合益泰小食

營業中

休息中

突然之間好想食腸粉，諗起深水埗有間老字號好出名想去食。同朋友一齊去食個腸粉🤩🤩我叫咗六條腸粉🩷🩷🩷🩷🩷佢個腸粉真係我夠膽話係全香港最平靚正一間舖頭👍🏻👍🏻又夠滑，啲醬料又夠香，而且食落啲醬汁勁掛味。完全朔晒喺個腸粉度好鬼正😍😍😍加上佢呢個價錢真係冇得輸，不過佢之前好多人都話排隊排到好誇張，現場睇都係，但啲人食得好快😂😂可能都肚餓得滯🤣🤣唔怪得個個一入嚟都必叫腸粉👍🏻👍🏻另外仲叫咗粉果🩷🩷🩷🩷我個人認為個粉果就冇腸粉咁驚艷，但都好食👍🏻個皮煙煙韌韌，不過我發現佢個粉果係冇花生😂😂平時食嗰啲粉果有花生我唔鍾意，呢間啱晒我✌🏻🤓下次可以叫埋蘿蔔豬皮試吓先，因為嗰日見到都好多人嗌，但因為食得太飽，所以冇叫到。我哋叫咗杯豆漿🩷🩷🩷🩷🩷豆味唔係話太濃，但係啱啱好又唔會太甜🤓👍🏻最緊要好解滯，我都好鍾意飲豆漿，佢呢間啱啱好我要既口味🤓👍🏻希望香港呢啲老字號小店一直保存落去，可以比更多人試吓香港啲小食👍🏻👍🏻五個心心為最高分合益泰小食 (深水埗)深水埗桂林街121號地舖

$10 四條腸粉，加$10 六粒魚肉燒賣多多醬加芝蔴非常好味個個人都一隻碟，幾枝竹籤，揸住就企喺條街度食，超有香港街頭小食嘅風味雖然唔係同一間舖頭，但係就會記得自己中學時期，放學之後或者返學之前，就會食腸粉，兒時回憶 😋

Zaza一直好欣賞合益泰小食，以前住附近嘅時候，成日都會幫襯😆 但自從搬屋之後，就好耐都冇去過啦😄呢日帶咕吱重遊舊地，俾佢感受一下喺古色古香嘅店舖品嚐下港式小食😚 今次我哋order咗腸粉、燒賣同埋豆漿😋 腸粉嘅味道同以前一樣，而且仲係咁滑，咁有米香；再加好多好多枱上面各式各樣嘅醬料，完美將腸粉嘅口感昇華⏏️呢度嘅燒賣都唔錯，大大粒，有咬口；記憶中，呢度嘅蘿蔔、魚蛋都好美味🤤飲品方面，豆漿勁有豆香味，而且滑口冇渣👍🏻👍🏻👍🏻👍🏻仲有呢度嘅員工姐姐都好有禮貌，可能見我帶住個小朋友，所以分幾次點餐都冇問題😃 （其實員工姐姐好忙，分幾次點餐，Zaza都覺得有啲唔好意思，但囡囡越食越開胃，所以叫完一樣又一樣😂😂😂)

一支公去開深水埗兌錢，同事推介我去食米芝連級數腸粉，比平時食開嘅幼身少少，捲得實，好滑，唔會一Pat Pat，據稱有豬油香，就算有，都已經俾醬蓋過哂，真心覺得係好味嘅，其他地方好難食得到呢種腸粉。豬皮蘿蔔入味又夠淋，無炸豬皮嗰陣油味同油淋淋感，都算唔錯。堂食環境夠燈光同算新淨，只係地下好多垃圾(紙巾)，地方都幾朽較。

呢間在深水埗的早餐店擁有悠久的歷史,一直深受當地街坊的喜愛。每朝早都見到長長的隊伍在店外排著,等待品嘗那著名的腸粉。腸粉的口感非常細滑,甜而不膩,實在是一道獨特而經典的本地小吃。雖然店鋪位處街市內,給人一些擔心衛生的感覺,但其實老闆一直非常注重食材的新鮮度和廚房的清潔。偶爾也會有意外發生（發現已死小強在地下）,但整體來說還是很衛生的。不過,如果你特別注重衛生,我還是建議你外帶走食用會比較安心。這間店不僅供應美味的腸粉,其他如粥等傳統早餐小吃也很出色。無論是本地人還是遊客,都會慕名而來品嚐這裡獨特的風味。由於位處鬧市中心,不太遠就有地鐵站,所以交通便利,是很多人的早餐首選。不過要注意,由於人氣極高,尤其是在早高峰時段,通常需要排隊等待,需要預留充足的時間。這間早餐店已經成為了深水埗一個地道的地標,很多遊客特意來此體驗傳統香港早餐文化。事實上,也有不少網紅和影片就曾經介紹過這裡的美食,可見其在香港小吃界的地位。如果你有機會來訪,一定要來嚐嚐這裡獨一無二的腸粉,相信你一定會回味無窮。

深水埗掃街第二站 - 合益泰！！試過好多地方嘅豬腸粉，但係唯獨合益泰呢度嘅真係特別滑同埋有特別嘅香味！令人會回味！個個就係豬油香啦！！（雖然好邪惡😈）重點呢個價錢真係冇得輸！！今日點左💁🏻‍♀️腸粉 $15 6條牛肉 $12 3粒豬皮蘿白 $19（細）———————————如果想快啲地道啲可以揀排隊企係街食，不過最近幾次我都揀入去堂食叫做有位坐下 不過要做好心理準備 啲姐姐好忙好忙要有耐性地等佢落單呢🤣🤣———————————🫗$15 6條 超級滑腸粉，佢地會一早落左麻醬同豉油，豉油亦都唔會超鹹，加埋甜醬同落好多好多炒香過嘅芝麻超正！！🫶🏻🐮牛肉球$12 3粒呢個就比較普通啦 佢個口感係比較粉同黏啲，如果鍾意爽口嘅就可能會有啲失望🐷🥕今次亦都好想試佢個豬皮蘿蔔，叫咗一份細嘅$19，因為見到同場都幾多人有嗌，結果好有驚喜！！兩樣都好入味！豬皮超稔！雖然有少少豬毛😂但我下次嚟都會想嗌！

見咁多人like就去試下，點知呀姐態度勁差，扮睇唔到你，我叫左外賣腸粉燒賣魚蛋，蘿蔔仲有豆漿，上咗車之後先發現阿姐比漏咗魚蛋，仲有條好核突嘅頭髮喺啲腸粉度🤮🤮🤮 專登行返好遠去問吓姐拎返魚蛋，點知個阿姐唔認數，仲話我呃佢😡好嬲，我會唔會為咗幾蚊雞魚蛋特登咁遠行返去呃佢？🤬啲魚蛋腸粉燒賣食落真係好一般，仲難食過出邊街邊嗰啲，極度唔推薦👎🏻唔明點解咁多人鍾意，第一次去亦都會係最後一次

Frd子細個嘅時候住深水埗呢頭今日出嚟行街 專登帶我去食經典名物到埗見到有條長長嘅人龍腸粉 4條/$10 + 魚肉燒賣 6粒/$10腸粉入口滑溜 口感比較實在甜醬+豉油+芝麻配搭 的確無敵仲點左魚肉燒賣 不過相對普通Frd子話食返童年味道

已經食過呢間小店幾次, 基本上腸粉蘿蔔係必點, 可惜今晚蘿蔔已經賣晒 😵 所以我改左食碗碎牛粥, 又估唔到碗粥都幾好味, 比起我早前食個間西記粥店好得多, 起碼粥都算綿細, 而碎牛又同出面有分別, 同啲粥已經混為一體, 成碗粥隻色都已經啡啡地, 望到都覺得唔錯 😊 腸粉有細, 中, 大三個size, 一般我都揀中, 細就一定唔夠, 大又驚多得濟, 腸粉夠滑, 黎到就自助加醬, 按自己口味去加, 甜醬唔會太甜, 加埋豉油, 麻醬同芝麻混醬食就最好 👍🏻 雖然鋪頭坐得麻麻, 亦都唔乾淨, 服務又冇乜, 不過腸粉, 蘿蔔同碗粥都唔錯, 但除左呢幾樣, 其他野食就真係好普通。

呢嚟到呢,就預左要排,企係條街度食.環境,服務,就唔講喇星期三下午5點到,排左5分鐘,叫左一份細既,10蚊4條.價錢正常第一啖,好重豬油味,腸粉就好滑,但就無咩米香味.醬就正常la,無咩特別.下次如果想食,都要返嚟食嘅

啲阿姐叫極都唔理你，睇到都扮睇唔到，唔會再去！環境又污糟邋遢，都唔明點解啲人成日話呢間嘢好食，啲腸粉有一般，係得個蘿蔔甜，成間嘢啲態度都不知所謂，我唔推介去呢間嘢食嘢

服務好一般，都好多人，啲態度真係唔會想番轉頭食，唔適合第一次去幫襯嘅人，問多句都喝狗咁去開嘅街坊就會知外賣就排出面，要堂食就自己衝入去搵個位，等落單，再等腸粉到。唔去開嘅，問多句都俾遮遮們喝番轉頭。腸粉就正常野啦，價錢都公道。另外嘅豬皮蘿蔔都係咁囉，無乜好特別，食物質素正常。堂食就等得比較耐，始終人多。入得去以懷舊掛帥嘅都唔好期望有禮貌嘅態度。粗聲粗氣喝狗咁先夠地道？！人多都有另一個選擇，鋪外後巷立吞。

我今日下午在深水埗行街，順道去合益泰小食，幫襯腸粉和豆漿（經典的懷舊街頭小食）。我點左一碟細腸粉$10，及一杯豆漿$6。腸粉拌著基本的豉油，其他的醬料就自主啦！枱上有甜醬、辣醬、芝麻、豉油....等等，任君選擇。我加左甜醬加芝麻，腸粉食起來幼滑有口感，豆漿好飲！

Dining time（12:03pm lunch）follow@wojengyea/@wo!正嘢 for more food info🐒 支持我哋發掘更多美食 😋N年前食過佢啲腸粉，念念不忘，今日再去試。中碟腸粉$15 6條，腸粉真係好滑。（重要溫馨提示🥁🥁）如果要走醬早啲講，如果唔係佢會落豉油同埋麻醬。太耐冇嚟，唔記得同佢講，搞到成碟嘢勁多麻醬，要溝多啲甜醬🍭中和返個味。齋食腸粉都比較寡，所以一係配魚蛋🐟或燒賣，燒賣$10 6粒，正常發揮。佢啲炒麵🍝唔似出面嗰啲咁油膩、冇咁深色同冇咁硬身，麵係屬於腍身嗰隻，晤同粥麵店食嘅果款，好處係唔係好油，幾惹味。炒麵$13 加埋韭黃、芽菜🌱落去炒。凍豆漿🥛$6 豆味好淡，只係得個甜味，唔知咩事面頭勁多泡泡🫧🫧🫧🫧。餐廳氛圍餐廳擠迫到一個點，唔好諗住你個袋🧰可以擺喺張凳度，會俾阿姐鬧。見通常都係一支公快快脆脆食完即走，唔好諗住約朋友可以吹水慢慢坐。

N年前已經開始品嚐呢間合益泰腸粉店, 如果自己想食腸粉一定搭地鐵過去深水埗, 呢間腸粉店做得好成功, 雖然地方唔算大, 但係品質有保證, 最鍾意食嘅就係佢嘅腸粉夠幼滑軟硬適中, 佢嘅醬料真係頂絕全港包括甜醬、豉油、芝麻等等... 任你落落夠滿意為止, 事關本人最重口味所以每次都落好多甜醬, 食腸粉之餘一定要加配 一杯幼滑甜美嘅豆漿, 最可惜就係佢而家冇嗰隻12蚊三粒嘅冬菇燒賣大大粒好好食！除此之外佢仲有好好食嘅艇仔粥、 魚蛋、 豬皮同蘿蔔拼盤！各適其適應有盡有, 大家記得去開深水埗買啲廉價用品之餘一定要過嚟食下佢嘅腸粉！