泰金國 (已搬遷) 新店位置

推介：⭐⭐⭐⭐⭐ 正望住個鋪頭可能唔講真係唔小心就行過左唔好睇佢鋪頭細細間，野食選擇勁多，每樣都好高質星期五晚8點幾去到好命等左10分鐘左右蒜蓉包好脆好香熱辣辣燒牛肉係全晚焦點！！！！$70食呢份燒牛肉，我諗全香港冇第2到搵到，重好食過据扒咖哩炒蜆正常發輝，送飯真係食十碗最後係個沙冰，係真係估唔到佢咁綿咁濃呢間應該係我食過香港性價比最高既泰國野但係間野小本經營，d野食黎得慢，人手唔夠，鋪面都唔靚仔。但如果你同我一樣，搵緊好食泰國菜，咁一定要黎試下消費：340 兩位 dinner

經朋友介紹嚟到九龍城食依間泰國菜，估唔到又低食又有驚喜。七點黎到已經要係門口排隊，等左都要半個鐘先有位。一坐低就點左幾樣至愛先黎個皮蛋蝦餅，即叫即炸，啲皮蛋仲要係有小小流心，配上特製泰式酸甜醬，味道剛好生蝦夠哂大隻厚肉同凍，不過意想不到是，店鋪唔會浪費蝦頭，會先炸好再伴碟不過食蝦頭時記得要小心，唔係會比殼整親燒牛肉，依個值得推介牛不會太乾身，而且份量多，醬汁有小小辣，配埋酒飲一流黃咖哩炒蜆蜆肉大隻鮮甜，建議可叫份蒜蓉包點咖哩一齊食我地仲叫左雞翼，火車頭炒金邊粉，明爐魚，菜，獅蚶，飲品，大家掛住食都忘記影相，食左咁多都唔洗一千蚊，真係好抵食

呢間野絕對係我同班frd子嘅食堂，今次我地就9個人殺去食啦。 叫左12道菜： 1. 生菜包 （唔記得影）- 菜一如既往好fresh，肉少辣好香口2. 燒牛肉 - 半生熟燒牛肉，加埋濃味嘅汁，食到停唔到口3. 燒豬頸肉，香口Juicy 唔會太乾4. 蝦餅魚餅 - 熱氣野配啤酒最正呀5. 咖哩雞 我覺得油左啲啲6. 蒜蓉包 - 夠脆，唔硬，蒜香味八分7. 泰式鳳爪 - 最鍾意佢啲洋蔥香菜8. 炒金邊粉 - 炒得夠乾身，味帶少少甜，成晚最搶手9. 獅恰 - 試過就好了，唔鍾意血淋淋嘅感覺10. 炒飯 - 加左香葉，令炒飯更香11. 生蝦 x2 - 唔駛講！新鮮好食，一秒清哂呀12. 冬蔭功湯 - 酸辣適中

同男朋友即興搵食，難得平日不多人等位，5分鐘便可入座。店舖不大，約有30座位，通道較窄，空間有限，建議前往搵食既吃貨，不要大包小包。點餐後約5分鐘，便來了燒牛肉，賣相吸引，肉質ok，但有些根位，蘸醬後更惹味，是性價比高之選。炸蝦餅香脆可口，佐酒一流，不過店內沒有賣酒，店員請我地自行到附近便利店買啤酒美味的留待最後，燒雞翼係我每次光照都必點，即叫即燒，焦香味令人想起兒時到郊野公園BBQ的美好時光。肉質依然嫩滑，充滿肉汁，必食!

泰金國個門面到店內裝修係完全唔起眼基本上你行過都唔係留意佢，就算留意到都未必會想入去食，完全唔起眼，不過如果你同我一樣唔怕麻甩地方精緻，呢到既食物絕對唔會令你失望，所以依家耂多左好多人排隊。。我平時食，必叫 燒豬頸肉，即叫即燒，燒得岩岩好，肉質爽嫩唔肥膩，一d都唔會乾曾曾而且個秘製醬汁勁加哂分，鍾意食辣既朋友一定好鍾意 馬拉盞炒椰通菜，個菜好有鑊氣馬拉盞夠惹氣仲有燒牛肉 蝦餅同生蝦仲要價錢好抵

第一次寫comment , 因為真係太太太嬲因為女朋友鐘意,所以有時會去食宵夜, 起初一兩次去,老闆(or 太子爺) 吾係度, d 泰國姐姐 仲幾好禮貌, 但去第3/4 次, 老闆(or 太子爺)出現了!!!!見佢黑口黑面, 落單冇咩耐性 , 就快快手落完單食完野走, (途中見過佢一次沖波羅冰 沖多左隻杯滿得滯 竟然用 spoon 自己 lam 走左多餘的,再俾我,我成杯野吾飲) 但有一次真係頂吾順佢d   態度, 果日係平日 我大約十點入去 門口冇客,亦冇waiter 係門口招呼 ,我見有空枱味行入去, 個老闆(or 太子爺)係另一邊轉出泥 好大聲 咁講  出去等啦.   我個下心諗 XXXX, 跟住1 分鐘佢俾番同一張枱我...無錯,佢d 野係幾好食, 但佢老闆(or 太子爺) 侍住自己好生意 就睇吾起d 客,  佢人格十分有問題,完全吾想俾$佢賺, 何必俾$受氣?

泰金國 @ 九龍城人真係好奇怪 … 瘦田冇人耕, 耕開有人爭。記得泰金國啱啱開時隨時入閘…嗰時又唔去, 係見到多人排先心思思🙂🙂 終於呢晚見無乜人排隊就去試下。首先被一位唔識講野(態度非常差)既哥哥帶入去, 安排左一個靠近大閘既位置。望清楚就見到大閘條坑又濕又髒😒😒😒…我最怕呢D情況不過又冇其他空位…唯有頂硬上😫😫…呢個場係偏污蹧😒(我會週身痕😒) 唔週圍望點野食先…見到餐牌上有個泰式醉貓炒金邊粉…我問醉貓係乜…嗰位哥哥就答話醉貓係辣肉碎豆角。😋😋咁就呢個啦…加多個炸蝦餅同蒜蓉炒椰菜苗…飲野就青檸梳打炸蝦餅都可以, 有蝦味不過唔算太彈牙。椰菜苗就唔錯, 好嫩同唔會太油太鹹。而個金邊粉真係有驚喜, 好乾身, 又唔黐埋一齊…味道亦都好好味👍👍 唔計環境…食物質素唔錯。埋單$2XX...算可以

朋友話底食，第一次去，去到門口有7,8個人等位，跟住見有條黑口黑面、唔知待應定老板嘅大哥出左嚟，以命令語氣問左客人兩句，態度極之恶劣，我地想攞位都無理我地，唔知點解客人又會忍氣吞聲。心諗入到去坐低咪仲受氣，都係走算了，就算好食都唔代表大晒，反正九龍城食泰國嘢大把選擇。今時今日咁嘅服務態度，喺唔得㗎希望如果老板睇度post,就糾正下D員工嘅態度 ，但如果嗰條黑口黑面嘅大哥係老闆，就自己反思下，有朝一日，一定嚇走晒D客人。

自從有次家姐帶我地全家去食過一次之後，我地全家都好鍾意食，差唔多一個月都會全家總動員黎食一次！呢間鋪幾乎冇乜裝修，好up dup，行過都唔會留意到既一間鋪，但係佢永遠門外面都有一條長龍等緊位～佢係夜晚6點開始開鋪，但通常5點9去到就已經開始要排隊😂試過7點去到係要排成一個鐘！建議大家想食既就早d去啦！1:泰式冬陰功湯入面有菇同大頭蝦，酸酸辣辣好好味，平時我好憎飲冬陰功湯，但呢間個味我好鍾意飲！2: 燒牛肉～我地好鍾意食呢個牛肉，幾嫩有牛味，我地每次都唔夠侯，所以都係一次過叫2份～但試過一次佢係燒得有d失水準（但都唔會難食）所以都幾講運氣架😂3: 咖喱炒蜆～蜆好大隻，我地最鍾意食佢既咖喱汁，叫個蒜蓉包沾個咖喱汁好好食！（留意返佢呢間係冇薄餅靜係得蒜蓉包）但係蒜蓉包都好有蒜蓉味，好香口！4: 無骨鳳爪sauce好辣好辣！唔食辣既人士唔好叫～鳳爪幾好食，但佢d配菜番茄西芹洋蔥加埋d汁一齊食我仲鍾意食！5: 蝦餅～個人覺得普普通通，唔夠其他鋪頭整得好食～6: 泰式炒椰菜～好好食！夠鑊氣！同係泰國食既係一模一樣～雖然佢冇咩裝修，老闆態度又唔係幾好😂但因為佢食物泰好食，而且價錢一d都唔貴！我地都係

跟隨女友黎到呢間臥虎藏龍既泰國菜，一黎到都係要排隊😪入到去d裝修個d都好差，不過d野食真係好味😂特別係個牛肉真係好正，份量都還可以，每一次黎到都叫兩份黎食。個牛肉好嫩，有肥個d就更加正！所以黎呢間野一定要食牛肉！同埋個冬陰功湯係有驚喜既，本人本身都唔鍾意冬陰功陣味但呢間既冬陰功我反而覺得都幾好味，唔會好怪陣味，係幾好飲既。唔知係咪就返香港人既口味呢😂但係呢間既服務態度就差d，d服務員好兇狠😂應該係老細黎。因為好味所以都會食😂

喺九龍城果堆巴士站一落車, 見到對面泰金國門口排晒長龍好似好勁咁, 我又排下先😂門口附近就係燒雞翼既爐, 難怪香味傳到咁遠, 吸引左一班餓鬼😂個泰式酸辣鱸魚都唔錯架, 幾醒神開胃不過唔比你點第二次菜或者黑你面就有點兒那過..

九龍城系泰國菜餐廳嘅集中地，有時真系多到唔知揀邊間好。朋友介紹嘅呢間泰金國小鋪，平得黎又好食，真系有驚喜！生蝦多數都系食泰菜必點嘅一味菜。呢度嘅生蝦好新鮮，師傅仲好細心幫d蝦挑埋腸，等你食得安心又放心，點埋佢嘅特製醬汁真系一絕。師傅連蝦頭都會炸埋擺上碟，鐘意食蝦頭嘅可以食埋佢架！我地仲叫左碟獅蚶，份量都幾多，而且隻隻都好新鮮架！至於個炒椰菜苗炒得好岩岩好，小小辣辣地，加埋d蒜頭～黃豆醬～送飯一流！個炒金邊粉就不過不失啦！整體黎講呢間野都唔錯可以一試嘅

朋友介紹來, 話6,7點已經排哂長龍, 我地算早去排, 等左幾個字入得。朋友推介泰式生蝦, 果然有驚喜WOR, 蝦身做刺身, 蝦頭就用來炸, 蝦身其實無特別, 蝦頭才是重點, 炸到勁香口, 仲要成個頭都吞得, 正!炒椰菜苗就正正常常, 辣辣地幾惹味燒全翼都唔錯, 好大隻, 夠香口芒果沙冰又係好正!但D野食都等好耐下, 應該人手不足吧。`

今次返到嚟九龍城終於食返泰國菜！朋友介紹話呢度嘅泰國菜非常出名有好多人都專程依度食就算排好長龍都要等去到嘅時候的確見到有好多人大概有10幾個人喺度等緊但係因為朋友book咗位 所以我哋人齊嘅時候已經入得啦！我哋今次三個女仔叫左好多野食🦐生蝦刺身呢度嘅生蝦刺身我覺得麻麻地size唔係好大而且佢都冇乜蝦味落單嘅時候佢都冇講幾多錢但係就覺得唔係好抵🐚咖喱炒蜆依到既咖喱炒蜆咖喱味都唔夠而且啲蜆肉冇蜆味雖然佢一啲沙都冇但係唔值得叫🐱泰式醉貓炒金邊粉覺得成餐飯最好食嘅就係呢個 啲粉浸得啱啱好然後炒嘅時候都仲非常有口感醉貓意思係會辣辣地令到成個金邊粉更加好食🐴馬拉盞炒通菜馬拉盞炒通菜係食泰國菜一定要嗌嘅嘢呢度嘅炒通菜炒得啱啱好 勁好食 食完贏一碟之後我哋三個女仔重要再encore!🐷泰式燒豬頸肉泰式燒豬頸肉都係好好食非常出名 啲肉勁有爽口 而且跟埋嗰個汁都非常之出色！🥖蒜蓉包依到嘅蒜蓉包就麻麻地一啲都唔脆而且冇乜蒜蓉味剩係得牛油味🍉西瓜沙冰🥥椰子汁沙冰另外飲品都係偏甜因為沙冰所以都幾解渴唔知係咪因為一路都好多人話呢間野好好食然後對呢間餐廳嘅期望都好高但係覺得唔係咁好食。。。

呢間餐廳都有食過三四次，第一次係因為啲朋友介紹好味同埋夠平，於是之後帶埋阿爸阿媽嚟食。點知阿媽作為一個食家，竟然話啲生蝦唔新鮮，又話啲嘢食無鮮味，最後來到今次自己食多次，就發現阿媽嘅味覺先係最可靠！呢間鋪頭walk in要等好耐，所以我每次都WhatsApp留定枱，要人齊先入得。今次平日夜晚七點半去到，都見到已經好多人排隊入面座位唔多，環境簡陋，不過都闊落，唔會話容易撞到隔離枱泰式醉貓炒金邊粉都幾辣，自己都食得辣嘅但都有少少嗆口，入面有配肉碎同蔥黎炒，個味道好夠好濃味，金邊粉都炒得好爽口，唔會濕漉漉，成碟菜好惹味泰式馬拉盞炒通菜味道較鹹，個醬汁食到有蝦味，但菜葉比較少，好多時候食到啲木枝，或者係一啲乾晒嘅菜葉泰式蒜蓉包聞落幾香，但無乜蒜蓉味，淨係食到幾濃嘅牛油味，包面亦唔夠香脆，成塊包都係軟腍腍嘅泰式咖哩炒蜆啲咖哩好黏，咖喱汁唔夠香濃，蜆肉冇乜沙，但同時亦都冇乜咖喱味，似係煮熟啲蜆肉先再放落啲咖喱上面泰式燒豬頸肉就幾好食，燒到啲豬頸肉嘅邊香香脆脆咁，咬落啲豬油香出晒嚟，只係上菜嘅時候溫度都爭小小唔夠熱。另外嗰醬汁好襯個豬頸肉另外叫咗餐單上面冇嘅生蝦，一盤大約有七至九隻，視乎每隻嘅大細。