太興 (已搬遷) 新店位置

見太興佢希望做到食品、環境、服務(部份店舖)每一個細節都想做到有系統、有心思，把傳統燒味飯店作風作出一個轉變，絕對係好事。之前試過那幾款焗飯，中西合璧幾有趣幾好味，要試晒幾款當然要再光臨啦。焗飯係無餐，即係要散叫，我無立即落單叫飲品，因為怕等完焗飯再等食完杯會凍晒。飯食完，我和我朋友杯茶都飲完，希望佢加茶時順便柯打埋兩杯飲品，但係一直都無人加茶，最初估佢忙啦，又或者睇唔到，點知，一個睇唔到，兩個又睇唔到，全店五六個侍應企晒到吹水都睇唔到兩隻吉杯要加茶。我煲兩支煙都無人有反應，埋單走人。唔斟茶係因為我無落單寫飲品，定係我無示意叫佢加茶呢？今時今日(咁價錢)咁服務態度，點得。

今天工作不停, 午間只有30分鐘小休, 便來這裏吃一碟燒味飯.選了玉切飯(燒肉拼切雞, 單上係咁寫), 冬天食燒味, D肉凍冰冰, 我都算蠢! 不過燒肉尚算脆皮, 肉質還過得去. 雞就欠了點味道, 相形失色了. 奶茶一般, 唔好唔差咁啦. 食物大約只係快餐店水準, 餐廳通風不夠有些煙味, 伙記好忙都招呼唔到你幾多, 所以價錢算貴喇.

公司到此午餐，book了一間貴賓房。叫了一隻乳豬，大概要３００蚊，味道幾好，但豬身稍肥，同事話平時食無咁肥。燒味當中以义燒最正，燒肉都不錯，但燒鵝就麻麻。其他小菜有豉汁苦瓜；西蘭花炒班球；羊腩煲；瑞士汁牛柳炒麵；咸魚粒豆腐和生炒排骨。估唔到生炒排骨最遲黎但又幾好食，其他小菜一般啦。整體黎講味道幾好，而且價錢唔貴，招呼也很殷勤。

8月28日晚餐7時45 分來到，門外有不少人在等位，約20分鐘後獲安排入座。雙拼燒味餐($41，凍飲+$3) - 選了乳豬拼叉燒，乳豬略肥但皮好脆味道都ok。叉燒出孚意料之外好食，蜜味不過濃，肥瘦適中，肉不鞋，好吃。餐包油菜1小碟，飲品本要凍奶茶少甜，但原來少甜是普通加冰的奶茶，冰震奶茶是預先造好雪凍，不能要少甜走甜。經了解後有關員工也願意免費幫我們更換，其實冰震奶茶是gimmick居多，味道沒什麼特別(偏甜)。馬拉盞通菜煲($38) - 大砂鍋上，幾香口惹味，但彭慶記的蝦醬通菜煲好吃些。沙爹金菇牛肉煲($45) - 熱辣辣，沙爹幾惹味，送飯最合適。見其他檯的咕嚕肉，椒鹽鮮魷樣子也不錯，下次可以再來吃。本來對這小店不抱什麼期望，吃過又覺ok喎。

今日同男朋友去呢間太興食下午茶～一見到個下午茶既ｍｅｕｎ．．．即刻嚇左一嚇～　因為呢度一個ｔｅａ　ｓｅｔ都最少要＄１８，一般既粉麵都要＄２２，而燒味粉麵竟然要＄２６－２８！！凍飲好似仲要加多幾蚊ｔｉｍ～～我覺得下午茶黎講都算幾貴嫁！！不過唔黎都黎左咯～　就算啦～因為好肚餓，所以我地就叫左．．．＜沙爹雞柳麵＞　呢個係我男朋友食既～　我試左少少～一般啦～～＜榨菜肉絲米＞　呢個係我食既！！　我覺得好咸！！我平時係食得好咸０個ｄ人黎既～　（我話咸都有番咁上下！！）所以我食左一半就放棄喇！！　因為真係好咸！！＜油占厚多士＞（淨叫）呢個係我同男朋友ｓｈａｒｅ食既～呢個就幾好食呀！！另外野飲就叫凍奶茶　ａｎｄ　凍咖啡～味道一般～總括黎講我認為最好既就係油占厚多士～埋單要＄６０！！　我覺得唔值～ＰＳ．服務唔錯～

復活節後第一個工作天，便是我的請假日，皆因行山過度透支體力，以致返歸後沖涼時有少少暈，幸好冇乜大礙。下午落街食個tea，行遠少少到左太興，果然不出所料，部份茶餐大部份比假日平好多，於是乎叫左個缽仔青芥辣焗燒肉飯加冰鎮凍咖啡，份量無異，等既期間，侍應差點將淨燒肉放在我的桌面上。如果分番開的主角及配料，其實真係平平，燒肉還比我上一次去元朗添記差一些，至少冇三層肥三層瘦既出現，但本人好欣賞佢地的創新菜式，希望將來佢地可以有更多新派菜；至於凍啡都係其中一樣好野來。有時假日都會再這裡渡過，茶餐買到咁貴，亦不乏食客，好老實講，真係貴左的，食一次就好難有藉口再有第2次啦！

以叉燒為主打菜，的確係幾正﹗d肉好"林"，肥瘦分明﹗肉汁亦唔錯﹗不過唯一一樣唔好既就係太貴﹗都算係貴價茶餐廳之一﹗不過都值得一試﹗

三個人食了叉燒飯, 燒腩飯, 豉汁排骨飯, 叉燒飽.叉燒食, 燒腩飯好好味; 豉汁排骨飯都ok, 但三十幾蚊就太貴; 叉燒飽最唔好食, 包是法國麵包, 硬呢, 而叉燒是涷的, d汁又麻麻, 十六蚊太唔抵食!

有一段長時間沒有拿起相機認真的拍攝了, 難得師兄弟們尚有熱誠相約取景拍攝; 星期天的中午先來一個午餐, 等候期間先來了一個炸雞翼, 味道輕清; 亦來了一個特色的冰震咖啡, 特色有餘但味道一般, 咖啡味濃但不香滑; 小食過後師兄弟一一到達, 見到他們所用的攝影器材, 方覺得自己已落後了一大步, 科技真的一日千里.慨嘆之餘, 再點一個午餐來填補空虛, 香燈柭蘭地汁焗燒鴨飯, 名子十分特別, 有點中西合壁的感覺; 落單幾近半小時才上檯, 香燈柭蘭地汁味道過於香濃, 燒鴨肉幼滑但味道被焗汁所蓋, 不太平衡亦只是不過不失. 再來一個瑞士雞翼小食, 五隻雞中翼肉質偏滑, 味道比想像中輕清.午餐過後大夥兒乘小輪到鯉魚門拍攝, 始發覺自己的技術已經生疏了, 相比下連熱誠也被冰震下來.

今日要到西灣河見客，食晏時份經過見此餐廳見裝修唔錯，於是入去食lunch，食物味道無驚喜，但抽風設備絕對九流！室內樓底算高，原本即使冇分吸煙區，只要抽風系統做得好，煙民吸煙對其他食客應該影晌不大，但呢間太興可以話完全唔掂，只要附近卡位有客吸煙，左右隔離食客等同食二手煙飯，仲要食到應一應，因為抽風設備差，肉眼都可見整團煙停留唔散，恐怖至極！此餐廳唯一可取是冰鎮奶茶，不過味道跟灣仔毋須冰鎮的凍奶茶質素仍相差幾條街。順帶一提，除卻二手煙飯外，印像最深刻是吃飯時要經常趕烏蠅，大大小小都有，好煩！

紐西蘭牛柳絲炒河: 好好味....夠鑊氣....D牛肉外脆內軟...一D 都唔UN...正....青芥辣忌廉汁焗燒肉飯: 我唔食燒肉..但係呢個汁好好味...撈飯正呀...蜜桃汁焗叉燒飯:果汁甜甜地幾得意...叉燒勁好味...葡國鮮椰汁焗白切雞飯:果汁好香...D雞勁滑...蝦醬粟米汁焗豬下青飯:好鐘意果汁...好特別...D豬下青焗到好脆...掂呀...當然每次都一定配埋佢至出名既"冰鎮奶茶"啦...D奶茶真係超好飲...係我心目中第一位(我覺得好過蘭香園)....去過咁多間太興...呢間最大最舒服...又唔會逼人搭檯...即使兩個人都會比卡位你...不過呢間冇set(湯+焗飯+飲品)....銅鑼灣果間有架...

我次次都好夜先去食,食過個焗飯,焗天使面,都ok好食啦,而個冰震奶茶都好提神...但因為坐左o係水巴位o個頭,見到個水巴同個洗碗亞姐,仲有一個好似整多士o既亞姐,對d樓面好鬼死惡,開口埋口都講哂粗口,見到d樓面就戥佢地慘!

勁難食...D雞翼D毛多到嚇死人..話咩瑞士汁雞翼,咪就係老鹵汁D野又多油又多味精...又貴不過佢地gei多士真係唔錯gei

星期五晚去西灣河的朋友家打牌至凌晨3點幾，同個朋友在附近找地方食宵夜，見呢度燈光火著又好似幾多人幫襯，就來試試。如平常的太興一樣，除了各式燒味粉麵飯之外，亦有一般茶餐廳食品供應。隔夜燒味我當然無興趣，所以叫左餐蛋公仔麵同熱奶茶。至令我們耳目一新的就是原來呢度咁夜都有tiramisu、芝士餅等供應，各類當然不是由燒臘爐焗出來，而是別處交來，但睇樣子都不算太差的。朋友貪得意吃了芝士餅，雖然係實左D，可能係因為雪得耐的關係，但芝士味道都幾濃郁，在呢度食到都算係bonus啦！當然不能對這個芝士蛋糕期望太高，但多一個選擇對顧客來說都是一件好事。