菜式以IG-able見稱嘅Seoulmate Cafe，餐廳不時推出時令款式，今次更將餐牌大革新，大廚繼續發揮創意，換上多款全新菜式，令食客耳目一新！款款特色兼包含晒所有大熱元素，賣相可愛又吸引，真正睇得又食得！粉絲係時候去試吓菜喇！
招牌作變奏！ 可愛火山大爆發
率先登場嘅全新烏卒卒火山岩漿泡菜芝士炒飯，黑色火山造型神似又趣怪，用紫菜製成嘅粗眉大眼真係好可愛，未食之前一定要影多幾張Selfie！外層其實係墨魚汁蛋白，看似堅硬其實質感軟滑，入面就包住泡菜芝士炒飯。食前將「火山口」嘅蛋黃弄破，蛋漿慢慢流落嚟，似足火山爆發，梗係要影boomerang先啦！
烏卒卒火山岩漿泡菜炒飯
一嚿Seoulmate 雲下的墨汁海鮮西班牙腸燴飯
而本身餐廳已有嘅招牌菜一嚿Seoulmate 雲，就將內餡由泡菜炒飯變成墨汁海鮮燴飯，同樣要忍心切開萌萌嘅白雲，入面就有濃郁鮮味嘅墨汁燴飯，一白一黑，小心食到嘴唇黑掹掹。飯內加入咗西班牙腸，鹹香突出而且更有粒粒煙韌口感。
炸泡菜蝦球蘇格蘭蛋
炸泡菜蝦球蘇格蘭蛋更加係手工菜式，好似網球咁大蝦球好吸引，蝦肉加入泡菜打成蝦膠，入面包著雞蛋，再炸至外層金黃香脆。一切開即見到半流心嘅溏心蛋，滑溜蛋黃與香口彈牙的蝦肉一起食，鮮味大爆發！
黃金海鮮鹹蛋黃醬薄餅
鹹蛋黃大熱，大廚好有諗頭將鹹蛋黃融入Pizza當中，fusion得嚟又好味！咸蛋醬海鮮Pizza
餅底已有鹹蛋黃，面層亦有大量自家製鹹蛋黃沙律醬，甘香之餘又富鹹蛋黃起沙嘅質感，加埋豐富海鮮，食落完全冇違和感！
黃金鹹蛋炸雞
鹹蛋黃另外一個好朋友係炸雞，雞塊先炸再以中式做法同鹹蛋一齊埋鍋炒。叧鹹蛋更入味，炸雞更外脆內嫩滑多汁，鹹香惹味，食唔停口。
大廚心思配搭 特色主菜
其他新推出嘅主菜都係大廚花足心思炮製，好似西班牙黑毛豬配柚子味噌醬，嚴選西班牙黑毛豬，本身豬肉味濃而不羶，豬扒不經醃製保持原汁原味，燒烤時間及火候啱啱好，肉質juicy軟腍。最特別係大廚特別自家調製柚子味噌醬，微酸果香並帶味噌獨有的味道，開胃之餘亦減低肉類膩滯感。
熱辣又香口 荷蘭寶寶班戟
韓國荷蘭寶寶班戟配紫菜肉鬆火腿 星期一至五下午茶時段(公眾假期除外)
靈感源自德國及美國流行嘅Dutch Baby班戟，來到Seoulmate味道賣相再升級！大廚融合東南亞口味，精心設計出韓國荷蘭寶寶班戟配紫菜肉鬆火腿，紫菜肉鬆味濃，加上脆卜卜的韓國米餅，同以雞蛋、麵粉製作的Q彈班戟皮完美配合！
韓國荷蘭寶寶班戟配煙三文魚忌廉芝士 星期一至五下午茶時段(公眾假期除外)
另一款就係西式風味嘅韓國荷蘭寶寶班戟配煙三文魚忌廉芝士，面層的香滑蛋黃醬，惹味到食唔停口！
韓國荷蘭寶寶班戟配榛子焦糖香蕉
喜歡甜食就唔好錯過韓國荷蘭寶寶班戟配榛子焦糖香蕉，Nutella醬同焦糖香蕉係完美配搭，香甜軟滑，食完有罪惡感都值得呀。
黃金流沙大戰年糕多士配焦糖雪糕
另一人氣必吃甜點黃金流沙大戰年糕多士配焦糖雪糕，將港式西多再進化！多士中間夾住煙韌韓國年糕及流沙鹹蛋黃邪惡又甘香，一吃即有誘人拉絲，連焦糖雪糕、焦糖粒、花生醬及煉奶同吃，冰凍香甜共冶一爐，吃罷相當滿足！
甜品控必吃 三色Tiramisu
甜品控一定要留肚呀，店子招牌Tiramisu推出咗兩款吸引嘅新口味！原味加入韓式米酒製作，令意大利經典甜品帶韓式風情，新出嘅抹茶口味，精選日本抹茶粉製作，連蛋糕本身都混入抹茶，茶味甘香。另一款紫薯Tiramisu就帶迷人夢幻紫色，以韓國紫薯粉及紫薯蓉用心炮製，薯香突出亦香甜滑溜，係一眾紫薯迷必試item！
紫薯Tiramisu