必點打卡 - 牛魔王拼盤! 夠晒氣勢~
而家宵夜選擇越嚟越少，難得搵到開到凌晨5點嘅火鍋店真係要mark低呀。尖沙咀新開「滾爺火鍋」全場卡位設獨立電視，夜晚同朋友嚟打邊爐、直播英超西甲睇吓波幾正㗎。特設2間VIP房更有大電視唱K，男仔睇波女仔就喺花牆打卡，一班人開party玩到深夜都唔怕嘈到人喇。
全場卡位，設獨立電視極具私人空間。
零包袱！大爺般盡情食玩飲
「滾爺火鍋」中嘅「滾」意指滾至沸騰嘅火鍋湯底；「爺」即希望食客如大爺般豪邁享受火鍋。所以呢度氣氛好熱鬧，有強勁音樂、獨立電視；VIP房甚至可以唱K，大家都食得特別爽快！盡情打邊爐、飲酒、傾計啦。
VIP房寬敞，設用餐區、卡位玩樂區，盡情唱K開Party至凌晨5點啦。
自家熬製湯底10小時！
店家有多款香濃湯底—招牌椰子雞鍋 (半隻雞)、藥膳花雕醉雞鍋、胡椒豬肚雞鍋等，足料滋補。冬天想食得香口麻辣，亦有足料麻辣雞煲、麻辣龍蝦鍋揀。麻辣龍蝦鍋更包半隻雞、原隻澳洲龍蝦，未食其他火鍋配料都大滿足呀。
親試！招牌椰子雞鍋 (半隻雞) + 麻辣湯底
招牌椰子雞鍋(半隻雞)有好多雞件，全部都厚切多肉，好似嗌湯底送多一碟配料咁抵食。湯底富椰香清甜，係加咗好多椰子肉(用上四個椰子)，、新鮮椰子水先做到嘅效果。
招牌椰子雞鍋有好多雞件，全部都切厚多肉幾抵食。
另外麻辣果邊就唔算好辣，係大部分人都會食到嘅辣度。但惹味度十足，好啱打邊爐飲啤酒。值得一讚係辣油、香料都煮到好香，滾湯等食嗰陣真係越聞越肚餓呀。
提供多款鴛鴦湯底。招牌椰子雞鍋有好多雞件；麻辣鍋輕辣夠惹味，食得爽快。
【CP值高拼盤】
如果你鍾意食靚牛、海鮮，「滾爺火鍋」就好啱你喇。佢哋有好多拼盤，一個價錢食到幾款牛位、游水海鮮，CP值好高！
足料游水海鮮 | 四人海鮮拼盤
海鮮拼盤有台山蠔、海中蝦、南非鮑魚、扇貝。南非鮑魚好Q彈，原隻鮑魚切片食得更方便。其他海鮮就每款4件，份量十足唔使爭。特別係生蠔、扇貝都好大隻肥美。
四人海鮮拼盤好足料，生蠔、扇貝特別大隻肥美。
必點打卡 | 牛魔王拼盤
平時打邊爐嘅牛拼盤，主要都係各種手切牛肉。呢度就有啲唔同，以口感牛味皆出色嘅牛板腱做主打，軟嫩帶嚼勁吸引好多fans；配以牛骨髓、牛肚、牛舌幾有新鮮感。牛骨髓口感獨特滑嘟嘟，平時唔多地方食到㗎。
噴煙牛魔王登場富玩味。
【仙氣牛肉】
「滾爺火鍋」擺盤花心思，特別係呢2款皇牌牛肉都好夢幻！
肉味爆發 | 新鮮牛頸脊
呢碟牛頸脊真係有驚喜，仙氣木盒上枱已經忍唔住即刻影相！牛頸脊係運動量較多嘅肉位，所以肉質鬆化有咬口。而且雪花紋平均，肉味會越咬越濃郁㗎。
仙氣木盒放滿新鮮牛頸脊。肉質鬆化，肉味越咬越濃。
豐富肉感 | 美國安格斯牛小排
另一盤仙氣登場嘅牛小排，油花香味最突出～因為肉位穿插筋膜，肉味咬口更多層次。輕灼幾吓至5成熟，豐厚紮實肉感係最好食。
美國安格斯牛小排仙氣登場，肉質豐厚紮實。
【Q彈丸滑】爽口手打鮮蝦滑 + 手打蟹籽墨魚丸
手打起膠 | 爽口手打鮮蝦滑
手打蝦滑打到起膠，所以食落好彈牙又保留到新鮮蝦味。
手打鮮蝦滑起晒膠，並保留到鮮蝦味。
激多蟹籽·雙重口感 | 手打蟹籽墨魚丸
如果你鍾意試新嘢，呢款丸滑幾驚喜。手打墨魚丸外層有滿滿蟹籽，就算放落湯滾完都無散開。一咬落去，蟹籽就會粒粒爆開，內裡墨魚丸又輕韌彈牙，做出雙重口感。
手打蟹籽墨魚丸。滾完仲係好多蟹籽，粒粒爆開做出雙重口感。
滾爺火鍋 (尖沙咀店)
地址: 尖沙咀金巴利道58-60號金碧閣地下A號舖
滾爺火鍋 (旺角店)
地址: 旺角上海街428號地舖
