波記 (已結業)

在西環石塘咀山道下,有間極有個性的麵店,叫做波記.每日黃昏才開門做生意,有時仲不定期休息.連電話都無個.唔係有性格叫咩?有性格,我鐘意.波記就好似一個難以捉摸,周時掉低Prada的"惡魔",電話都唔開,走去海邊聽浪的女仔.越難得手,就越想得手.半夜三更踏足這個八十年前,曾是紙醉金迷之石塘咀,塘西風月一早不留痕,只有半夜路邊無人之蒼涼感覺.山腳下的波記,零星食客,正在享受其燒"鵝"瀨和雲吞麵.波記最多人叫有兩味,燒"鵝"瀨實際上係鴨.馮京昨馬涼,方力申變万刀甲.只係多年來食客叫慣燒鵝,索性叫燒鵝算數.燒"鵝"當然唔係自家燒,外來貨色.唔係甚麼超班貨,不過一樣皮脆,肉味濃."鵝"油滲進瀨粉和湯底內.不可多得的美味.有時神來之筆,會比隻"鵝"髀你.此店的自家製雲吞,蝦同豬肉七三之分,蝦肉甜爽唔霉,好此道者不能錯過.人係犯賤的,太易得手,往往唔會去珍惜.難度越高,的確會吊起條癮.無論吃,和同異性交往,都係一樣.波記,就是其中之一.