Chill住嘆Tea!9月份下午茶推介
2021-09-06

雖然話已經過咗暑假,但9月份嘅天氣仍然係咁炎熱呀,都係留返喺室內嘆吓afternoon tea好啲。踏入9月,唔少酒店同餐廳都推出全新嘅下午茶,有卡通主題、親子tea set同日系下午茶,無論你係想同閨蜜聚會定親子活動都無問題!


中西美點配精品咖啡 Gallery

想體驗貴婦下午茶,尖沙咀呢間酒店餐廳嘅中西fusion下午茶就啱晒你!下午茶以酒店米芝蓮餐廳嘅菜式為靈感,鹹點方面包括蘑菇慕絲撻、慢煮三文魚醬拌三文魚籽及菠菜蓉及叉燒焗餐包;甜品特別推介柚子抹茶蛋糕及青蘋果白蘭地慕絲,前者集齊柚子清香、抹茶甘苦及蛋糕香甜,層次豐富;後者酒味都幾香濃。各款中西點心配以東京精品咖啡品牌Omotesando Koffee嘅咖啡及瑜茶舍嘅茶,絕對係一個難忘嘅體驗。

供應時間: 下午2:30-6:00

價錢: 平日每位$308、假日$338


MiFFY主題三層架 Pound & Roll 

怎麼可以吃兔兔!MiFFY CAFÉ限定店正式登陸尖沙咀呢間西餐廳,下午茶必試MiFFY甜點三層架($288/兩位用),以MiFFY造型三層架盛載嘅下午茶有6款甜點及特製飲品,包括馬卡龍、法國牛油蛋糕、泡芙、24個月巴馬火腿同新鮮生果等,超可愛!想食啲鹹嘢有呢款MiFFY芝士海鮮雜錦火鍋($388/兩位用、$768/四位用),食材一樣以三層架盛載,雜錦火鍋包括大虎蝦、日本北海道帶子、青口等,配以四重傳統芝士,包括瑞士Gruyere、Fontina、Fmmental及意大利Mozzarella,芝士味好濃厚,造型又啱晒相機食先,粉絲mark低啦。

供應日期: 8月28日至11月27日


日系林中鳥舍風格 Sensu 

呢間日系輕食cafe喺荃灣都略有名氣,招牌綠野仙蹤下午茶備受歡迎!最近餐廳喺沙田新開分店,同樣以森系同林中鳥舍風格作主題,仲推出呢個全新青の鵲舍2人下午茶($368),點心以鳥籠造型嘅三層架盛載,加埋木系裝潢同藍綠色乾花陪襯,確係有種置身於森林嘆tea嘅感覺~鹹點方面幾推介明太子蛋醬三文治,明太子味道鹹香惹味,仲有酥脆外層加上清新茉莉花雜莓醬既布列塔尼酥餅;甜品必試薰衣草芝士蛋糕,芝士蛋糕帶有淡淡薰衣草香氣,感覺無咁膩。

訂座同時訂餐優惠: $276青の鵲舍2人下午茶


童心童趣親子下午茶 SEVVA

一家大細去嘆tea嘅,位於中環太子大廈頂樓嘅餐廳係唔錯嘅選擇。呢輪佢哋推出童心童趣親子下午茶,加入唔少趣怪又玩味十足嘅元素,如糖霜小狗、趣緻小丑、彩虹糖同熊仔軟糖,小朋友一定鍾意。另外所有甜鹹點都幾啱小朋友嘅口味,好似一口免治雞肉及蛋沙律三文治、迷你黑豚肉腸熱狗同芝士通心粉春卷等;甜品就有香蕉芭菲、朱古力花生醬慕斯杯同彩虹啫喱配法式雲尼拿奶凍等。而且餐廳位於頂層,環境夠開揚,可以喺靚景下享受天倫之樂,絕對係一大享受!溫馨提示要早三日預訂呀。

價錢: $720


限定Fusion料理下午茶 Say Hi Bar & Dining 

呢間餐廳聯乘兩大人氣本土手工甜品品牌推出Flawless 3.3 日式下午茶,仲有4款招牌鹹點,包括餐廳招牌之一嘅創意Fusion小食香煎帶子紅燒肉,帶子煎得香口,將五花肉塊以細火燉煮,燴至鬆軟入味,然後再先焗後煎,令五花肉皮脆肉嫩,配埋番茄莎莎醬又無咁油膩。甜品方面Grandma’s Scones嘅英式鬆餅富牛油味香濃,搭配甘香嘅日本焙茶粉同茶葉以及煙韌帶甜嘅台灣麻糬,好有日式風味;而Moono嘅純素甜品撻,採用日本濃豆乳同白米粉等製成,入口甜而不膩,好清爽!


供應日期: 星期一至四及星期六,下午14:00-17:00

價錢: $198/位、$396/兩位



文: Yanica
編:Kar


關鍵字
下午茶
三層架
打卡
尖沙咀
沙田
中環
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【2021生日優惠】持續更新!9月壽星嘆Omakase送壽司蛋糕+清酒
2021-08-31
【隨時更新】零食速報 每周新款零食、酒品點評
7天前
【特約分享】Happy Hour飲番杯Schweppes®期間限定特飲!9間必去銅鑼灣餐廳(下)
2021-08-31
Chill住嘆Tea!9月份下午茶推介
2021-09-06
8月份好評餐廳十強
2021-09-08