心效果 車打芝士溝mozzarella 口感好正 個自製薯餅更加係力作 薯仔絲撈左少少麵粉 咬落煙煙韌韌 半煎炸唔會油淋淋 有種屋企嘅感覺 凍飲仲要唔洗加錢 呢個早餐絕對係物有所值 (供應時間0730-1200/2:30-3:30)

有日見到人story post咗呢間美味坊嘅早餐，佢話好好食，於是我就決定呢日上九半之前嚟到佢身處嘅石塘咀熟食中心去食個早餐lol同嗰個story作者一樣，我都叫咗個早餐B（因為好似好特別），侍應姐姐話要等20-30分鐘，我即刻「嘩」咗出聲，佢話因為所有嘢都係即整嘅，所以要耐啲。咁我上堂遲到都得嘅hehe，所以就照等～等咗15分鐘度就到喇～早餐B（$36）- 奄列（火腿／白菌／芝士）- 自製薯餅- 厚多士- 餐飲 （凍飲唔使加錢！）厚多士上面搽咗牛油，都幾香～重頭戲：奄列同自製薯餅！奄列入面有齊火腿、蘑菇、芝士，雖然未至於話拉絲，但芝士味都有，其他料都好足，相當高質架！自製薯餅好大塊，比起傳統嘅薯餅，佢仲加咗麵粉之類嘅嘢，所以啲薯仔粒會無咁易散開～味道好似冇乜，所以加咗少少鹽，好味！本身睇個menu覺得呢個餐嘅份量好少，但食到一半就覺得飽，所以$36係唔錯嘅價錢！會去開附近嘅你都不防試下呀！menu：

石塘咀街市熟食中心内其實有唔少餐廳，但早餐時段的價錢其實間間都差不多， 但有一間就明顯貴d, 平均貴２至５蚊一個餐，但亦不乏捧場客, 客人眼睛係雪亮的，所以估計應該有d過人之處咁我就試下啦！都有幾多選擇，當然唔會選擇普通的一丁麵或者煎雙蛋之類，我試左個$36的早餐，有薯餅，多士奄列同熱飲，首先薯餅系刨絲出來再用心機煎成的，係誠意之作，薯餅好似歐洲的瑞士薯餅rosti，個面煎到少少脆，而內裏軟軟帶丁點濕潤，當然唔係麥記炸果d行貨!而奄列好足料，有芝士火腿蘑菇，我原本以為只任選一樣做餡料，原來係有晒三樣, 令口感更加豐富，而形狀同生熟程控制得宜，芝士仲有少許流心效果，我覺得出面中高檔餐廳或甚至酒店級數先會做到，所以呢檔野簡直系熟食中心內的hidden gem, 值得推介！

已經食左好多年嘅市政熟食餐廳，由剛開業開始已經經常光顧。唔係一般嘅市政餐廳，除左普通茶記野食，都有好多新其他西式野食，每日都會有5-6款午餐，餐牌好特別，係由老闆娘每日決定不同餐單同埋會寫係黑板。開業多年，坐得係到嘅都係熟客，偶然都會打招呼吹下水。除左食食物嘅味道，最重要係食呢份一情味，老闆娘差不多每個客人都記得，間中都會吹兩句水。今日就食左個回鍋肉飯，肉就肥瘦分明，有口感微微辣，奶茶一如既往好飲，每日嘅醒神之選。

車爸爸棚靚牙由上月開始進行大型美化工程，所以近來成日會喺西環附近搵吃早或午餐，之後便到靚仔表弟牙醫處進行美化工程。上次重溫了周記，這天想吃茶記，車爸爸就帶咗我去石塘咀街市的吃午餐。餐茶都係例牌凍檸茶少甜和熱奶茶，味道尚算不俗，而且喺呢度飲零舍有風味！(凍檸無須加＄超正)車爸爸點了謝安琪餐！哈哈即係B餐$34囉，只有一個通粉就係鮮茄菠菜牛肉通粉。湯頭十分清甜沒有一絲味精的蹤影，而菠菜同鮮茄則十分鮮嫩，車爸爸話牛肉亦都十分不錯，沒有乸成沒味的死屍肉。而我就點了徐濠縈餐A餐$30，我就比較豐富喇！呢個餐有一個單餸出前一丁麵，可以揀雞絲，火腿，腸仔或餐肉，而我就要了最邪惡的餐肉出前一丁麵。最正嘅係出前一丁哪個麻油包，係擺在檯面任大家隨意去取好慷慨呢！不過又好好笑喎，個麵底未落麻油前竟然係福麵的味道，但係落咗麻油之後又變番出前一丁呢味真搞笑！而我嗰餐點解豐富呢？因為仲會有一個煎蛋同埋厚多士，太陽蛋煎得完整盪漾，蛋味都算不錯。牛油厚多士就略為烘得不夠香，可幸夠脆身，但看見厚厚的多士，又確實真係幾開心嘅^_^

今日再去石塘咀圖書館，今天是星期二，圖書館終於開門了。美味坊的煎豬扒用蒜頭和香茅調味，煎豬扒還有肉汁，不會太乾，味道都算不錯。厚多士還有一樣外脆內軟，但炒蛋也有少許炒得過火了，比較乾身和不夠滑。所有食物都是熱的，茄汁豆質量都算不錯，可惜茄汁豆是凍的，如果熱的吃起來應該不錯的。

今日想去石塘咀公共圖書館，去到才發現星期一休息...美味坊的吉列魚做得都算鬆脆香口，而且魚的肉汁還在，旁邊的醬汁酸酸的。厚多士外脆內軟，牛油都算多，腸仔應該是廚師腸，蛋也煎得都算不錯。所有食物應是即製的，上檯時還熱的，可惜凍奶茶的茶味、奶味不濃，但冰不多。