四眼仔腸粉

營業中

休息中

聯和墟不嬲好多嘢食！成日有新餐廳喺附近！今日就嚟到呢間馳名嘅四眼仔腸粉！聽我老公講，平日中午時段勁多人排隊！排到出街口！ 原因好簡單因為呢度嘅腸粉好滑而且價錢超級平，好似去返我小學時嘅價錢，$7有四條腸粉🥳試問而家仲有冇其他地方搵到？ 大家搵到嘅可以話俾我知呀😙我食完四條之後發覺自己蠢咗，完全唔夠喉！決定下次同老公買六條腸粉！ 另外呢度嘅魚蛋係陳皮魚蛋！$4有七粒真係平到不得了！燒賣都非常好食😋$4有四粒！我哋仲叫咗一粒牛肉球同埋一粒粉果試一試！ 👍🏼👍🏼👍🏼呢間店真係平靚正之選！唯一嘅缺點就係，你要排隊囉！

突然覺得好耐無食腸粉，就去聯和墟幫襯四眼仔🤓​粉嶺上水嘅朋友仔都一定識架啦，平靚正，學生時期無錢又當一餐，同埋係去自修室溫書，必食😝​咁多年都無變，10次有9次都係有人龍，不過今日唔算好多人。今次買咗腸粉、牛肉、燒賣、魚蛋、豬皮。樣樣都叫咗少少，一大包咁樣先正。除咗腸粉，其實其他都係普通，唔會話唔好食但又唔會話特別好好食，不過不失，但價錢一定平過其他。主菜腸粉就好滑加埋啲豉油，回憶返晒黎啦，其實係食回憶。

我好少入到粉嶺～但男朋友以前係附近住話我知有間非常抵食ge小食店！仲話超多人排隊食！今日有機會經過！當然要試下啦！！🤣去到好好彩只有3個人係度～之後就好多啦！腸粉（$7有4條）陳皮魚蛋（$4有7粒）粉果（每個$3.5）牛肉球（每個$3.5）燒賣（$4有4粒）墨魚丸（$2粒）我試左腸粉陳皮魚蛋同埋燒賣！先講腸粉好滑～5會好硬一團粉咁！！咁ge價錢超值！！陳皮魚蛋辣得來5夠過癮但可能我本身食開辣～燒賣都5係一團粉咁！真係抵到爛！！作為下午茶or早餐一流！好羨慕粉嶺人有咁平咁抵小食舖啊！ssp都做5到啊！！

鋪面並不特別起眼， 印像在舊舖同一條街嘅對面，依舊任何時段隨時見人龍。能夠長期排隊，依本宮分析，因為價錢簡直震撼超平， 簡直有時光倒流感覺。墨魚丸兩蚊一粒三蚊兩粒😱腸粉蒸爐都有三個，是用傳統嘅不銹鋼腸粉刀，沾上少少生油切腸粉，純熟嘅手法證明由朝忙到晚，喺我前面嗰個哥仔，就就買咗十包腸粉魚蛋。一問 老闆才得知，日賣過千條腸粉，厲害厲害👍價錢真係 無懈可擊，味道就真係不堪一擊😭， 《腸粉》-流量夠所以控制蒸爐火喉冇難度夠結實，《醬料》全部交貨嘢冇再煮過，份量都夠甜醬就略嫌多咗少少，《墨魚丸》-好似成舊粉咁，《咖哩魚蛋》-係用陳皮魚蛋，魚蛋口感還可以，但係咖哩味完全是沾上面，加上本身咖哩醬都唔香，牛肉球咬咗一啖就冇食，整體都係以填飽個肚為目標，味道唔難食但真係唔好味。

踩完單車去到聯和墟，車友大力推介去食腸粉。周日下午四點幾，門外排了十人左右，只做外賣，簡單的賣腸粉，魚蛋，燒賣，粉果，牛肉球及新加的墨魚丸。我點了腸粉，魚蛋及牛肉球。朋友冇介紹錯，三樣都好有水準。腸粉好滑而且不易爛，魚蛋帶有香陳皮味，牛肉球加了馬碲，實凈有咬感。醬汁亦恰到好處。食到飽一飽，廿元唔駛，冇得輸!

四眼仔腸粉真係聯和墟居民嘅集體回憶嚟!!!由細食到大，由佢舊舖到搬到新舖，味道依舊咁好食，特別係魚蛋，真係食唔停口架，仲有腸粉滑溜溜真係好好味，推介混醬走芝麻，呢幾食法食咗十幾年喇!

食左兩次，行過都買🤤🤤！佢嘅咖哩魚蛋好好味，辣辣地好正！！！腸粉就滑一滑👍🏻👍🏻👍🏻！燒賣都好食，不過算係正常貨仔價錢相宜，反正唔貴，食多幾次都得啦！

行完山經過粉嶺，聽講聯和墟有好多美食，咁啱俾我發現有一間排長龍嘅小食店🤣 出於好奇心，就去試吓。排咗15分鐘左右，就有得食。見到佢個餐牌好簡單，得腸粉、燒賣、陳皮魚蛋。我叫咗4條腸粉（$7）同陳皮魚蛋（$4）大大份勁平。腸粉好滑，配上芝麻醬好夾，不過個醬比較稀，如果再稠d就好。陳皮魚蛋細細粒一口咬到，如果配咖喱汁反而掩蓋咗原味冇咁好食。Overall, 好抵食性價比高👍🏻👍🏻👍🏻👍🏻

Menu寫得不清晰，最低消費令人誤解(燒賣寫最少買4蚊，但實際另有一句最低消費7蚊)，最重要是面對問题老板的態度差(亂說一通而且一句話"唔駛理我"想完事)，最後我排完隊也不買，唔係冇錢俾多3蚊，態度問題。

入粉嶺一定要去聯和墟食下嘢，入聯和墟就一定要搵四眼仔食佢d小食，雖然以小弟愚見，佢d腸粉燒賣豬皮魚蛋牛肉球估計應該都唔係自家出品(如我有錯歡迎指證)，不過唔知道因爲乜嘢原因，佢嘅出品就真係好食d，總之就係食咗先講啦！首先想講一講嘅，就係佢嘅腸粉，夠滑，唔會黐埋一舊，食落去可以分到一層一層嘅感覺；第二樣要講嘅就係佢嘅魚蛋，佢賣嘅係細細粒嘅陳皮魚蛋，亦都係我最喜歡嘅魚蛋類別，有少少魚味唔會成舊都係粉，你懂的；跟住就輪到豬皮，一個字，「爽」，仲要吸晒腸粉嗰啲甜醬麻醬，你唔係話唔和味；接住落黎就到燒賣同牛肉球，我嘅評語係「不要浪費quota」。

我小學的時候，當放學肚仔餓便會到這裡買3蚊腸粉2蚊魚蛋，到現在價值仍是一樣，必吃的是幼滑腸粉，好想問老闆幼滑秘訣，直到現在還keep住幼滑，不過老闆我想應該差不多70歲了，不要失傳下去啊，聯和需要你

四眼仔腸粉係北區早負盛名，出名物美價廉又好食😋不過環境一般，沒有位置可坐，只能站著吃完或外賣打包。.🤩腸粉配魚蛋燒賣🤩.腸粉去貨速度快，沒有出現變硬情況。整條腸粉帶油香，滑溜柔軟，不失咬口，底紙塗油非常好，腸粉沒有出現一舊舊痴埋一齊既情況。腸粉沾滿甜醬麻醬配著吃，簡單幸褔。.另外還叫了魚蛋燒賣，魚蛋是我喜歡的陳皮魚蛋，細細粒，咬感較實，帶少少陳皮香味。燒賣口感，不算出眾，但不像其他店鋪的燒賣食到陣陣粉味及冷藏味。

成日都聽到人講粉嶺聯和墟既四眼仔腸粉一定要試，今日經過呢邊探朋友，就過黎食腸粉魚蛋燒賣當午餐！初嘗四眼仔！下午時份門口已經排住一條六，七個人嘅隊！小店賣嘅野一個牌睇晒，價錢超平，三蚊起跳！腸粉幾滑溜，魚蛋同燒賣都唔錯，另外仲有豬皮粉果牛肉可以叫，全部都只係$3！端上時花生醬味濃郁香口，加多一點芝麻粒都是我喜歡的食法，自家製的豉油都變得低調。如果佢開喺我住個區，應該會成日幫襯。總結是，值得推介！💁

四眼仔應該算係聯和墟最出名既小店，每次黎都係必食。長期都排隊，但最好食既係佢既魚蛋，好有咬口，佢set腸粉$7四條，加埋魚蛋加燒賣各一份，份量剛剛好。有低消$7陳皮魚蛋，$4有7粒，叫夠$8 差唔多等如平時食三串，搭埋甜醬同芝麻真係好香又好煙un 。

由細細個佢未轉舖位都已經食呢間四眼仔腸粉，食到依家每次行過聯和墟有機會嘅都會買返包腸粉嚟食。有人話佢轉左鋪之後水準下降，我就覺得都係差唔多只係比以前貴左少少。冇計啦租金水電媒都要㗎。食物選擇來來去去都係得幾款，腸粉，魚蛋，燒賣，豬皮，粉果，牛肉球。最近仲加埋墨魚丸。今日我就叫咗腸粉加埋辣魚蛋仲有燒賣粉果，我特別鍾意呢度嘅花生醬加埋甜醬。咁樣溝埋腸粉食落去會好嫩滑。另外特別推介呢度辣魚蛋有好重嘅果皮味，懷舊味道返晒黎，食得返以前小學食嘅味道啊😳