添記法式三文治

營業中

休息中

有日專登行去渡船角買黎食本來都覺得幾好食既~法包烘得外脆內軟,餡料塞得滿滿的但食完番到屋企就肚痛,唔知係唔係食左條法包既關係,但唔敢再食

Tiffin之前走左去添記買包包,由九龍站行過去都算ok,無想像中咁難搵。去到門口見到掛左個"稍候"牌,幸好等左一陣老細就開門,入到去第一時間order個大法包。睇住老闆整包,都好多肉喎;等候期間就飲住冰凍菊花茶,因為呢度無空調,入面其實都幾熱下。等左一陣,包包出爐,老闆就加入蕃茄、紅蘿蔔絲、青瓜同調味料,新鮮熱辣拎上手,好正咁!!!一出門口,唔等喇....大啖咬落去!清脆"shock"一聲,真係好香脆,味道帶辣,幾特別! 雖然包入面有三樣肉,食落又唔係好分得出,不過加埋就好味,夠晒質感,難怪咁多openricer推薦!老闆又的確好人,我識分扎肉同豬手片,但另一樣就唔知,我八卦地問老闆呢樣係乜野肉,老闆都好樂意回答,原來個款係就嚼肉=)個包去到灣仔都還算香脆,baby都話好味,不過新鮮整好時當然更加好!!

有日行過呢度，叫左件法式三文治同一件蒜蓉多士做lunch。我只係叫左個細既($16)，但一D 都唔細。麵飽烘得外脆內軟，入面夾左鹹豬手片、扎肉、醃左既蘿蔔青瓜，但我覺得肥肉太多！另外要即食，我食左半份之後，另一半份已經開始硬身(唔外脆內軟)...件蒜蓉多士，蒜蓉味唔重，反而似牛油多士，不過都係好脆的。

本想趁車品品結業之前試試慕名已久老闆娘的手勢, 但原來店子於星期日休息, 所以吃了閉門羹. 需然趕著看電影, 但實在不想隨便吃些沒水準的東西, 突然想起於戲院附近有美味之越南法包, 就二話不說立刻起行(都幾遠下…). 因為趕時間, 所以決定帶走一邊睇戲一邊食(係咪正先!?) . 怎知於漆黑一片, 鴉雀無聲的戲院裡, 咬下法包那“sharp~”的一聲, 實再太石破天驚了! 我想整個戲院也能聽到那香脆的聲音. 添記的法包十年如一日的保持水準. 麵包香脆, 自製的嚼肉又滑又咬口, 還有那塗麵包的肝醬和配料蘿蔔青瓜, 全都是完美配搭. 在此有一個提議, 如加上元茜味道將會更加豐富(我曾於加拿大某越南餐館吃過, 好0岩feel架!). 也建議各位最好即買即食, 因放久了麵包會變韌. 需然此店位置隱閉, 又不太就腳, 但還是全港必試的食店之一.

當咬一口添記既三文治，第一個感覺係好脆，熱但係又有青瓜感覺涼涼，有點中和作用。扎肉很香，牛油混入沙律醬既醬有牛油既香又有沙律醬醬甜味。加上一點點胡椒粉令到個三文治更野味。很著添記既三文治令我很懷念在雪梨讀書吃法式三文治做午餐的日子。唯一可惜係住得遠唔可以常常吃到這既三文治。

上星期俾人激親捉左朋友仔陪我大食一餐以紓發心中怨氣黎左八文樓首站當然要試添記既法式三文治啦兩個人share一客大既但聽老闆講因為法包加左來貨價所以而家要30蚊一大個雖然貴左但餡料都仍然係多啖啖有齊脆(法包),爽,酸(青瓜同蘿蔔),鹹(豬手同扎肉)等等既味道口感好正連平時唔多食飽既朋友仔都話好味道不過講真都食得有d狼狽可以有下次註：等食時睇佢d雜誌介紹先知原來佢d扎肉係自製唔怪之得咁好味啦!!

星期五晚去佐敦理髮，之後想不如到堂記食腸粉啦。致電我的導盲犬小Q(老公)後順利找到，因時間尚早，只有我一人在座，叉燒豬腸如之前一樣好味。一碟腸粉又怎能滿足為食小頭呢，一輪內心交戰後，決定再到添記食法式三文治。法式三文治有四種肉(豬腩、豬手、扎肉、嚼肉)，番茄青瓜蘿蔔絲和秘製醬汁。兩種size: 大($28)、小($15)小的都夠(始終是晚餐下集)食，即叫即做，保證新鮮，只是稍等一會不算很慢。法包烘得脆脆但不會乾爭爭，四種肉各有特色鹹香好味，好食過鬼佬subway三文治。一晚吃了兩款美食，感覺滿足又幸福，不一定要大魚大肉，美食是不分貴賤只需好味。走時經過堂記，已經高朋滿座。

依間鋪我細細個就食.以前十幾蚊個覺得好貴,but 好飽.到依家我二十幾歲,十幾蚊唔再係一回事, 但係覺得一個再滿足唔到我.它的好味之處不用再談,但你進入後看見入內的古老焗爐,你不免會有一種懷舊的感覺.

午餐吃了意大利菜，晚餐想食番中餐平衡一下。突然好想食魯肉餃、皮蛋及陳皮紅豆沙，所以便帶BF拜訪老闆娘。途中穩約記得營業時間更改了，但完全記不起星期天是休假的！吃了閉門羹，便想起在附近的越南法式三文治，由於很久沒吃便急不及待提議走路過去。低估了路程，由大角咀行去佐敦…其實真係好遠。要了1個大的分吃，三文治依舊熱烘烘、外脆內軟，豬手的咸香、蘿蔔絲的微酸及青瓜的清甜爽脆配合得天衣無縫，加起來只有好味2個字。BF要了‘39’黑啤，還是酒味較淡、麥味較香的‘33’最啱我飲。吃罷覺得好滿足，但感覺上都係1人食1人個好d，下次一定要再來自己吃一個小的。在等烘麵包的其間，有位女客人來買外賣麵包。她強調是明天才吃的，問老闆該怎處理。老闆說現在不烘熱麵包，吃前才烘便可。又仔細的解釋現在將所有材料放在麵包中，惟獨問她青瓜是否需要分開包。因為若青瓜放在包中一起烘的話，熟了便不爽脆影響口感，所以大多分開包。但女客人卻覺得青瓜放在包中較方便，老闆看似不太願意(不停重覆會影響口感)但還是照客人的意願做。我覺得老闆對食物味道、口感的堅持才是大家喜歡吃他的三文治的主要原因。

呢間野真係開左好耐由我10歲個陣已經係度無諗過,隔左咁多年無去個價都唔係貴左好多但係都一樣咁好食個次叫左一條三文治由佢個度返到荃灣都仲係脆既只怪佢唔係係荃灣,唔係我一定日日去食!唯一唔好既就係師傅手腳比較慢真係心急想食既人就比較慘....

如果唔係睇左食評都唔知道係舊樓林立的渡船街八文樓裡，竟然有呢間越南法式麵包店，嘩原來呢食店開左二十多年。估唔到係晚上七時多仲要排隊買麵包。麵包即叫即造，麵包冇失望，果然脆夾香，餡有好多料，我叫左個細，下次都係叫個大的法包，正！

同gf黎呢頭搵食, 帶住好大的期望黎到呢度, 入到間舖只有一個客...叫左個大法式三文治$28, 同蒜蓉包$4.蒜蓉包ok, 不過又唔係話好好好食, 就只係ok囉, 如果pizza hunt的toppings加上佢的底好能會好正!另名個三文治, 老細問我開幾件, 我話唔知, 佢就話兩個人開兩件食囉, 分兩個紙袋裝.初初食無咩特別感覺, 只覺一般, 但咬咬下, 味道上出現唔同的層次感, 入面的材料如咸豬手,扎肉,嚼肉(豬肉和雞潤造的) ,蘿蔔絲,蕃茄等酸菜...時而散發著材料自己的美味, 時而混和著其他的材料出現新的驚喜, 味道愈食愈出...食完之後良久回味...^^所有包都係即叫即製即焗, 好得!...臨走時店內已經有三組客...食完後, 短期內唔會令人好想再黎, 但佢係果種突然間令你好想食的店!

自從有一次經過肚餓叫左一客法式三文治食之後我就愛上左依家經過個頭都會去買來一句: 未食過唔可以叫自己食家!

添記法式三文治是我至愛的食肆！平民化的親切感覺(環境以至老闆的態度)，超平宜的價錢，還有絕頂的味道，完全沒有不愛它的理由。特別推介六大元的蒜蓉飽，吃過後，你必然會稱之為香港蒜蓉飽之冠！那種鬆脆的口感，撲鼻而來的蒜香味，鹹味適中卻齒夾留香蒜蓉味道，叫人愛不釋手。另外，龍蝦片雖然較少人留意，卻絕對值得一嚐！

行過喱度懷念過去,醒起有間好食的法式麵包店,終於試到喇!叫左個小法飽,肉類餡料有四款:咸豬手,扎肉,嚼肉,五香腩肉,其餘的還有青瓜,蘿蔔絲,蕃茄等酸菜,好豐富.法包表皮好脆,一流,唯一美中不足的是老闆好似太過"資悠", 手腳幾慢.可能習慣左法式o既生活.