影片
每逢星期六／日，都會想去飲茶，因為俾個借口同屋企人坐底一齊食野，一齊傾傾計咁。所以我地都去過好多茶樓。呢間富園豐，其實之前都黎過好多次。不過有一次見轉左ｍｅｎｕ同埋又轉左師傅，味道變左，所以就一段時間無黎了。剛好今日黎長沙灣買黎，見到個ｍｅｎｕ好似又轉左，就再試試啦。最大變化係唔再分午市同下午茶，兩個時段都係用同一張點心紙，唔似有Ｄ酒樓咁，午市一個價錢，下午茶會平ＤＤ，但要指定時間入黎咁。我地叫左孖寶＄１１８，可選一款粉麵，另加三款點心。上湯焗海蝦伊麵，奶黃流沙飽，蒸鳳爪，菜苗餃孖寶似係最抵兼最飽肚，不過缺點係點心未必樣樣岩食，有Ｄ難揀３野。粉麵就好Ｄ，不過我地想食龍躉蒸飯，但不在ｌｉｓｔ。上湯焗海蝦伊麵，蝦既數量多，麵份量都唔少，抵食。不過味道方面，蝦都合格，配上上湯，的確不俗。但Ｄ伊麵就感覺好似食緊公仔麵咁，唔知係咪伊麵質素差。三款點心唔記得影相，不過奶黃流沙飽味就最好，真係做到流沙之餘，有奶黃既香味，再融入包。鳳爪同菜苗餃就不過不失咁，份量都正常。食完以上坐左一陣，見到隔離枱來左個煎堆，搞到我地忍唔到又叫多左份孖寶。孖寶＄28.8。 蟹子燒賣，南瓜炸煎堆南瓜炸煎堆，仲暖既，不過再熱Ｄ會更好味。食落脆身，又唔會話太過份油味，芝麻好香，口感一流，係今日咁多種食物中最好味。燒賣唔知係漏單還是等埋其他枱一齊蒸，足足等了超過４５分鍾。等到我地都無咩心情欣賞好唔好味了。我地埋單係１７９元，所以茶費應該是８元一位。比我地心目中算用多左錢，哈。其實係我地食多左份孖寶，否則是１４７元就可以埋單。
繼續閱讀
一班親友大部分都喺住晌長沙灣一帶，所以，做節飯都喺安排晌呢頭，近年，食嚟食去都喺嗰好幾家，所以，都少咗寫。但今次唔同，表姐揀咗呢家「新酒家」，其實都唔新，個鋪位一直喺做酒樓，只喺轉名又轉名，依家新名字叫「富園豐海鮮酒家」，唔知可以做幾耐！酒樓環境如一般酒家，雖然，個場就未吸引到人擺婚宴，但壽宴之類應會有捧場客，皆因啲裝修新簇，光猛企理。今次表姐揀呢度，一來就腳，二來主因喺佢哋新推嘅全包宴確喺好超值，就算喺假期，一圍都喺$2,288，除勻每人兩嚿水都唔使，提早落訂仲有燒雞升級為燒鵝，堅喺俾成隻鵝，包12位茶芥連加一服務費，8罐汽水，2支大樽裝啤酒。紅燒竹笙海皇翅我哋食頭輪，估唔到唔喺啲燒味嚟先，一起手喺個翅，當喺廣東人嘅習慣，先嚟食啖湯，不過，小弟無食翅多年，就只好睇住大家「起筷」先。個翅份量唔少，分足12碗都喺滿碗，而且，用料十足，據大家講，味道唔錯，推得唔會太稀或太漿，但翅嘅份量就肯定有限咯！上湯焗美國龍蝦（3隻+伊麵底）睇樣你就知道龍蝦無縮皮，堅喺落足3大隻美國龍蝦，啲鉗大大隻，夠厚肉，又爽口，真喺意外地做得好喎；至於啲伊麵，亦煮得爽身，無過籠煮腍晒嘅問題出現。翡翠蝦仁鳳片繼續保持大份量嘅出品，翡翠就用咗翠玉瓜，都貼題啦，而啲瓜都炒得仍有爽脆感；蝦仁既大隻，又鮮甜，食得出唔喺雪藏貨嚟，而雞肉亦都嫩口，唔會「嚡烚烚」，整體味道亦無酒樓常犯過鹹嘅弊病。鮮淮山杞子浸菜苗再嚟又喺上多一道素菜，呢一味絕對喺健康菜式，因為有齊爽口嘅鮮淮山、木耳，又有少少杞子，不過，菜苗就喺較細嫩嘅白菜仔，配以清甜嘅上湯，其實，用料睇落就普通，但整得唔錯呢！清蒸大金花尾躉菜單寫得算老實，唔會就咁生猛海鮮，而喺花尾龍躉。睇外型應足3斤重有多，雖然咁大條，蒸得火候啱啱好，無熟唔透嘅問題，中心位一夾就離骨，肉質嫩滑，富鮮甜味，所以話呢，食魚鮮，都喺清蒸最好。大紅衣金袍食到中尾段，先至送上乳豬全體，隻豬真喺好「乳」吓，因為睇其身形真喺好細隻。師傅手勢真喺燒得唔錯，外皮十分之香脆，啲肉又無醃過鹹；雖然睇落層皮下脂肪唔厚，但其實一口咬落都有少少油膩。日式沙律米網卷有別平常晌酒宴所食到嘅沙律卷，卷身用啲米網做，體形較大碌，入口卻鬆脆不膩，呢一點已予人有個好印象；裡面釀入嘅都喺啲雜果沙律粒粒，無話好驚喜，但勝在整體食起嚟有份清新感。潮蓮燒鵝皇換咗燒鵝真喺正好多，睇落仲要喺原隻獅頭鵝，一來份量上就肯定比燒雞多咗，二來燒鵝味道較特別，又富油香，的確，隻鵝都燒得好好食，肉質細緻，外皮極之香脆，讚！富豪炒飯最後，一次過上晒炒飯、蟠桃及糕點，所謂富豪炒飯，講真就有啲似楊州炒飯，加入大蝦仁及迷你帶子粒，雖講唔上驚喜，但就絕對炒得有水準，飯粒分明爽身，食到最尾都唔會見碟底有油，啲蝦仁又爽，又混了啲翠玉瓜粒，添加咗口感。龍母蟠桃食咗咁多道菜，都覺得班師傅做菜無「求其」，就連呢籠「蟠桃」都做得似模似樣。每個包，除滿滿嘅蓮蓉，仲加有鹹蛋黃，可以講喺落足料，包身又蒸得軟熟，真喺唔錯呀。精美糕點而是夜嘅糕點喺紅棗糕，糕身夠挺，唔會太過軟腍腍，入口帶點煙韌嘅口感，最正喺嗰陣紅棗味，真喺幾濃郁吓，用料不賴喎。今晚餐飯，唔止抵，質素更比預期嘅好，除落足料，做菜都有心機。雖然出菜嘅次序有啲亂，中後段嘅時間都慢咗，但啲侍應阿姐經常唔好意思前，唔好意思後，非常有禮貌，唔會好似有啲酒樓咁，認為做節飯喺咁架啦，出菜亂，上菜慢，喺指定動作。
繼續閱讀