棋哥燒鵝餐室

營業中

休息中

話說今天4月8號同自己父母去天后吃當時下午1500，吃個下午茶，知道燒鵝出名，便叫3個下午茶燒鵝賴粉餐， 餐來了，一碗係比左啲皮 比左啲下欄位我吃一碗係骨多個皮一碗就有肉，有小小骨，可接受此時，向女店員要求更換2碗 / 叫師兄軌番啲肉比我們， 女店員不禮貌地話， 我地公司規矩係咁， 有小小肉，有小小骨。吾喜歡可以比$58 叫正價， 我們火上來，並且同佢理論，佢話叫正價就可以，不能更換，一係取消，一係改其他食品。 佢咁既態度係吾尊重同侮辱我們， 我們同佢再講，吾係$58既問題，你態度好差，我們投訴你，我們打電話給你老闆，佢話 老闆係咁分付落， 你即管打， 佢話冇得更換， 我相信一個老闆吾會叫員工咁樣對客人， 態度十分差， 叫我們叫正價餐就得，幫我地吾到！咁講， 呢間舖頭學咩人做下午茶， 食物質素吾係用時間而定，吾係用午餐正價，吾係用下午茶而訂。 由於此員工態度很差， 並冇誠意做仼何道歉及協助， 此事已交給相關部門處理。從新， 天后此店開的第一天，由朋友介紹去吃下午茶， 當時食物質素 同肉類好好，同今時今日 已今非昔比 ！

係天后住左咁耐最差既體驗！難得放假無去街晏晝諗住落街食野。行過見佢門外裝潢還好入去試下入去見人山人海椅棹擺位密密麻麻環境擠迫！之後安排我去坐一個窗邊位此位置根本沒有通道即使我學會了縮骨工亦難以進入就坐！更發現店員未抹檯佢唔係岩岩食完有人走未抹門面光鮮店面以經咁廚房就環境之差真係令人不敢恭維令我諗起政府宣傳廣告既一句說話「表面乾淨完來暗藏邋遢！」唔通佢想我用條褲幫佢抹枱！見到咁既環境我緊係轉身就走啦，點知我走果刻比位店員怒視口中念念有詞。雖然我聽唔到佢講咩但我知道比人鬧緊唔通入到去唔放低錢就有錯？如果佢唔改變偉生環境我唔會再入去被辱罵。

之前撞到個朋友,佢岩岩就係棋哥買完外賣,我地寒暄幾句,佢話棋哥啲燒鵝唔錯架於是有日係銅鑼灣諗唔到食乜就行左去天后食呢間餐廳非常旺場,而且價錢都合理原隻燒鵝髀飯呢度最出名就係食燒鵝佢就真係成隻髀咁比你食咬落去，有一種好特別嘅煙燻味,燒鵝皮又薄又香,肥瘦適中梅子醬唔會太甜,點少少黎食,別有一番風味叉燒乳豬飯乳豬皮好脆身,肉質帶點肥又嫩滑叉燒叫左肥叉,個人口味愛吃肥叉,不過就算叫左肥叉都唔會話淨係得肥肉叉燒幾爽口

早排去筲箕灣搵食，友人提議我試下位於寶文街海峰中心地下嘅「新光燒鵝餐室」，據說店裡的燒味，水準唔錯，尤其是燒鵝，不但皮薄肉嫩，而且肉汁豐盈，深受一眾街坊歡迎。不過由於當日夾唔到時間，所以未有到訪。後來聽朋友講，原來餐廳喺天后同灣仔都有分店，取名「棋哥」。咦，呢個名有聽過喎，據說這間燒鵝食店，人氣極旺，門外經常有食客大排長龍。趁這天剛好要來天后交收，辦完事後，就順道過嚟外賣兩個燒味飯盒回家，同小鬼兩個撐檯腳。餐廳門口貼有外賣燒味和燒味飯價目表，定價一目了然，由最平嘅單拼燒味飯 $48，到最貴嘅原隻燒鵝脾飯 $103。飯可免費轉瀨粉或米粉，配老火靚湯則需另加 $8，配咖啡或茶加 $5，凍飲就加 $8 。點了棋哥燒鵝飯 ($53)  同棋哥叉燒飯各一。燒鵝飯會附送酸梅醬，打開飯盒，燒鵝賣相不俗，鵝皮略帶油光，外皮燒得均勻，既脆口又薄身，酥香不韌，帶迷人煙燻焦香，而且熟度掌握得剛好，鵝肉多汁，肉嫩不攝牙，絕對有名店水準。菜心新鮮爽甜，配飯食可減低油膩感。至於棋哥叉燒飯 ($48)  方面，叉燒燶邊位雖然唔多，不過擺放得都幾整齊，厚切大件；而且醃料不會過鹹，肉質嫩滑，咬落具彈性，叉燒汁分量亦剛好

香港其中一個特色-燒味飯!其實我係一個飯桶,所以由細到大我都對碟頭燒味飯情有獨鍾，最鐘意用D燒味汁同薑蓉撈飯，燒味嚟講我通常會叫叉燒、燒鵝和燒腩。今日冇食lunch，放工後好肚餓，去到天后等緊朋友前，行過呢間燒味店就已經俾佢掛係度一隻隻肥美嘅燒鵝吸引著，再望一望原來就係我一直想試嘅棋哥燒鵝餐室，還掂今天我地係要食個快飯，就來一個燒味晚餐吧！餐廳同一般茶餐廳格局差不多，Menu亦好清楚列明各燒味飯、單拼、雙拼、轉米粉，瀨粉嘅價錢。好耐冇食過燒鵝，正在為揀燒鵝定燒鵝髀焦結嘅時候，朋友突然話今晚食豪D來一個燒鵝髀飯吖唔該！話晒一場嚟到好啦就食豪D！一上枱那隻大大嘅鵝髀已經好吸引，未食已經聞到陣陣「煙燻」香味。急不可待已經要咬一口，皮夠脆口，鵝肉味濃郁而好有咬口感, 肥瘦適中完成唔覺得油膩。加埋多汁薑蓉，一個人K.O成碟飯完全沒有難度！下次自己開飯可以嚟呢度買個外賣試埋燒腩仔同叉燒

一般乖嘅小朋友會奬佢食隻燒鵝髀⋯⋯但自從有毛有翼，乖唔乖都可以奬自己來一髀吧！想食燒鵝，就係時候去棋哥喇。皮脆肉嫩嘅燒鵝可以話係燒味之中嘅冧巴溫。雖然眼見棋哥啲叉燒，燒肉甚至油雞都好吸引，但今個晚餐都係嚟個原隻燒鵝髀飯啦！飯嚟到大大隻髀童叟無欺。咬落去，有一種好特別嘅煙燻味，唔通就係傳說之中嘅荔枝木？嗰個香味好特别，真係喺其他地方甚少食到！燒鵝皮又薄又香，鵝肉肥瘦適中有咬口，夠味得嚟又唔會話咬落成口油。成日食冰梅醬都係得個甜字，但呢度嘅冰梅醬就真係酸甜適中，就算俾多三碟都可以一滴不留咁清咗佢！飯要多汁，佢就真係另上一碗汁俾你。食真啲，唔係求其俾個甜豉油你，真係有燒鵝油香嘅燒汁嚟架！好滿足嘅一餐！

最近食西式食店比較多，想轉下口味食中式食店，我非常熱衷吃廣東燒味，為了滿足慾望，上網得知棋哥燒鵝餐室創於1976年，打正旗號的燒鵝專門店，使用的食材都很新鮮，食物質素很好，很受顧客喜愛，享受廣東燒味的滿足滋味。 店入面裝潢很有格調，地方不算很大，環境舒適，乾淨整潔。今次我打算外賣，下午時段都擠滿人群，門口巳聚集很多的食客。 食品價值已貼在門外玻璃窗，十分吸引途人的目光，客人可以方便留覽，選定食品才進入店舖。 餐廳門口的另一邊可以看到食品款式掛在廚窗及廚師預備給客人的燒味。 我點選了二款廣東燒味，分別是燒腩仔及叉燒。 另外，職員跟據不同的食物給我不同的醬，燒腩仔配芥末醬，而叉燒配醬汁。 職員包裝燒味後，我帶走燒腩仔及叉燒慢慢品嚐。 燒腩仔 燒腩仔皮好脆，肉質鬆化， 一口咬下去，咇了肉汁出來，帶點脂肪，口感更佳，保留鮮味又不會過韌，不會太多油膩，配芥末醬好夾，容易入口，口感衝擊味蕾，令人食指大動。 叉燒 馳名的棋哥叉燒，叉燒帶出蜜汁味，咬下去有點脂肪最正，肉質鮮嫰，保持結實甜美，煙靱有咬口的感覺，同一般食到的不同，單單看樣子已經令人唾涎，讓人回味無窮。 棋哥燒鵝餐室（天后）

【棋哥燒鵝餐室】分店最近開到銅鑼灣，並以燒鵝專門店自居，令筆者留下印象，還聲稱「since 1976」；字面理解始創於 1976年，或老闆炮製廣東燒味的經驗始於1976年。可能筆者孤陋寡阌聞，之前未聽過棋哥大名。今日行完年宵，發現天后都有間，於是就入去試下。門面黑底上印上英文名字，非常搶眼之餘又有能夠營造出時尚形象，跟傳統的燒味店有明顯分別。一隻隻燒鵝整颁齊地排列在燒臘橱窗前，賣相吸引，望落外形飽滿，與燒鵝名店有得媲美；難怪人山人海。可是甫進入店內，其實只是地道茶餐廳格局，而且相當擠迫。店員又隨意加枱，令枱之間距離只餘下不足一英呎，但是店員仍然在這一英呎空間來回穿插，真是坐得不舒服；而且服務態度一般、落單又唔清唔楚，明明講乳豬双拼，總是回覆是否乳豬；反覆幾次才落啱單，不管味道多好已經不想再來。餐牌非常簡單，就是一系列的燒味飯，再加上茶餐廳必有的常餐及茶餐。以必食的燒鵝飯為例，一碟58元，可免費轉瀨粉等粉麵，還包一杯熱飲，在天后區來說算是經濟實惠；而且燒鵝飯（包飲品）賣這個價位實在抵食。【燒鵝瀨 $58】要求燒鵝及瀨粉分開上，呈上的更是燒鵝脾，鵝皮略帶油光，賣相不俗。 只不過原來徒具賣相

第二次光顧天后棋哥燒鵝，汲取左上次嘅教訓，我同老公今次特地輕裝上陣，因為座位真係好逼，冇地方俾你放外套放袋；上次食燒鵝雙拼湯瀨，唔知係咪浸住湯搞到燒鵝皮唔脆，今次我地學精左，叫佢另上。我點左份燒鵝拼叉燒湯瀨，一黎即刻試塊舊燒鵝，點知⋯皮唔脆的⋯肉係厚，亦唔算肥，但皮唔脆嘅燒鵝邊好食，果陣荔枝木煙燻味都補救唔到，我仲特登另上諗住俾多次機會佢，原來另唔另上結果都係一樣。叉燒唔算差，但唔夠鬆化，上次食好d。老公點燒鵝拼燒腩湯瀨，燒腩仔皮就好脆喇，肉質都係唔夠鬆化，同埋建議切細舊少少，切得太大舊喇。

因為前幾日先光顧完中環某出名燒鵝店，今日中午時段行經天后見棋哥燒鵝嘅價錢要比中環嗰間貴兩蚊，好奇心驅使下就行入去點咗燒鵝瀨套餐。套餐$58包一杯熱飲。燒鵝同瀨粉份量都多少少，不過有肉嗰邊都幾肥，另一邊就差唔多全骨。燒鵝有好濃嘅煙燻味，皮唔係太脆，瀨粉就正常。在天后區收$58 我會有期望，所以我只幫襯這一次。

其實本人好小打食評！不過今次真係忍無可忍！呢間野味道係幾好，但真係某D位做得太過份！我叫左個燒鵝瀨，好公道，味道係幾好，但成碗燒鵝無件係肉，全肥！$58蚊八件全肥鵝！真係好抵囉！

中伏中到咁都係第一次！燒鵝肥仲多過肉，D肉韌得黎仲要生生地。同佢哋講換返D食得入口嘅就立即黑面又諸多籍口拒絕，$108買個燒鵝脾飯連一舊可以放入口嘅都冇，服務態度好似欠咗佢全家咁，被虐狂歡迎內進。

今日行過諗住買兩隻下庄返屋企，叫個收銀阿姐一隻斬一隻唔斬，睇吓有無偷工減料，殊不知返到屋企兩隻都斬晒，只留咗隻髀唔斬，哈！詐傻扮懵！嘩！我頂！個面就擺得好啦！但一揭開個面，底下全部頸同唔係下庄位來，唔怪得叫佢唔好斬佢扮唔知囉....仲有隻鵝髀削走咗一邊肉，見晒骨，嘩！唔怪得成隻下庄可以放得晒落個咁細既外賣盒度啦，咁攪法你就唔好分咩上下庄啦，直接一個例牌價算啦～其實味道係唔差既，但咁唔老實點可以再繼續幫襯呢令我諗起台北果間鴨肉騙，不過人地起碼無偷工減料，只係昆你叫多啲，而家呢間燒鵝店可以叫做鵝肉騙了棋哥！做生意唔係咁架！天后水魚多？！莫非啲鵝頸有其他用途？！

啲燒鵝又肥 又冇肉食 真係乳鴿都多肉過佢 ，價錢又偏貴 ，今次真係中伏 ， 我地叫左四碗賴粉 加 半隻燒鵝 燒腩仔 一碟油菜 ，佢正係得菜心 ，菜心都好難食 ,燒腩仔 同燒鵝就好肥 ，食两舊經已好口渴 ，唔知係味精重定太鹹 ，返又屋企飲左幾支水都仲係好口渴 ，真心講 好難食

燒臘，以前是代表「喜事」、「幸運」的食物，古有婚事切乳豬、升職就「斬大舊叉燒」加餸，現在，它是「佬味」的代名詞，所謂「男人的浪漫，豆腐火腩飯」，燒臘在不同年間陪伴我們多個歲月。我喜愛燒臘，而燒鵝是最令我又愛又恨，它的脆皮、鵝油是何等吸引、惹人咬佢一口可是市面上可說是良莠不齊，外皮唔脆又有，瘦如柴枝又有，更甚的是有鴨扮鵝添，想食靚鵝都唔係咁易，但唔試又點得世間靚鵝，今次我就去那間以燒鵝做生招牌的棋哥闖蕩一下。一次就試兩樣，燒鵝拼乳豬就最夾架啦，一上桌就見到大大碟，最是滿足。食就梗係食出名的燒鵝，皮好脆，食下去真是有炭烤的香味，原來炭烤的鵝肉子除了有鵝油的脂香味道，還有一份香烤甜味。但旁邊的酸梅醬好甜，唔太夾那麼出色的燒鵝。另一邊是乳豬件，老實說切得好幼，比較奇怪，食左一件乳豬，感覺脆而不鬆，肉質較硬淨但有豬肉味，這貨色一次就夠。鵝係得架！其他咪唔得囉⋯⋯