周記避風塘 (已結業)

尋日同老婆睇完戲去試,侍應安排我坐一間2人房仔,覺得幾有特式,十分舒服,環境都好乾淨.我叫個$198套餐,同一個八爪魚,首先出品方面:豬脾燒得好香,我最鍾意個石鍋菜勁熱,勁好食.海鮮(瀨尿蝦-八爪魚)好新鮮,特別個八爪魚D肉真係好彈牙,一個字講哂正.......跟住招呼方面都好好,斟茶換碟都做得好密,食一個鐘起碼換4-5次碟,員工笑容都做得十分好,好有禮貌唔錯,值得一讚.價錢唔貴(個餐仲有翅同珍珠鮑魚食)!以後lunch同晚飯又多個好去處,值得推介!

星期六與女友在旺角食中午飯，到處人山人海，看到避風塘不用等位便入了去。侍應安排我們坐卡廂（類似卡位但又是一半開放式小型包房），私隱度非常高，好適合情侶，我亦立刻記低該店電話，打想將來會再次光顧。縱然有點茶餐廳feel，但中午飯亦需要比茶錢及加一。食物點了豬肚湯、炒飯、串燒雞翼、炒粉。說真的味道不是太好，普通茶餐廳味道好過它。但勝在環境唔錯，且上菜及加水快，所以都無所謂。我們懷著非常满意的心情結賬，有位穿黑色西裝的人（我估是經理）拿了單來說："多謝$101 蚊"。由於是午飯及己包括加一及茶錢在內，我便不多不少付了$101。怎知該經理望住我大約十秒，然後轉身好大聲說："埋單$101 蚊，實收$101 蚊"。跟住當我們離開經過他身旁時，他又輕佻的說："真係大件夾抵食"，然後同他身邊的侍應咬耳仔。大佬，比唔比貼士是我的自由，你們是服務性行業，連基本禮貌也不懂，點做生意呀！你咁差的態度，仲好意思問人拿貼士，唔怪之得唔使等位就有得食。我離開餐廳後第一件事就是刪除該餐廳的電話，因為永遠都沒有需要，我以後絕對不會再來。