近年雞蛋仔唔再局限於傳統口味，愈嚟愈多店舖加入唔同食材，大玩創意款式，變成打卡同味覺嘅雙重享受！今次就同大家嚟個特色雞蛋仔合集，由雙皮奶雞蛋仔、章魚燒到清香嘅茉莉花茶口味都有，絕對顛覆你對雞蛋仔嘅想像～
馳名雙皮奶雞蛋仔 THE CAPTAIN'S
圖：少有主打雞蛋仔同炸魚嘅小店，中環分店仲有埋斯里蘭卡菜式𠻹～全港首創嘅雙皮奶雞蛋仔絕對係必食！師傅即叫即整，每粒都係實心飽滿，咬開爆出香濃雙皮奶餡，奶香同蛋香都好濃厚，口感細滑又creamy，但完全唔會膩；而且外層脆卜卜，內裡嫩滑軟糯，食落層次感豐富。其他fusion口味仲有蛋撻雞蛋仔同泰式奶茶，前者餡料有淡淡焦糖同蛋香味；後者茶香濃郁帶少少甜，每一款獨特得嚟幾有親切感～
章魚燒雞蛋仔 蛋仔記雞蛋仔
圖：呢間一向主打創意配搭，雞蛋仔即叫即整，熱辣辣又香脆，內裡鬆軟帶蛋香，仲加埋唔同fusion元素～章魚燒雞蛋仔就夠晒特別，外脆內軟嘅雞蛋仔粒粒都包住章魚粒，配埋紫菜同木魚絲，好似將日式章魚燒同港式雞蛋仔二合為一咁。另一款香蕉朱古力雞蛋仔就甜到入心，朱古力濃厚，配埋香蕉嘅果香，食落香甜滿足，大人小朋友都啱食。仲有伯爵茶麻糬雞蛋仔，茶香突出，配上煙韌麻糬，外脆內Q，啖啖都有誠意。無論你想試新奇口味，抑或搵返童年雞蛋仔嘅味道，呢度都幫到你！
香甜斑蘭口味 摩豆
圖：主打多款創意雞蛋仔同格仔餅，價錢親民之餘，款式仲多到令人選擇困難，無論係甜或鹹都應有盡有，深受街坊同學生歡迎。必試斑蘭雞蛋仔，翠綠色賣相好吸睛，外層脆卜卜，內裡保留軟糯口感，咬落層次豐富，雖然斑蘭味唔算特別濃，但帶有淡淡清香，配埋麻糬更有口感。另一款羅宋湯雞蛋仔就非常新奇，內裡有薯仔等配料，再加埋肉鬆一齊食，鹹香交融，幾有驚喜；仲有特別版土鳳梨酥雞蛋仔，滿滿嘅鳳梨果蓉酸甜開胃，係旺角區不可錯過嘅雞蛋仔小店。
茶香雞蛋仔 活在茶下
圖：小清新茶飲甜品店，主打各式茶飲同輕食，最有特色嘅係佢哋將茶香融入雞蛋仔同甜品之中，食落特別有層次感。茉莉花茶雞蛋仔係招牌之一，茶香淡雅清新，甜度適中，雞蛋仔入口軟糯帶微脆，愈食愈回甘。另一款杭州桂花雞蛋仔，每粒都食到桂花清香，脆身之餘仲帶住花香氣息，好難停口。想清涼少少可以試清香鐵觀音髒髒雪糕配雞蛋仔，冰涼甘醇嘅雪糕同脆卜卜嘅雞蛋仔一齊食，茶香、奶香同蛋香互相交織，層次豐富又消暑。
花生糯米糍雞蛋仔 豬隊友
圖：雞蛋仔款式創新多變，幾乎每次去都有新驚喜！最特別嘅一定係花生糯米糍雞蛋仔，粒粒雞蛋仔都有糯米糍包住花生餡，口感煙韌又帶濃濃花生香，兩個人share一底都好滿足。仲有芝士控必試嘅雙重芝士雞蛋仔，邊位焦脆，中間軟糯，粒粒都拉絲兼鹹香；而芝麻肉鬆雞蛋仔就每啖都食到肉鬆，好適合鍾意偏重口味嘅朋友。甜點口味推介法式焦糖燉蛋雞蛋仔，入口好滑，食到燉蛋嘅甜香，飽肚又特別～
更多OpenRice詳細推介：
► 【專訪】人氣越南法包外賣店轉戰堂食 老闆：「將我哋嘅心機夾落法包入面」(按此)
►【2025中秋】10+創意月餅/特色禮盒/早鳥優惠推介 (按此)
► 2025兩餸飯合集！ $35任食放題/泰式主題/素食兩餸飯 (按此)
文：Yanica
編：Cathy
