唔少香港人去日本密過返鄉下，普通和牛燒肉可能已經滿足唔到大家？呢間新開嘅日本和牛燒肉食堂就以日本同香港新興嘅飛驒牛，同有「日本第一牛」之稱嘅鹿兒島黑牛做賣點。最緊要嘅係定價唔離地，味蕾滿足之餘又唔怕肉赤吖嘛。
 

多汁霜降飛驒牛

飛驒牛牛肋骨肉

首先長氣都要介紹一下飛驒牛，只有喺指日本岐阜縣養殖14個月或以上嘅黑毛和牛，兼得到日本食肉格付協會指定評級，先可以叫做飛驒牛。特色係脂肪分佈平均，特別係肋脊部嘅牛肋骨肉，霜降紋理令牛肉口感柔軟，屬於可當刺身食用嘅級別。
 

極上特選和牛定食（6切）（$238）（9切 $298）

而味之亭網燒食堂嘅極上特選和牛定食，主菜就係燒飛驒牛牛肋骨肉，油亮而且帶粉嫩嘅燒肉賣相已經令人食指大動，入口即溶而且充滿肉汁。
 

因為油花香味十足，所以開飯仔建議點少少岩鹽就得，覺得有啲膩先再擠啲青檸汁。
 

 
鹿兒島黑牛三重享受

（左至右）鹿兒島黑牛肉眼、西冷、牛肋肉

另一主打係鹿兒島黑牛，舊年先得到日本和牛能力共進會頒發嘅團體綜合優勝賞，因而有「日本第一牛」嘅稱號。餐廳選用A4等級嘅鹿兒島黑牛，油花網紋分佈細緻。
 

極上和牛三色盛合定食（6切）（$218）（9切 $278）

而呢份牛三色盛合就可以一次過試哂牛肉眼、西冷、牛肋肉三個部位，西冷富油脂甘香，肉眼筋比較多，而牛肋肉略嫌有啲渣，但亦係牛香最濃郁個部位。
 

定食套餐除咗燒肉主食出色之外，其實飯同烏冬同樣精挑細選過。餐廳選用青森縣嘅まっしぐら米，特色係比一般日本米大粒飽滿，煮熟後口感軟熟而粘度適中。大胃王可以加$30將改為讚岐手打鳥冬，烏冬滑溜煙韌，配埋溏心蛋十分滿足。除咗牛肉之外，仲有日本黑豚、雞肉、鰻魚等丼飯同烏冬選擇，青衣嘅街坊今次有食神啦。
 

味之亭網燒食堂
青衣青敬路33號青衣城2期2樓224號舖

文、相、片：Cathy