Chill嘆週末!黃宗澤蠔吧新推任食生蠔Brunch (有片)
2019-03-06

每個星期好唔容易先等到weekend,梗係想去chill下放鬆下,最好成日咩都唔使做唔使諗就正正子。機會嚟喇飛雲,去尖沙咀搵黃宗澤(Bosco)……開嗰間蠔吧吖~ 今個weekend開始推出Brunch優惠,生蠔任食,香檳任飲,嘆返幾個鐘享受下慢活嘅時光啦。

新推出嘅brunch,包括咗一個豐富嘅全日早餐(炒蛋/煎蛋/水波蛋配煙肉、豬肉腸、扒蕃茄、田園沙律、生果杯),另有餐湯/果汁同埋一杯嘢飲,亦可添加西冷牛扒、燒澳洲羊扒等主菜。

不過,重點當然係任食生蠔啦!有兩個選擇嘅,想試下多幾個唔同國家嘅生蠔嘅話,可以揀加$288要個環球生蠔,唔同時令同季節就會有唔同嘅生蠔提供,呢期供應緊嘅就有愛爾蘭嘅Majestic、另外仲有啲西班牙同日本嘅生蠔;當然,如果你哋好似Bosco咁,係法國蠔擁躉嘅話,就可以加$320任食法國生蠔!

「我自己鍾意生蠔嘅國家係法國,因為我覺得佢哋複雜啲,層次多啲,口味上係好大嘅分別。但最近呢年零,好多韓國蠔、日本蠔都有幾好嘅質素。」Bosco仲話佢試過一日最多食成兩三打生蠔!不過嗰陣係因為餐廳新開業,要試好多唔同供應商、品牌、國家嘅蠔先至咁「蠔」食法,最後仲搞到肚瀉添~ 所以雖然任食生蠔係好開心,但Bosco都補充話凡事要適可而止呀。

餐廳本身都係以生蠔作主打,提供嘅生蠔全部都好新鮮,至於揀邊個國家嘅蠔就視乎返各位大大嘅口味啦。西班牙嗰啲就 creamy 啲、蠔味濃啲, 帶有甘香; 日本嘅就海水味濃啲、鹹啲,裙邊位爽口而帶子位鮮甜;如果都鍾意海水味但又唔想太鹹嘅,就愛爾蘭生蠔啦,口感仲好creamy同有 層次感;至於大眾飛佛嘅法國生蠔,有層次感之餘,帶子位仲相當甜。 餐廳仲特設咗三款自家調製嘅醬汁配襯生蠔,分別係Cocktail sauce、紅酒醋薄荷汁同微辣嘅泰式汁。

話明要享受要chill,食生蠔點可以冇酒?另加錢就可以無限添飲紅、白酒或者香檳啦。

原來呢個任食生蠔任飲香檳嘅brunch諗法,除咗係因為好多朋友同Bosco講話想試之外,仲係因為Bosco最近一次嘅旅行經歷:「上一次我去西班牙嗰陣,我去啲街巿入面行,見到啲海鮮檔,啲西班牙人朝早十點零鐘就坐咗喺度飲香檳,好嘆咁食海鮮喎。」咁Bosco同佢哋傾下偈,好奇點解佢哋咁早就飲香檳。點知啲西班牙人就答佢「係咁㗎我哋西班牙人,放假冇杯香檳係唔似放緊假。」Bosco覺得佢哋真係好享受生活。「我覺得又啱喎,你放假都唔使諗嗰日要做乜嘢㗎啦,嚟到享受下食物,飲杯香檳relax下,係一件幾舒服嘅事。」

餐廳另外仲有兩款新菜式介紹返,分別係紐西蘭羽龍蝦意大利飯,同香煎白鱈魚伴乾元貝碎配野菌汁。前者用火槍輕輕燒一燒隻Scampi至半熟狀態,再加入魚子同淋上龍蝦汁,入口鮮甜。

至於後者,嗰啲泡沫唔止有視覺效果,食落仲好有驚喜,傳出陣陣乾瑤柱嘅鹹香,原來係大廚先用海鮮同乾瑤柱一齊煲熬,之後再打泡而製成,沾埋煎魚一齊食即刻層次感大升。


Brunch
推出日期:3月9日起
時段:11:30 – 16:00 (逢星期六、日及公眾假期供應)

Oystermine Restaurant
地址:尖沙咀廣東道33號中港城第三座平台1A號舖


鳴謝
Wardrobe : Zadig & Voltaire
Stylist : Queenie Yu
Hair : Jun @ HH salon.nail
Make Up : Miko Wong by Cyrus Lee team


文:Kar
相、片:Tom Li


關鍵字
生蠔
任食
香檳
任飲
尖沙咀
名人店
brunch
飲食潮流
開飯仔為大家發掘香港這個美食之都的最新美食資訊,分享飲食潮流文化。
餐廳資料
本月熱門
【隨時更新】便利店尋寶 每周新品速報
3天前
尖沙咀新商場開幕 過江龍餐廳一覽
2019-10-11
【特約分享】食魚生轉運 三種好意頭日本海產介紹
7天前
亞洲首間 Tiffany Blue Box Café 打卡必到!三層架下午茶 + 棉花糖雞尾酒
2019-10-08
日本人氣茶室登陸尖沙咀 招牌Tea Set、甜品推介(有片)
2019-09-25