九龍城寨係好多香港人嘅集體回憶，就算你未去過；甚至你出世前已經拆咗，都一定聽過傳說中呢個「三不管」嘅地方。雖說龍蛇混集，但神秘之域總有股獨特引力。
呢間新開火鍋店「城寨煲皇」就重現香港7、80年代城寨氣氛，菜單印上「邊爐耍樂，集英雄之地」之言，確實甚具城寨氣勢。店家位於地庫，大門用上本土通花鐵閘，閘內樓梯掛滿霓虹燈、經典花牌；泥水牆又寫滿油漆大字，仿如穿過時光隧道直落地庫，喺港人回憶中邊爐耍樂。
大門本土通花鐵閘。
樓梯掛滿霓虹燈、經典花牌。
歌舞廳風格 水晶燈下打邊爐
相比樓梯嘅本土豪邁，店內有種金碧輝煌感覺。低調墨綠色牆，掛著夜上海歌舞廳風格燈牌。
店內走上海歌舞廳風格。
一整排梳化卡位則有一盞盞水晶燈，座位寬敞舒服，三五知己打邊爐坐得舒服過癮。
一整排梳化卡位寬敞舒服。
驚喜火鍋手工菜
最驚喜係呢度唔只食氣氛，所有湯底、配料都係手工菜，單單湯底就用十幾隻新鮮雞熬足10個鐘。刺身選擇亦係數一數二之多，除咗坊間極少見「煙燻牛肉刺身」，「龍蝦刺身」二食都超正，南澳龍蝦肉夠厚夠彈，蝦腳、蝦鉗、蝦殼則避風塘炸成脆片。由小食開場，食到刺身、湯底、配料都好正。
所有湯底、配料都係手工菜，好有驚喜。
【自家熬手工湯底】城寨皇牌鍋底
兒時酒家回憶中，員工分翅舀湯甚為深刻。但而家咩都要快要平，多數將湯鍋捧上枱就了事。呢道招牌湯底「城寨龍鳳雞煲翅」，為咗確保每位食客都食到豐富魚翅、花膠，特別安排員工先將湯料平均放於每個餐碗中，再逐碗舀入熱辣辣雞湯，好有細個食翅回憶。
特別安排員工分翅舀湯，確保每碗都有豐富魚翅、花膠。
魚翅花膠雞湯底勁足料，一入口已Feel 到嘴唇沾有薄薄膠質。而且大廚將湯底隔油2次，湯身順滑唔油膩，就算飲完湯都好有胃口慢慢打邊爐！
真係食到啖啖湯料，魚翅豐盈Q彈。
秘製沙嗲醬 城寨沙嗲鍋
沙嗲湯底配牛一流！但坊間好多沙嗲湯底太濃太稠，完全掩蓋食材味道。於是大廚自製沙嗲醬，輕辣香濃帶花生醬味，再經多次調較醬、水比例，先做到沙嗲夠濃郁，同時湯身又順滑易掛湯。鍾意惹味、鍾意牛嘅話一定要試。
沙嗲湯底配埋爆湯豬皮，等你試真啲自家沙嗲醬。
爆荽湯底！芫荽皮蛋鍋
有時想食得清啲，又略嫌清湯湯底單調，呢度嘅「芫荽皮蛋鍋」就好夠荽味！湯底以1斤芫荽、皮蛋、蔬菜熬製，本身已有種爽快青草味。上枱後會另外跟一碟芫荽，開動前將新鮮芫荽放入湯中，連埋配料一齊食就有埋芫荽清爽口感喇，身邊有芫荽控嘅話一定叫佢試！
【多款刺身】加拿大象拔蚌刺身
估唔到火鍋店都有咁多刺身揀，象拔蚌、龍蝦、花竹蝦、活魚都有。店內設魚缸養游水海鮮，刺身超新鮮高質！加拿大象拔蚌厚肉彈牙，夠新鮮所以好鮮甜。
店內設大魚缸養游水海鮮。
加拿大象拔蚌刺身
刺身級靚牛 煙燻牛肉刺身
香港好少地方食到「煙燻牛肉刺身」，加拿大脊身位好軟嫩，刺身食法更食到原始濃牛味。上枱時會以玻璃罩蓋住，員工即場以蘋果木煙燻，牛肉有種獨特煙香味，散出輕煙時好唯美啱打卡。
坊間少有煙燻牛肉刺身，打卡一流。
【火鍋配料】
火鍋湯底、配料都係手工製，椰菜餃、韭菜餃漲卜卜好彈牙，餡料加入特調香油，味道好有層次。
手工製餃子加入特調香油，味道有層次。
手打墨魚滑、蝦滑
手打墨丸、牛丸、蝦丸
無骨鯇片。脆肉鯇全起骨，淥至挻身即食好爽口彈牙。
霜降手切牛頸脊。肉質軟腍，本地牛牛味好濃。
【城寨小食】鹽燒鮑魚加海膽
小食都好有誠意，特別係「鹽燒鮑魚加海膽」用勁大隻新鮮南非鮑。鮑魚同海膽都係燒至僅熟，海膽又綿又濃，鮑魚愈咬愈滲出海鹽味，味道口感都好豐富。
游水南非鮑魚超彈牙！
涼拌花甲
完全估唔到花甲咁厚肉，一咬落去係有汁爆出，貝味幾濃。後續慢慢滲出陳醋輕酸，加埋黃椒油幾麻香。
花甲好厚肉，貝味幾濃。
黃金魚皮
打邊爐必食炸魚皮，加埋鹹蛋黃嘅「黃金魚皮」更鹹香。而且自家製即叫即炸，魚皮夠厚夠脆，浸一浸湯食都Keep 到脆。
即叫即炸魚皮沾滿鹹蛋黃，好惹味。
城寨煲皇
地址: 尖沙咀亞士厘道24-38號天星大廈地庫A號舖
電話: 28992236