大灰熊廚房

營業中

休息中

一位住將軍澳既朋友推介我黎呢間中式小廚，果然好食，價錢又合理，朋友係無飯主婦，唔怪之得成為佢一家既開飯食堂。一向鍾意飲中式湯水，所以一人叫左一個姬松茸燉湯，燉湯真材實料，有姬松茸、雞腳、瘦肉，仲無添加味精，每一啖湯都充滿濃郁菇菌味，忍唔住一口氣飲哂一盅。頭盤小食叫左黃金豆腐粒，豆腐外皮金黃香脆，豆腐熱辣辣軟腍腍，面頭灑上蒜粒，香口美味!小菜叫左2款: 千島蝦球、拔絲咕嚕肉，食埋主菜就再引證呢間餐廳有一定既水準。千島蝦球 : 粒粒蝦球都大大隻而且炸到香脆，千島汁好適合呢個咁熱既天氣，令到人胃口大開。拔絲咕嚕肉 : 又係一款開胃小菜，咕嚕肉既肉質半肥半瘦，食落有爽口感覺，係靚肉質部位，唔似一般樓酒啲肉質咁”鞋口”。總括呢餐係一餐令人滿足既晚飯，仲不時聽到隔離枱食客話食物好味道，餐廳地點雖較遠但一定值得再去。

涼拌青瓜味道非常好，而且唔會好辣，唔食得辣嘅朋友都絕對食到。椒鹽粟米今次都係我第一次食咁樣處理嘅粟米。咸香得嚟又好鮮甜。作為前菜小食真係唔錯。蟲草花燉湯燉湯好清，蟲草花味出哂嚟。最緊要係雖然簡簡單單，但完全程現返食材原有嘅味道。姬松茸燉湯至於依款姬松茸燉湯，飲落清潤美味。聽講姬松茸有肋健脾消脂，增強免疫力，真係幾啱飲。大灰熊小炒王一般小炒王必備嘅都是韮菜、蝦乾、豆腐同魷魚等，亦有餐廳加入五花肉絲或者豬油渣。大灰熊小炒王雖然無魷魚，但就加入咗大大隻嘅鮮蝦。大灰熊小炒王都好夠獲氣。用嚟餸飯，或者當飲啤小菜都非常掂。三色蒸蛋月牙碟好有特色，而個蒸蛋好有家嘅味道。蛋滑而香，而內裏仲混有皮蛋同咸蛋，入口蛋香層次更加豐富。

黎將軍澳探朋友，佢帶左我去佢附近一間餐廳食飯。我地叫左2人餐$188，有湯，兩款小菜，飯同飲品。因為我作戰左整日，實在太肚餓，所以加左2款小食。黃金豆腐粒 $38佢吸油做得好好，完全冇油，食落口，好脆但又食到豆腐滑溜的感覺👍椒鹽粟米🌽 $38比較小食到呢種口味既粟米，幾特別，唔錯。姬松茸燉湯 （每位+$15）湯品好足料，而且幾濃既松茸味，感覺都係冇落味精，單純靠材料提升佢既味道。中式豬排酸酸地，似士多啤梨骨個種味道，送飯一流😋欖菜肉鬆四季豆絕對要贊佢既四季豆係完全食唔到絲，佢清理豆筋清得非常好。雖然配欖菜炒，但唔會有好油既感覺，既好味又健康。姜汁湯圓最後店家送左甜品俾我地，天氣開始凍，飲姜湯保下暖都唔錯。佢個湯圓皮薄，配上姜汁湯都係好好味。呢間店舖絕對有驚喜，而且要贊佢每一道菜，上菜時都仲係好熱辣辣，熱度都仲可以維持一段時間，對於而家天氣開始凍黎講都幾重要。