元朗冰室

營業中

休息中

放工宵夜最中意來元朗冰室平靚正個面都好濃，最正係個大雞髀開到好夜，又可以慢慢坐。其實仲有好多款可以選擇，呢度嘅服務都唔錯。個豬扒堅係好大塊。都唔錯幾好味。哈哈😄晚晚都嚟食消夜。最後都坐到一兩點先至走。

出開去九龍區諗住去花墟行一轉，順便係太子食埋一個簡單午餐。其實之前去過太子唔少出名既茶餐廳，味道都唔錯，所以今次決定去一間未試過既餐廳，所以㨂左依間近地鐵站又大間既試下。可能近排新派冰室既質素都唔錯，所以我一開始對餐廳都有大期望，不過試完只可以話一般般，沒有任何驚喜。餐廳可以㨂既種類好多，厚豬扒丶蒸飯、炒麵、連乳鴿都有得食，不過最後我都係揀左最穩陣既公仔麵餐加奶油豬。公仔麵餐只有一款可以選（再加要加錢），所以我浄係揀左腸仔。個麵煮得比較腍，湯亦不算濃，所以不是我杯茶。奶油豬份量不過不失，最好味係最後既奶茶，好濃茶味，有傳統茶餐廳質素。

今次黎到太子的一間新餐廳，餐廳全新裝修 帶點玩味 座位舒服 但職員比較混沌 可能係新開張 需要時間適應 歐美全日早餐普通跟雞扒、牛扒及魚柳想轉食厚豬扒要加十蚊大家都一定以為塊肉甘厚 會好易「孩」但呢間整得既多肉汁 又嫩滑 既不煎炸又不油膩 加十蚊都抵 整體而言 呢個價錢$48 但有甘多款野食 係叫好抵 足料 有茄汁豆、歐陸腸、炒蛋、牛角包、沙律 每樣野質素都唔差馳名厚豬扒麵份量大 一個普通既男人都會食唔曬 厚豬扒一樣有質素 加上普通公仔面一個餐牌：

今朝因為趕唔到校巴，要自己坐的士帶阿仔返學， 帶完返學同啲阿叔阿嬸一齊行晨運咁…… 漫步花墟！ 見冇乜嘢做一路漫步至到太子地鐵站。很少晨早出門的我，又做了晨運咁，肚裡在叫嚣，於是來到呢間元朗冰室。元朗冰室不在元朗，香港仔魚蛋粉也可不在香港仔是常識吧！叫咗個雪菜肉絲麵早餐包埋厚多士同炒蛋一杯熱啡成為$34蚊好奇怪的感覺雪菜肉絲面啲雪菜好似成座山咁！ 厚多士加蒜蓉味感覺特別 ，始終較喜愛牛油多士 ……炒蛋不算太多略嫌少 。唯獨是 熱咖啡比普通茶記優勝很多，也應該不遜色於大酒店餐廳入口甘香好味，令人回味！

新年過後的第一個星期日，同老公走到太子附近行逛，見有點兒累便四處尋找既可歇腳又可吃個下午茶的食店。聯合廣塲附近又沒有茶餐廳，便走到大南街一帶看一看。幸運地看見一間門面又整潔又給人舒適感的茶餐廳，走進去，侍應生忙碌得很，等了一會向侍應生點了兩個下午茶餐(豬扒飽加餐飲)。細看餐牌，原來厚豬扒乃是此餐廳主打，但奇怪的是看見很多食評家一些評價都是劣的，心裡不寒而慄，戰戰競競。答案快要揭盅，送上來的是一個超脆既飽，中間夾着兩片番茄，紅椰菜，一片超厚豬扒，唧了帶有wasabi味沙律酱，熱騰騰的。由於整個食物太厚，幸好厨師用了一支很長的牙簽串着，對於咀细的我在食時會有點困難，不能把太厚的食物大口大口的吃下。細味品嘗，厚厚的豬扒味道超好，又香口，不肥膩，與其他食材簡直是绝配。

新年諗住食個早餐，於是就搭車去太子食個早餐，行經一間叫元郎冰室，行入門口自己搵位，由我坐下到落單足足用了15分鐘以上叫和等先有人幫我，在落單後約五分鐘左右就聽到員工同另一枱入坐已久的人講，要等25分鐘先有落單的食物。下！點解無人同我講！另外，漏單！係我張枱。同員工講，叫我等等，最後唔見影，只是一個有打呔的職員講唔好意思！我覺得，間餐廳唔夠人手或要客人等，要在門口寫眀，唔好等人坐下兼落左單，問先講，好似當水魚！太過份！我建議大家無必要都唔好去這間餐廳食！

侍應服務差叫極唔應，食物底水準太多味精，温度不足，飯無飯味，奶茶淡如奶水，全部不知所謂，完全不值，剛剛食完就收晒啲杯碟，趕人走咁，真正貼錢買難受，以後不再光顧了。

今日路過見到新餐廳想試下，可能係新開同埋啲職員冇經驗，派飛嗰個阿叔完全唔知自己做緊乜咁，我同佢講咗要飛幾次，明明聽到都唔理我。我以為淨係我係咁，但另個一樣係2位嘅客都係一樣冇人理佢。其實佢唔想收兩位嘅客我希望佢講清楚囉，唔好浪費大家時間。而重點係，其實入面有好多吉枱，我諗佢地係想製造條隊扮好受歡迎。結果因為我攞唔到飛，當然連等都唔使等就走咗。不過我短期內都唔會再去試啦，等佢一年後管理好啲，又未執粒時先算。

見新開張諗住試下，叫完一次即刻剪左張外賣紙難食到我要開一個帳號寫這篇文章，希望別再有人中招今日晚上6點30分，叫了兩個外賣，一個係厚豬扒配司華力腸飯，一個係厚豬扒配辣肉醬飯，兩杯凍奶茶，104元。兩個餐，一份豬扒全是肥肉，肥到出油果隻，放入口即刻吐返出黎，另外一份乾身，啲肉硬既，點放得入口，味道算正常，啲飯又係硬既，好似未熟咁，辣肉醬方面都可以接受，似辣椒油肉碎咁，杯奶茶係正宗奶水咁，完全無茶味可言，全個飯仲好食就係粒粟米，其實全部食唔落口。結論係，唔洗錢我都唔會再食！多謝。

早幾個禮拜前，知道太子開咗間新嘅元朗冰室，就同埋D朋友一齊去試吓，試過厚切豬扒飯，都好大塊好好味👍🏻👍🏻而且，侍應服務都好好，因為啲菜麻麻地，但佢都加番啲粟米俾我哋👍🏻👍🏻只係個洗手間🚾比較奇怪，係店舖嘅後面後行，去嘅時候要小心啲啦！

叫左個豬扒蓮藕餅飯一塊厚豬扒 唔算油 幾厚下二塊蓮藕餅 好香口 蛋槳炸過既 外脆內軟唔錯個飯就標準飯碗碗半飯度豉油應該溝過 不過都幾好味唔係太咸今次坐對窗位望到術景卡位算寬敞，但普通坐位四個人會迫小小午飯時間都爆滿。要食就早啲去搵位啦

今日見呢間餐廳新開，十二點左右入店，要由頭行到尾先可以坐低，枱面勁污穢，待應好多，但我叫左三個阿姐抺枱，三個都好似聽唔明咁，到第四個終於拎塊布黎，用佢搽咗指甲油既蘭花手拎住枱抺象徵式咁抺兩抺就完事。然後叫左厚切豬扒出前一丁配熱華田（6 號餐），唔夠一分鐘，熱華田送上都有華田香味，飲落都好好飲；再過兩分鐘，一塊豬扒配上一片三角形既牛油蒜茸包送上。塊麵包拎上手，完全感受到地心吸水呢個原理，估計塊包應該由朝早開舖已經整好放到我黎，入口塊包底好似俾水浸完，塊包完全係濕濕地漿住個口，吐都吐唔切。不久，出前一丁送到面前，目測廚房大哥係就咁將個出前一丁放入碗味精湯裡面，完全唔似煮過因爲麵身係白色，一啲煮過變半透明都無，放入口就似打開包童星點心咁款，我又決定放棄。黎到最後試試塊白色豬扒，一切再切終於切開急不及待咁咬一口，個味道完全係夾雜住油、粉漿、肥膏連同好似煲左十個鐘出晒豬肉味既瘦肉既所謂豬扒，凍冰冰，無味道，無賣相，完全慘不忍睹。就係咁，我乖乖奉上$42 同急急腳走人，真係一試難忘。

太子近來都有不少新開張的冰室，其中這間有著紅當當招牌的元朗冰室十分搶眼，於是便在等朋友的空檔去吃個下午茶。叫了咖咉西多熱奶茶，咖咉份量適中，不會太甜，西多炸得剛好，不算油膩。至於熱奶茶就稍為遜色，奶多而茶味不夠香濃，而且是溫溫的，不夠熱辣辣。雖然都是一般茶記的食物，不過在旺區來說，價錢算合理了。可是，服務方面有待改善，可能是新開張，人手不足，執枱、下單、上菜、要刀叉都等了很長時間，而且亦要不斷催促。

本身我就偏愛食全日早餐，見到呢到有，我梗係又一試啦，今次叫左份魚柳早餐，四十蚊，抵食吖，但如果要轉豬扒就要加十蚊(話係厚切)，但我冇咩興趣，個魚柳早餐雖然唔係好大份，但總算夠食，魚柳熱辣辣，唔係特别好食，跟嗰個牛角包有D硬添，但D嘢熱辣辣加番唔少分架，另外朋友都叫左個厚切豬扒飯，我都有試番舊，但唔覺得特别厚喎，不過個豬扒好林身，味道都可以嘅,不過如果再嚟我都唔會專登叫呢個豬扒，反而早餐我都會再試吓

厚道行為建良緣，切勿妄念建歪理，豬牛戒殺建宗教，扒竊小盜毀大同。六點收工頭岳岳，在太子區內行來行去，都唔知食咩嚟頂吓肚餓，一陣又要再做嘢，食多啲又花時間，食少啲又怕手軟腳軟，無晒實在感。點知發現到咗<元朗>呀︶*︶❝元朗冰室❞外圍貼住多張吸引我的宣傳海報，其中之一寫住<<since 1991 · 厚豬扒專門店>> 噢。所以决定去度一度佢有幾厚。餐牌上的食品種類多多，我要提起萬二分專注力，放在厚豬扒的食品中。最後選擇<<魔鬼醬厚豬扒包>>了。外面兩片脆脆的包，中間隔了一片厚豬扒，令到上、下麵包分了手，像牛朗與織女姐姐，被遼闊銀河阻擋着，遙遙相蓬無日期。但厚豬扒境然噴射出新鮮熱辣儂儂油香，在數尺距離內亦感到心底跳動着，兩手不自然向前抓緊它，突然發現麵包並沒有被蒸氣或肉汁弄濕，整體恰到好處呀！於是我盡量張開大嘴，享受此無敵的厚豬扒包了。溫馨提示：<魔鬼醬> 實際是山葵味沙律醬，要唔要就由自己决定。店內面積可說寬敞，但有枱已被留座了，我覺得大家應該合作。