鮨金和食料理 (已結業)

好朋友生日，禮物就免喇，一黎怕唔啱用，實質係懶得諗，所以同佢食餐好嘅代替。銅鑼灣Cubus出名多高級餐廳，其中鮨金和食料理係當中高質素之餘性價比亦較高嘅日本菜，佢除左有刺身壽司之外，亦有和牛Shabu Shabu。鮨金嘅店面比好多鮨店都要大，佢一邊係壽司吧檯，另一邊係普通餐枱，對於人多嘅食客傾偈會方便啲。朋友鍾意食魚生，而鮨金嘅刺身/壽司廚師發辦套餐就有三個唔同價位，由最平$1,098到最貴$1,798，我地揀左最貴嘅套餐彩雲($1,798)，佢包左24道菜，當中包括10款刺身同6款壽司/卷物，相比起好多高級鮨店都抵食。前菜 - 先黎三式前菜，最前面山芋蓉配水雲，山芋蓉本身冇乜味，不過配左下面嘅酸汁就好開胃，上面再放左三文魚籽點綴，下面嘅水雲有啲似髮菜。酸酸地好開胃。右上角係玉子豆腐，好滑溜，上面係黑魚子。左上角係黑梅背煮蘿蔔，黑梅貝有啲似東風螺，蘿蔔好腍冇渣。蟹肉蒸蛋 - 蒸蛋熱辣辣仲好滑，入面除左蟹肉仲有有冬菇、蝦同白果。師傅準備緊刺身時，可以先食啲醃菜，我最鍾意辣蒜頭，好惹味。室津蠔 - 生蠔超肥美，海水味適中，非常新鮮，食之前可以落少少青檸汁。左口魚 - 哩碟刺身分左兩個部份，前面厚身啲嘅係邊位，後面係薄切。左口魚魚味比較淡，薄切蘸酸汁食令魚鮮味更加突出，而邊位就可以蘸豉油食，口感爽口啲。平貝 - 同一款刺身，師傅用左三種唔同切法，味道雖然一樣，但食落就好唔同，我特別鍾意右邊嘅切法，因為特別厚身口感比較有口感。油甘魚 - 平時食油甘魚刺身都係食魚腩多，但今次就食倒兩個比較少食倒嘅部份。前面係油甘魚魚鮫，魚油非常豐富，後面係腦天，即係油甘魚頭頂嘅肉，魚味會濃啲，成條魚都係得嗰兩塊，非常矜貴。龍蝦 - 哩個set包左成隻龍蝦 ，師傅會將大部份龍蝦肉用黎做刺身，少部份用黎做其他菜式。龍蝦非常新鮮，放入口會感受倒龍蝦微微嘅震動，再配埋沖繩海鹽食，鮮味無窮。燒吞拿魚下巴 - 食完五款刺身之後就到熱食，吞拿魚下巴好大舊，魚皮燒到好香脆，下巴肉油脂滿滿，非常邪惡！深海池魚 - 哩個深海池魚同樣包括左兩個部位，前面係魚鮫，後面係魚腩，油脂甘香得黎唔會太膩，口感爽脆。海膽 - 杯入面有兩款唔同色嘅海膽，前面深色啲嘅係鹽水海膽，後面淺色啲係馬糞海膽，兩款海膽都非常鮮甜，不過前者味道就比較清甜。拖羅 - 一次過試勻大拖羅、中拖羅同中中拖羅，大拖羅超級肥美，入口即溶之外完全冇筋，油香味完全唔係中拖羅可以比。明太子龍蝦餃子 - 餃子非常熱辣辣，餃皮好薄好脆，中間釀左頭先用剩嘅龍蝦肉同明太子。龍蝦肉肉質結實彈口磯邊卷 - 第一次食磯邊卷，一般做法係用沙甸魚、芽蔥同醃蘿蔔卷成，但哩度嘅磯邊卷就用左池魚、鯖魚、紫酥葉同酸薑，紫酥葉同酸薑哩兩種食材本身味道就好大唔係人人能夠接受，但估唔到夾埋一齊酸酸甜甜咁又幾好食。赤身壽司 - 赤身雖然比拖羅平又冇乜脂肪，但食落比較有咬口，師傅喺上面已經加左醬油，就咁食都唔錯。梳子魚壽司 - 師傅用火槍輕燒過梳子魚，魚油都迫晒出黎，油香滿滿。牡丹蝦壽司 - 牡丹蝦本身已經非常鮮甜爽口，師傅再喺上面加埋蝦膏同自製嘅蝦油，蝦味特別濃郁。鮟鱇魚肝壽司 - 鮟鱇魚肝非常軟滑，所以佢亦好似豆腐咁好易爛，但壽司送上時魚肝仲可以保持原整，可見師傅嘅手技。魚肝半溶口感但食落又唔會太膩。粟米 & 玉子 - 粟米雪凍左，咬開好多汁又香甜。玉子燒好軟滑，口感似食緊布甸咁，仲好香蛋味。魚湯 - 魚湯落左好多魚骨去熬，煮到奶白色，非常鮮甜。水果 - 係蜜瓜同蘋果，蘋果好爽甜，不過蜜瓜未係最當造嘅時候，就唔算太甜。海鹽雪糕 - 最後食埋個雪糕，海鹽雪糕鹹味點到即止，食完大滿足。總結，哩類高級鮨店，食材新鮮度基本上無庸置疑，而鮨金相比其他鮨店差唔多價位嘅廚師發辦套餐菜式更豐富，食完真係會有好飽嘅感覺。今次喺鮨金食倒比較少見倒嘅油甘魚魚鮫、腦天，又見識到用唔同刀法處理平貝出黎感覺完全唔同，另外磯邊卷嘅創新配搭亦令人有驚喜。…查看更多

相識紀念日，先生定好枱食Omakase，這晚來到銅鑼灣開平道食廈 Cubus的『鮨金』晚膳，餐廳的金漆招牌好金呀～～室內貫徹金碧輝煌的日式設計風格，座位簡約又舒適。經理介紹『鮨金』除主打Omakase 外，也引入日本不同產地的最優等和牛，所以我們決定點2 個套餐，分別是廚師發辦 < 彩霞 > 和 ＜茶梅＞， 一次滿足兩個願望。廚師發辦 - 彩霞 $1680/位 前菜：蝦夷螺 ＞粟米凍 ＞ 水雲 粟米凍最特別，入口即溶， 好似飲緊栗米湯。水雲都唔錯，有三文魚籽同山芋蓉， 酸酸甜甜好開胃。 刺身拼盤：伊勢海老 ＞ 石垣鯛 響螺 ＞ 油甘魚薄切石垣鯛，好爽口！響螺，口感爽脆又彈牙，超鮮甜 ！！龍蝦，肉質透亮有彈性，正正正！！！ 鹽水海膽，有金箔玫瑰好靚靚，超鮮甜。刺身拼盤：金目鯛 ＞ 池魚配三星漬 梳子魚 ＞ 左口魚海膽卷金目鯛， 色澤紅潤，香滑夠厚度。池魚，肉質細膩甘香，令人齒頰留香。 梳子魚，炙燒過，帶些微焦香脆口。海膽卷，左口魚薄切，透亮清鮮， 海膽份量多，唯開始溶化及微腥。極品拖羅，配金箔魚子醬， 油脂甘香，入口即溶。壽司＋卷物 6貫 ： 赤身 ＞ 喜之次 ＞ 赤貝 赤睦魚 ＞ 銀鱈魚 ＞ 黃瓜卷喜之次， 肉質晶瑩透亮， 嫩滑又爽甜， 油脂豐富，完全無腥味。 赤鯥魚，魚皮輕炙燒過，入口即溶。銀鱈魚，刺身級別，柚子胡椒帶微辣， 鮮甜且入口即溶。燒吞拿魚下巴， 香噴噴， 肉厚嫩滑， 骨位仲燒到脆卜卜添 ！和牛餐同樣吸引 ～～廚師發辦 - 茶梅 $1080/位整個套餐都是A4，A5 頂級日本和牛，仲有安格斯牛小排坐鎮，有圖有真相，和牛色澤粉紅，霜降飛花，油花細密，真係好想快d 再去一次 ！！！重點： 先食和牛，再食蔬菜 ！！！套餐有6 款唔同地方的和牛，每款都柔軟嫩滑，原本想試真d 邊款最美味, 但真係每款都好驚喜，油香四溢，個人認為A5 的飛驒牛是當中的表表者， 無論油花， 軟滑度，牛味方面都非常出眾，做到入口即溶既效果。和牛輕滾幾秒，沾上醬油同食，肉質好柔嫩，入口慢慢融化，煮完牛肉，成煲湯甜到不得了，再煮蔬菜和讚岐烏冬，很讚。在『鮨金』過了一個好開心放鬆的夜晚，整體在服務和食物方面都頗高質素，鹽水海膽和極品拖羅尤為出色，和牛壽喜燒也令人垂涎三尺， 總括來說，所有紀念日，我都想來鮨金慶祝。鮨金地址：香港銅鑼灣開平道1號 Cubus 12樓月光太太🌙…查看更多

跟朋友閒聊分享上一次食Omakase的經歷，他反向我推介這一家餐廳，說是他試過最完美的，令我心癢癢，最後便預約了和太太一探究竟位置（9/10）：位於開平道的Cubus商廈12樓，附近有多座商場，港鐵銅鑼灣站F1出口步行只需5分鐘，地點方便環境（9/10）：餐廳裝修貴氣而簡約，有分吧枱及長枱位置，氣氛悠閒，冷氣夠，令人感覺非常舒適服務（10/10）：侍應積極幫忙加茶、換碟及收拾，而每上一道菜都會詳細介紹，經理面帶笑容地跟客人談天，毫不讓人感到壓力食物（9/10）：與一般Omakase不同的是，他們不會只有一兩款菜單或較單一食材（如刺身），令人驚喜不段，亦有另類的感覺彩雲（24道菜）～$1,680先點了一份常規的Omakase套餐，以下是其中一些重點介紹：前菜粟米凍～用粟米做的果凍，像粟米湯的味道，鮮甜順口:)水雲～微酸的水雲，配上香滑山芋蓉及魚籽，口感清新開胃蝦夷螺～用上甜豉油令螺味更提鮮，另附上一件香甜蘿蔔刺身石垣鯛～油脂豐富，魚味突出龍蝦～鮮甜龍蝦肉，配有竹炭鹽再提鮮響螺～肉質軟滑，非常新鮮油甘魚～厚切，油脂香而魚肉嫩滑鹽水海膽～來自北海道的鹽水海膽，本身味道相當鮮甜，有海水味，配上岩鹽會更鮮味池魚～肉質鮮嫩肥美，放上香蔥及三星漬，令本身油脂味更香更出金目鯛～魚肉肥美而無腥味，令人滿足梳子魚～由於梳子魚肉油分少，師傅把油脂豐富的魚皮炙燒令刺身充滿油香左口魚～魚肉結實充滿油香，師傅把左口魚卷住海膽成卷物，海膽較濃味，整體味道突出魚鮫拖羅（Kama Toro）～完美嫩滑口感，真正入口即溶，魚肉又香又綿，配上魚子醬及金箔更見高貴旬菜日本白粟米～極甜美的日本白粟米:)水果蕃茄～清甜而不酸的水果蕃茄壽司赤身～肉質較實有咬口，同時魚味較重:)喜知次～肉質細嫩，油脂豐富而溶化，肉汁流入壽司飯上赤貝～外爽內嫩，鮮甜味美銀鱈魚～富含融化的油鮨，魚香內嫩，配合柚子胡椒很鮮甜赤鯥～皮下脂肪高，油份豐富而嫩滑黃瓜卷～黃瓜香甜而開胃燒魚一品料理是日用上燒吞拿魚下巴，燒得香而肉嫩，有點微融的感覺，可沾上附上的檸檬或酸汁，去降低油膩感一品料理這款雞肉蛋餅煎得非常香，中間放上一隻鵪鶉蛋，蛋餅可沾附上的生雞蛋食，肉質會更幼滑可口湯品自家製餐湯是立魚湯，非常鮮甜香濃，令人想多喝幾口時令水果來自日本的蜜瓜很清甜味美茶梅～$1,080這是用上店家當日精選牛肉的壽喜燒套餐:)壽喜燒火鍋湯底～我們選了立魚濃湯湯底，非常香濃及鮮甜蔬菜籃～包括冬菇、金菇、香菇、硬豆腐、皇帝菜及紹菜，新鮮的蔬菜就是好牛肉盤～有美國安格斯、鹿兒島、山形、佐賀、熊本及飛驒六款牛肉，其中五款是和牛，份量不少，非常有誠意，牛肉亦很鮮味稻庭烏冬～幼滑順口的烏冬，是壽喜燒收尾的良伴甜品和太太點了桃味和青蘋果味兩款雪葩，水果味很突出，冰涼消暑亦香甜總結一下，這家Omakase非常高質，無論餐廳位置、服務、環境以至食物都很出色，更重要是套餐選擇多，令Omakase更為多元化🌺鮨金和食料理🌺地址：銅鑼灣開平道1號Cubus 12樓…查看更多

為答謝XO仔仗義相助，上週C兄特意相約於其相熟嘅「鮨金和食料理」請食廚師發辦晚餐。位於銅鑼灣名食廈內嘅壽司屋佔用面積全層，光線充裕，門面及室內嘅色調同店名一樣咁金黃，就連椅櫈都唔例外。用餐區域嘅左邊有個可容納十二人嘅壽司吧。右邊排出兩行二至多人合併式散座，抗疫期間嘅四人組合以屏風隔開，空間感足。壽司吧位嘅雲石桌上擺有齊備嘅自用餐具及口罩套，衛生企理。飲品餐牌共有十一頁之多。主人家要揸車，小肥就簡單啲飲三得利生啤（$70/杯）。晚市厚本餐牌中日對照，首兩頁先道出餐店嘅理念為「金」在矜貴及高質。餐牌上可見多款日本料理菜式，包括涮涮鍋、天婦羅、燒物、丼品等，內附彩圖及食材簡介，相當詳盡。主打魚生項目分為三頁散點項目及廚師發辦套餐。後者共有三款可選，分別為十六道菜嘅「綺羅星」（$980/位）、二十道菜嘅「水月」（$1,380/位）及二十四道菜嘅「彩霞」（$1,680/位）。原來C兄早已安排咗二人一同享用最豐富嘅「彩霞」，實在係太客氣啦！為晚餐作序先有前菜拼盤，建議由左方嘅池魚南蠻漬起，逆時針方向食。雖則師傅話池魚嘅骨咬爛少少就可以吞得，有陰影嘅小肥都係冇膽一試，不用多諗就轉讓咗俾老友記慢慢咬。右手邊隻杯仔入面嘅醃海蜇酸甜醒胃，混入咗青瓜粒即倍添爽脆。最上方嘅汁煮梅貝潤甜有嚼勁，伴配嘅蘿蔔亦清甜討好。接著別緻嘅小碗中有軟滑嫩甜嘅蟹肉蒸蛋。魚生環節開始前，師傅先備好清爽開胃嘅薑片、漬物及山葵，擺放於時尚精美嘅木造壽司盤上。首道岩手県赤崎生蠔肥厚爽滑，以黑魚籽點綴更覺鮮濃。扇形碟上嘅鹿兒島石垣鯛薄切白裡透粉紅，魚肉嘅色調及精美嘅碟盤當真猶如石垣鯛別號「夢幻之魚」般夢幻！於面掃上紫蘇花後捲起黎食，「DIY石垣鯛紫蘇卷」芳香爽實得黎有韌度，清甜細膩得很！銀邊白肉嘅深海池魚刺身為最肥美豐潤嘅腩位，倚在月半彎上流露著嘅詩意相信都可迷倒歌神。不用加上調味，日本白象拔蚌刺身已夠鮮甜爽脆。橙美亮麗嘅龍蝦刺身睇落好似熟咗咁，但其實爽潤彈牙嘅龍蝦肉仲係半透明嘅，只係師傅巧妙地塗上自制嘅龍蝦膏醬令菜式更明亮，味道亦鮮上加鮮。節令嘅日本蕃茄鮮紅多汁，作為間場成功為味蕾洗滌一番。嘻嘻，細佬都好有信心金盤上嘅燒吞拿魚下巴真係冇骨，面層燒焦嘅部份尤其香口，底下嘅魚肉則幼嫩甜濃，送酒極品也！第二節嘅刺身由金光閃閃嘅海膽玫瑰杯接棒，外觀矜貴大方，杯中嘅鹽水海膽量足滑溜，嫩甜甘香，掂呀！兩片薄薄嘅喜之次油脂豐腴，輕輕以火槍炙燒過以逼出魚油，潤澤嘅魚片香甜無比，滋味無窮。睇住師傅成隻鱈場蟹擺上砧板。。。三兩吓手勢就拆咗隻蟹蟹，重組後即任貴客影個夠。放喺面前嘅鱈場蟹啖啖都係肉，鬆厚幼嫩，甜美濕潤，塗點另上嘅蟹醋份外清新。一開三嘅磯煮鮑魚軟腍厚潤中極富彈性，邊邊位就最鮮濃入味。金邊黑碟上嘅吞拿魚魚鮫刺身色澤粉嫩無瑕，頂面伴配魚子醬、金箔及生磨山葵足以增添高貴嘅氣質，入口濃郁嘅鮮味及肥美即化於舌上，如果有得encore就好啦！是日精選一品料理為原條蟶子皇，極富立體感嘅擺盤震撼吸睛！已預先切開嘅蟶子爽彈脆身，黏上鮮美金黃嘅松露秘醬即添上潤滑及芬芳。壽司上場XO仔就會意到晚餐已轉入直路，第一件橙美嘅金目鯛壽司甘香厚潤。牡丹蝦壽司晶瑩爽濃，連同頂面濃甜嘅蝦膏一口食，鮮味迅即洋溢口腔。魚油豐沛嘅火炙赤鯥魚壽司爽嫩香口。深紅嘅吞拿魚醬油漬壽司肉厚鮮濃。個人最鍾情壓軸嘅火炙BB銀雪魚壽司，因其肉質纖幼嫩滑，咬落當中嘅柚子胡椒散發出微微辣勁，相當醒神。呈奶白色嘅自家製鯛魚湯鮮香暖胃，喝畢彷彿肚中嘅魚油已盡燒，腸胃舒暢得很！作結嘅一球桃味雪葩粉白清甜，於炎炎夏日特別爽涼！樓上壽司屋「鮨金和食料理」環境闊落，服務生及師傅們同樣友善專業，晚市廚師發辦用材新鮮高質，彩艷豐盛，美味可口，賣相設計及配備嘅碟盤明顯亦有花下心思，非常感激C兄盛設款待！…查看更多

因為今日好開心，所以約同好友一同吃大餐，經一番商量後就決定去這裡吃一個不一樣的日本料理。坐下後，經經理一番介紹下，我就選了一個又有刺身，又有壽司，又有熟食的彩霞套餐，一於今晚豪一晚啦！前菜有海蜇，東風螺和芝蔴豆腐，最出色是芝蔴豆腐，很香芝蔴味，豆腐又滑，東風螺用上醬汁煮成，很少這樣吃東風螺，海蜇都很爽口。蟹肉蒸蛋，用上上湯蟹肉來蒸蛋，很鮮味可口。刺身有十款，分兩個階段上，刺身很新鮮，長崎蠔很爽很鮮甜。左口魚薄切加上醋汁番紫蘇花，味道很夾。白象拔蚌很鮮甜，很爽口，賣相也很美！龍蝦刺身，肉質爽，清甜可口。深海池魚刺身，肉質實淨，很鮮美。師博很詳細的介紹每一個菜之餘，也會為每一項的菜而出一些醃菜令人客可以清一清口腔，他好多時都會把醃菜都整得很有心思。就算是醃蘿蔔都會切片捲入蕎頭，味道很豐富，一點都不會馬虎呢！第二part 的五款刺身，師傅用上活油甘魚鮫做刺身，真的未曾試過，又刁鑽，口感爽爽的，肉感紮實。很好吃！熒光墨魚很鮮美，加上醬油和薑蓉，有另一番風味！針魚刺身，師傅很有心機的用上紫菜，再放上針魚，再切一段段，再砌成樹葉形態的針魚刺身，很有心思，很驚喜，聽師傅說，因針魚吃上去易散，故他想到用紫菜放底，再加入針魚，令食客吃上去不會有散的感覺，師傅真的想得周到！鹽水海膽成杯上，份量很多，味道很鮮甜，味道比一般的濃郁，真的百吃不厭，師傅還加上金鉑裝飾，很精緻！拖羅刺身，拖羅上加上魚子醬，口感當然無得頂，油脂分怖均勻，魚子醬又減低了油脂的油膩感，非常好吃！燒魚一品料理，今日廚師為我們做了一個燒吞拿魚下巴，揀的部位很刁鑽，聽師傅說吞拿魚下巴都很大舊，可以供四人食用。魚肉很滑，我還吃到下巴裡的骨膠原，燒得也很香，下巴出奇的多肉很好吃！北寄貝熱食加蟹肉海藻汁，將北寄貝輕輕燒一燒，加入蟹肉海藻汁，很甜甜嫰滑，北寄貝還很多肉，真的吃得很滿足！壽司４款，金目魚加魚肝醬壽司，用上矜貴的金目再加上魚肝，鮮味得來帶點香濃，簡直是濃淡得宜，很出色！池魚壽司新鮮，肉質同深海池魚不同，沒有深海池魚的那麼結實，多一份軟腍，加上薑蓉，很可口！赤鯥魚壽司 ，我就從來沒有吃過，今次也是第一次吃到，赤鯥魚用上火炙做，香軟濃滑夾雜一起，真的很難形容，總之就很很很好吃！鰈魚邊壽司，鰈魚邊肥質很肥美，油份也是很高，一吃上去就已經深深愛上，甘香的魚油在口腔不停徘徊，非常好吃！今日的旬菜原來是無花果，這裡用上日本無花果，很香很清甜可口，熟度啱啱好，很少吃到這個質素的無花果，好味！自家制的立魚湯，不用多說，鮮甜無比，溫度又夠熱，喝上去令捨不同！吃到最後就是時令水果，今日有蜜瓜和香梨，為今日的晚餐劃上完美句號！…查看更多