星林居酸辣米線餐廳

營業中

休息中

作為遊客最愛既香港食肆，食米線食到咀刁既香港人當然都唔執輸。響旺角睇完波，就直接搭車黎尖沙咀食碗米線回下氣啦！😋🌟 明火小鍋米線 $76（配菜：豬軟骨、豬腩肉、豬紅、蘿蔔）［少少辣+普通酸］食米線最重要除咗係米線，湯底都係決定食唔食得晒嘅重點。個人認為，普通米線同好米線既分別，在於兩字：平衡！湯底濃而不膩，配菜各有風味，各有特色卻不互搶風頭。該店共有39款餸，要試曬都真係要返一頭幾個月。米線一黎到熱辣辣，即刻飲返啖頭啖湯先！個湯飲落濃郁，酸度辣度互有平衡，飲完一啖又一啖！最重要係飲落唔會太咸，唔會口渴。配菜黎講，本人最愛當然係豬軟骨。豬軟骨煮得岩岩好，肉質唔會太硬太老，軟骨亦唔會過曬火，食落肉軟、骨脆，值得一讚。而蘿蔔可以話係面類既測試菜式，一試就知龍與鳳！今次既蘿蔔不但本身清甜冇渣，而且吸收左湯底既精華更是入味。豬腩肉亦做到肥瘦均勻，唔會太厚難咬開。豬紅本身已經有味，配搭湯底既味道相當唔錯。涼拌米線 $52 （配菜：炸醬、雞中翼）［小小辣+普通酸］涼拌米線無曬肉碎，所以就自己加左炸醬😋米線我亦叫左煮淋d，將炸醬撈勻食、真係一流🥹🥹🥹好好食！雞翼$10後講有2隻都相當抵食，而且雞翼

中午同同事去咗尖沙嘴一間明火小鍋米線食lunch。第一碗碗米線配料有金菇菜、芝士腸、豬潤。我覺得呢個組合好新鮮，金菇菜爽脆，芝士腸嘅味道香濃，豬潤又滑又嫩。個湯底都好鮮甜，同埋好適合唔鹹唔淡嘅我呢個口味，由上湯、酸菜、芽菜、韭菜配搭而成。第二款米線配料有豬軟骨、牛展。豬軟骨嘅質地有啲彈牙，同埋牛展嘅肉質鮮嫩，食落去好滋味。個湯底亦都唔錯👍飲品係檸檬蜜。好醒神同埋唔會太甜，有啲微微嘅酸味，好消暑。我好鍾意今日嘅食物同埋飲品，明火小鍋米線真係好有創意，用咗唔同嘅配料，令人驚喜。如果大家鍾意呢食米線，就一定要嚟試試！

熟悉既味道，第一次食星林居講緊都十幾年前，當期時認識星林居既人一定多過譚仔，行過星林居一定唔會陌生既就係佢個大大張有幾抽獎牌獎杯既廚師威水照，米線衝出國際佢好似第一人。重臨星林居，地點非常就腳，金馬倫道地鐵站B出口，一出咗行前少少就見到，見到個燈牌寫住丁榪星林居就係，樓梯上3樓。沿樓梯上會見到好幾張威水照，原來韓國節目有訪問過佢poster有埋韓文，衝出國際。餐廳座位唔算多，可以自己搵位，枱頭有點餐紙，職員會留意你點完嘅時候主動埋嚟收張紙，態度不錯。一上菜好澎湃嘅米線，小窩米線$35，每樣菜$6-$15不等，想食豬紅可惜無，唯有嗌豬皮，豬皮份量好多，可以吸收晒米線嘅湯底都不錯㗎。仲有另外一樣必食嘅蘿蔔，大大件嘅蘿蔔，清甜無根，棱角被磨平既蘿蔔足以證明煲到好入味，非常之正。小窩湯底肉碎足料，食晒啲餸到最後都仲有肉碎送米線，米線偏淋身，以前都係咁㗎，以前嘅味道。食小鍋米線一定要配返杯凍飲，要飲檸檬茶，唔吝嗇嘅檸檬片，超過半個檸檬，茶底濃，甜到剛剛好，凍熱一樣價錢，絕配。餐廳仲一路播住懷舊嘅音樂，係我嘅年代，感恩佢一直都在，得閒都會來支持下，地點方便，價錢相宜，不錯。

記得以前尖沙咀返工 每次想食米線必定諗起星林居基本上個個星期都嚟食小鍋米線好鐘意呢度既酸辣湯底夠酸今日出開尖沙咀即管去懷緬一下一諗起星林居嘅酸辣米酸已經流口水明火小鍋米線(上湯，酸菜，芽菜，韭菜，小辣)雞中翼 $10 豬軟骨 $15 豬紅 $6 蘿蔔 $10魚腐 $7實在太多野想食 叫到好大碗一如既往 叫左小辣小鍋米線 湯底好濃郁滷水雞翼 豬軟骨 肉質軟熟 好入味 豬紅 蘿蔔都係必叫之選明火小窩米線 $35(上湯酸菜,芽菜,韭菜，小小辣)牛展 $15 紫菜 $6 雞翼尖 $6 油麥菜 $6朋友都大讚 滷水雞翼尖 牛展 都好入味 酸酸辣辣好開胃⭐️⭐️整體來説，店內裝修冇大變化，食物係吾錯，平日下午店內坐滿晒人，估吾到咁多年都keep到咁旺場

星期6夜晚7點坐低～等到8點食得～好味！唔係漏單喔～全場平均等30分鐘先有得食。一碗麵價錢～坐左個半鐘。。如果你係約咗朋友而想傾耐啲嘅話，呢度絕對係你嘅好地方～

食物基本上無乜問題，只係耐唔耐就錯下單咁，湯底味道水準不穩定，有時好食，有時又唔多掂，叫辣就唔比辣，要唔辣就死去比勁辣，成班都發緊夢，仲要唔比換，但最大問題係班行屍走肉嘅樓面，個個都好似智力有問題咁，眼神空洞，十問九唔應，我入咗去成二十幾分鐘都未點到餐，佢如果可以炒曬班樓面換過一班，咁基本上已經可以成為一間比較正常嘅食店,但偏偏係要走騎呢路線😡，總括呢講，響呢度食嘢難以搵到一種作為顧客及作為一個人類嘅尊嚴，對佢哋呢講同餵緊豬無分別，

好耐冇係尖沙咀收咁夜，尖沙咀勝在周圍都係人，咩都有得食，收工食個快飯就簡左星林居米線！♥️ 冬菇腩肉腐皮酸辣米線酸度、辣度任你選擇！中意食芽菜既我，仲要簡多芽菜，正呀！冬菇濃湯超入味，腩肉口感實在而嫩滑，渾上湯底辣得好正！腐皮簡直是米線拍檔，細嫩幼滑，完美填滿我的肚子。♥️ 蘿蔔豬紅豬大腸酸辣米線荽茜控！愛荽茜既你必定滿足，多荽茜。蘿蔔冧得好入味，咬落好軟熟、豬紅大大件而滑溜，份量挺多，豬大腸口感實在，沾上湯底，超正呀！♥️ 凍檸樂兩個都叫凍檸樂，一啖飲落去鋸哂！配酸辣湯底，簡直無得彈。

星林居係我每次到尖沙咀必食嘅米線，係心目中頭幾名不過服務態度差就出晒名，唔好抱期望會好聲好氣serve你🤣🤣裝修係偏懷舊風，連播緊嘅歌都相當有味道🤭當時聽緊羅文—激光中，有啲客人跟埋個beat一齊唱😂😂明火小鍋米線 配 紅腸 $35 + $6食米線我好睇重個湯底同麵質，佢個湯做到好出色，酸辣得嚟帶點甜味，好開胃！亦比咗唔少配菜，重口味之選😋至於呢度嘅餸認真麻麻地，份量又少，所以我都淨係揀左一樣餸，專食佢個小鍋米線～如果你都係好中意飲湯，食濃味米線，呢度好適合你👍🏻有其他追求嘅就去第間啦😂

尖沙嘴食咩都好貴，想搵間餐廳平平地食一餐都唔容易。今日小編就幫大家搵到一間平價米線舖，平平地食一餐之餘仲係韓星同款餐廳添😋😋🍲雲南小鍋米線米線好大一碗，湯底可以自選辣度同酸度，飲落都幾惹味，入面嘅肉碎增添咗湯底嘅鮮味🐷🐷米線都係可以自選軟硬度。小編加咗豬腩肉($10)，腩肉只係普通嘅邊爐豬肉片，冇提前滷水浸過，有啲失望。想用學生優惠嘅話要係落單前向職員出示學生證，攞學生優惠嘅點餐紙先可以享有優惠㗎！

食緊米線果陣，咬到紙皮叫佢地換，待應話係豬軟骨碎，我叫佢對下顏色都唔同，待應發脾氣堅持話係肉碎又黑面，好驚新果碗比人加料搞到食都食得唔安樂，食凈好多😖😖味道都差左好多，得個甜字唔酸唔辣以後唔會幫襯，我朋友之前食過之後肚痛，我都以為佢係咁啱姐，點知到我都係咁，諗住食一個懷舊嘅味道，搞成咁真係好失望！

今日有事去尖沙咀，趕時間諗住喺地鐵站附近揾間粉麵店，上OpenRice揾咗金馬倫道嘅星月居。中午時間12:45入座，當時餐廳未滿座，落單後半個鐘碗米線都未嚟，催完之後1:30先嚟，仲要侍應阿姐拎到嚟問我洗唔洗整番熱，我估應該岀咗碗米線但冇人拎嚟搞到凍咗。因為趕時間唯有直接食其實仲有杯飲品係到食完都冇嚟。。。米線味道普通，服務極差，隔離枱都一路催直情話唔等直接走。其實食米線都係想快靚正，冇諗過會食到一肚氣

我出嚟尖沙咀食米線，一定係去星林居，屹立左喺尖沙咀咁多年，質素保證我自己最鍾意食呢度嘅蘿蔔，保證鮮甜，多汁，而且唔會有筋，我每次嚟都一定會點㗎！🤩另外食辣米線，梗係要加紫菜啦，索晒啲湯汁，非常之美味！我今次仲加埋腸仔，有返啲肉類落肚，感覺上比較飽足，又唔會好濟🥳最後加埋個凍檸茶就十分之完美💯，解辣一流，你杯凍檸茶簡直就係香港既味道，但係味道偏甜，如果唔鍾意飲咁甜嘅朋友仔😜就記得嗌少甜啦😆

明火小銅米線（豬大腸、蘿蔔、肥牛 中辣）星林居嘅湯幾惹味、易入口，開頭會覺得無想像中咁辣，但慢慢食落去，會越嚟越辣🥵米線爽度適中，同譚仔差唔多，蘿蔔吸晒啲湯👍🏻豬大腸同肥牛都ok明火小銅米線（豬紅、墨丸、生菜 小中辣）尼碗揀咗唔同嘅餸，生菜會分開上，墨丸都爽彈😌值得一讚係俾咗好多芫荽，芫荽控表示超級開心😍味道😋 7.5/10性價比💰7.5/10環境🔎4/10服務🫶🏻 5/10打卡指數📸 5.5/10٩(˃̶͈̀௰˂̶͈́)و 推薦指數🥰 6.5/10

小鍋米線普通酸可以超酸，前台點餐個阿叔態度好差，等左成半個鐘先攞到個外賣。個蘿蔔超大一塊，差唔多半條蘿蔔咁，個小鍋米線就黎似小鍋蘿蔔咁，個外賣盒的湯溢到個外賣袋周圍都係😂

《星林居酸辣米線餐廳 - 尖沙咀》諗番起以前讀書時期，有個時段我係好鍾意食米線的🤭幾乎可以每星期日日都有一餐係食米線咁滯🤪除左連鎖果啲外，我仲好喜歡周圍搵食米線既小店試添😎而家雖然都仲係好喜歡食，不過無以前咁誇張啦🤓講起好食既米線，又點可以唔提呢一間位於尖沙咀既人氣米線餐廳呢😉不過我都好多年無食啦，今次再食味道同以前都差唔多，仲係例牌既酸辣小鍋米線❤️不過今次去人手明顯唔夠😂都等左一段時間先有得食米線有得揀湯米或者撈米，我一定係揀前者的😉個人特別提醒一定要揀少少辣以上既湯底，佢會附送肉碎的，果啲先係精華呀😎我就要左少辣，其實食落一啲都唔辣，有少少感覺only😉食到辣既我都會建議叫高一個辣度，餸菜我要左豬腸、豬紅同冬菇，其他野全部正常，湯底一如既往既酸辣味好惹味🥰米線既質地煙韌唔會太過淋身而且十分掛湯，重點係佢既芽菜韮菜係超多，浸左湯後嗦曬汁咁勁好味😋冬菇有三大舊好入味，而豬紅食落都無血腥味，係我喜歡既配搭呢另外一碗朋友點左肥牛魚旦同埋生菜，湯底同我一樣，生菜佢會分開另上，咁就唔會浸得太耐無曬質感，肥牛同魚旦食落就相對普通啲，不過呢個係個人口味啦🤭我覺得我啲餸好食啲😂其實鋪頭咁多年都真係無