漢發麵家 (大南街)

營業中

休息中

呢間野味道一味！食材又唔靚，服務態度又唔好！份量又細，比bb食咩？又加價都幾密，係咪想追番d租金？唔明佢既食物有咩吸引到人黎食？堅既，真係都唔會有下次，請都唔會黎！

過深水埗買電話卡，點都要食下豬膶麵既，地點唔算太方便，不過十二點幾都已經唔少人排隊了。坐低之後就叫左碗豬潤麵同熱奶茶！個面一黎，馬上飲頭啖湯先，清甜，少少薑味，個人鍾意薑味，所以覺得可以重手d。飲完頭啖湯，咬一口豬膶，夠厚，有咬口，夠爽！再食啖面，面就淋左少少，個人鍾意爽身d。最後飲啖奶茶，爽！好耐無飲過奶茶了雖然覺得杯奶茶d奶可以重d，同d茶味可以濃多d，但都已經好過好多茶記了！間舖都應該幾多熟客，見老闆娘係咁同唔同既人都有兩句，又幾nice咁，加分啊

因為豬瘟搞到好耐無得食豬潤 有日心血來潮走去睇，終於有返豬潤麵。即刻衝入入面食本身淨係食豬潤麵見格黎嗌左個凌魚波幾吸引 所以又跟住叫豬潤麵：豬潤有5-6舊大大舊，食過咁多間入面最好味凌魚波：第一次試 都ok

下就3點半，無需排隊，可惜已經賣晒豬潤，令到🐯要選擇其他，叫左豬手撈粗麵，配上一碗清湯。清湯我有嘗試過一啖，小小嘅味精味但係好有蝦子麵嘅味道。而豬手我無嘗試，問🐯係咩味，佢答我係好味😂唔似屋企平時煮既豬手淋啤啤，好有咬口，淹得好夠味得好夠味。而我就叫左個炒牛肉公仔麵拼煎蛋，一上枱見到個出前一丁已經知道好硬，明白好多餐廳既煮法都係一分鐘到，唯有上枱後等多兩分鐘先食国。第一次食炒牛肉，唔單只係漢發即使係其他茶餐廳都冇見過有炒牛肉，多數都係沙嗲牛肉或者鮮牛肉配搭公仔麵。炒牛肉嘅味道有啲似小菜炒牛肉嘅味道，唔太靮，但係牛肉味道唔係好出。個煎蛋就非常之靚。唔同其他要排隊名氣高既餐廳，漢發麵家係名氣同食物質素相等，而且侍應嘅態度都好有禮貌，環境裝修亦都唔錯。相信會再同🐯嘗試吓個豬膶麵

呢間漢發麵家位於深水埗大南街，位置唔算好就腳，好耐之前朋友車過我去食豬潤麵，係好好食既，今日去開深水埗諗住再食，點知因活豬供應問題，暫停出售豬潤麵咁我同朋友山長水遠黎到，又難得夠早唔洗等位，冇理由唔食野吧！ 咁見都唔少人推薦西多士，就一人叫左一份，一份配糖漿，一份配煉奶，share. 咁佢餐牌寫明要等15-20 分鐘既。我地就飲住奶茶等西多，奶茶算係正常好飲。但個西多士就唔正常了！ 是痴線的！首先賣相好吸引！ 是脹卜卜，圓咕轆的！我就先食左配糖漿既，相比之下個包既蛋香味出d, 超級鬆軟既包，好似食梳乎厘咁既口感，回味無窮。之後再食埋半份配煉奶既，呢個就再甜d, 個包味冇咁出，但個痴線程度更上一層樓。我就覺得我食既次序係正確既，如果大家都想食曬兩個味，就記得先食糖漿，後食煉奶！

中午諗唔到食咩，所以是但入左間茶記食野，間茶記比較舊式，有好多唔同既港式料理，例如紅豆奶茶冰、炸脾、西多士、撈丁、豬手飯等等。豬扒飯 $55一開始以為豬扒飯，d豬扒會好少好細塊。但黎到真驚喜，大過我塊面呀媽呀，而大得黎仲要係厚切豬扒。食落唔會好似平時咁乾淨淨，食落d似好嫩好滑。所以豬扒控可以試下我朋友🙃😆熱擰蜜 $18杯檸蜜係正野，檸檬係新鮮既，因為平時好易飲到伏野，檸檬又苦又澀又霉又爛又剩，唔知係咪reuse reuse再reuse😨,今次尼間係用靚野。不過都係果句，比左18蚊你，係咁上下😁你比杯霉野我，我實唔肯過你。

今日專程出深水埗食豬潤麵，可惜豬潤缺貨😭聽店員講，最講豬潤都缺貨，就算有得賣都得好少貨😟無豬潤就食牛肉麵，牛內好淋係新鮮肥牛，好食👍🏻不過我今次想讚個茶底，我地叫咗一杯凍檸茶一杯凍奶茶，兩杯茶味都非常濃郁但又唔會有澀味，係真正嘅港式茶餐廳茶底！奶茶嘅花奶同茶比例剛剛好，好滑！檸茶檸檬新鮮，大杯到滿瀉咁濟。每杯$19，價格中等但品質非常高！

星期六一早要出去長沙彎整野、記得有同事話過深水埗有間餐廳食豬潤麵好好味、不過佢都有提醒最近豬肉供應問題、暫時豬潤停售！可以試下佢個豬扒同牛肉、都話唔錯。見早早地（早上10:30）可能未必要排、就去試下啦😋😋黎到門口、貼左大大小小好多明星合照、係味真係咁好味、試下就知😆😆😆大約11:00到達已開始要拎籌等位、茶餐廳格局、都係快食快閃類型、所以等了15分鐘左右就有位。一貫扮懷舊冰室的裝修、鋪位不大、坐位比較擠迫、要背貼背、肩並肩的坐著。雖然坐得不算舒服、但門口派籌及店內寫單送餐的服務員都好好態度。澳牛特式服務係度係唔會搵到😂😂😂沒有套餐供應、一律散叫。除了水餃製作需時、兩碗麵及奶茶轉頭就送到。豬扒煎蛋米 $49首先隻煎蛋、半生熟蛋黃、但係煎到散左、唔算脆邊。豬扒係厚切的、算幾大塊、唔知係落梳打粉太多還是貨源問題、肉質過鬆過軟、又或者我唔識欣賞、唔似食緊豬扒。無牙婆婆食都唔成問題😂😂唔知係味諗住客人食豬扒同蛋就夠飽、米粉既份量非常之小（可能我大食😂😂）淨水餃 $37大大粒水餃、材料有蝦、木耳、豬肉。蝦夠爽口、豬肉沒有肥膩感、木耳爽脆。整體算對得起個價錢。唯一不合格的是、包水餃功夫不足、有幾隻

這間明星茶餐廳如果你係星期六日泥食，基整上都要排一段時間。我自己會平日12點前或1:30後去食，避開排隊既時間。呢度最出名既係豬潤麵，但因為最近活豬供應緊張的問題，豬潤暫停供應。但其實除左豬潤麵，其他食物都好好味。我自己最鐘意就係鮮牛煎蛋麵，漢發既鮮牛係我食過最好食，牛肉一點都唔鞋，有咬口，好味另外還叫了一碗豬扒煎蛋面，豬扒份量很多，吃下去有酒香味，也是十分推薦的一道菜。這裏的炸雲吞和西多士也是十分推薦的，唔可以加單所以要叫就要叫埋，但這次沒有叫下次再分享。

當深水埗 維記豬潤麵 質素每況愈下... 同區嘅 漢發麵家 輕鬆奪得「豬潤麵」名店第一把交椅！豬潤 比全盛時期嘅 維記 更鮮更潤更勝一籌, 厚切朱潤烹調火喉剛剛好, 回味無窮!! 但湯底較清, 難比當年 維記 濃濃嘅豬潤香; 可能因爲咁所以湯底冇加薑去僻除臊味, 但卻又少咗層次感矣.... 配角牛肉始終係配角, 普通到唔知點形容; 下次決定要午餐肉配豬潤, 以濃肉味撞清甜, 應該唔錯~~ 港式奶茶 合格以上, 但又未至於典堂; 特別一提：辣椒油超級香而又不太辣, 加少少調味係好嘅, 但喜歡清淡湯味嘅朋友就免了.

今朝同同事去漢發食早餐，本身係想食豬潤，30度天氣由地鐵站行去行到勁熱，去到先知因為冇活豬供應所以冇豬潤食，即刻想轉場，但係一場嚟到都係入左去。食佢其他嘢，普通嘅麵嚟講唔係平，亦唔係特別好食。份量係好大所以食到好飽，但係冇需要既話冇嘜必要嚟咁遠食。

琴日放假同朋友去左深水埗試呢間近期好出名豬潤麵一去到門口已經見到超多人等緊🤣🤣搞到我好期待😆不過大熱天時等位都幾辛苦 想食嘅朋友可以簡啲閒日時間去☺️我本身唔算好中意食豬潤，嗌左個豬潤+牛肉米粉一泥到 真係哇左出泥！！點解雙拼都咁多舊😂😂佢起碼6 7舊半隻手掌大嘅豬潤😱仲要勁厚身 食落好爽口 唔會好粉 ,另外個牛肉係滑牛泥 好淋 我好中意👍🏻湯底亦唔會hea ,好濃郁而且食完唔會口渴👍🏻呢個西多士係第一次落單嘅時候如果食嘅就一定要叫埋先 因為佢冇得加單我自己就麻麻地呢個西多士 🙈我覺得好似濕左水淋左嘅面包咁 😂不過都可以一試

呢間餐廳位於深水埗，但唔係近黃金嗰頭，而係近布街，附近唔多餐廳。望到門口就知值得期待！午餐時段有多過10個人喺門口，而且外賣都有3,4單，可見餐廳非常熱門。最岀名嘅係豬潤麵，所以叫左一碗，再加牛肉。叫左麵生，而且豬潤每舊都好大，食落啖啖肉，亦同一般嘅豬潤唔同，非常爽口，無腥味。牛肉就正常啦！食完就明白點解會吸引到咁多人啦！另外叫左一份油占多。牛油同果醬嘅份量剛好，多士烤得香脆，非常可口。配埋檸檬可樂，一個字，爽！

終於嚟咗呢個鼎鼎大名嘅漢發麵家，一入去坐低個格局好似普通茶餐廳咁，完全想像唔到佢之前係點樣樣。食咗佢個馳名嘅豬潤麵，啲豬潤真係好厚又肥美厚得來又啱啱熟唔會太un，啲湯底都唔錯，唔會有渣或者有腥味好似另外一間咁反而啲面就普普通通有啲熟得滯林得滯，但係總括而言啲豬潤真係冇得頂個人認為就咁叫豬潤麵有啲漏，可以叫潤牛麵應該會好食啲，下次再試總而言之就係極度推介呢一間！以後帶女朋友都會嚟食呢間嘅豬潤麵！！！

This restaurant is really nice. The pork noodle here is the best in town. The fried fish ball is also very nice. They’re like wonton egg noodles, but thicker. I’m not sure if I tried pig liver before and I don’t think I will be ordering that again haha. It had a bit of a metallic taste and it was really dense and pasty. The flavor was too strong for my liking The beef was actually really good. Even though it’s not fatty beef, it was juicy and not tough.