2019台北米芝蓮車胎人推介出爐!12間新上榜餐廳全介紹
2019-03-27

《米芝蓮指南臺北 2019》完整名單4月10號公佈,今日率先公開車胎人(Bib Gourmand)推介,即係1300台幣食到三道水準菜式嘅平靚正美食店。今年有12間首度上榜,包括傳統台灣料理、港人最愛嘅牛肉麵、印度菜、四川菜等等,非常多元化。
 

台灣地道麵食

紅酒配精品牛肉麵 天下三絕

餐廳名嘅三絕係指新鮮食材、烹飪技巧同廚師嘅三心:用心、愛心、專心。牛肉麵嘅湯底採用大量蔬果、四種蕃茄、兩種洋蔥同大量牛扒熬成,牛肉選用澳洲同美國牛,連麵都用澳洲黃金小麥製作,而且有配紅酒嘅套餐,好有新鮮感!


圖:Angelababy 享樂日記

 
細細碗惹味切仔麵 阿國切仔麵

切仔麵又叫黃湯麵,呢間嘅切仔麵係用Q彈油麵,配純大骨熬製嘅高湯、豆芽、油蔥同紅醬,細細碗都夠晒惹味。其他小菜包括生腸、鹹水鵝、紅燒肉等都值得一試。


圖:老K愛美食


紅燒肉配切仔麵 賣麵炎仔

隱身喺大稻埕巷弄中嘅呢個檔口同樣主打切仔麵,開店超過80年,而家已經傳到第三代。湯底用下水湯同邊仔骨熬成,啖啖滋味。而紅燒肉更加係每枱必點,炸至外脆內軟,而且仲Keep到肉汁!


圖:周花花 甲飽沒


傳統、新派台灣料理

80年歷史古法台灣菜 義興樓

1938年創業,由街邊嘅小麵攤逐漸變成而家由第四代主理嘅傳統台灣菜館。招牌金錢蝦餅依然沿用古法選擇豬後腿油肉製作,其他菜式例如五香雞捲、豬腦煎蛋、炸卜肉、芋頭酥都係心機之作。


圖:Superp


排隊食高CP值鵝肉料理 阿城鵝肉

店如其名主打鵝肉料理,鄰近捷運行天宮站加上價錢相宜,所以經常坐滿鍾意食鵝肉嘅台灣人。招牌煙燻鵝肉可以按自己口味揀較瘦嘅前半段,或者較嫩嘅後半段。其他小菜亦有水準。


圖:魯智深與二鍋頭


復古50年代農家風情 女娘的店

以50年代台灣農村生活為主題嘅台灣菜館,裝修甚有古早味道,而且因為藝人徐若瑄同金城武都嚟過,更加成為唔少日本遊客必到餐廳。菜脯蛋、豆豉肉、焢肉,同豬油飯都係熱賣菜式。


圖:餐廳提供


老店Young Line創意菜 欣葉小聚今品

台菜老店欣葉開設嘅Young Line,今品嘅意思正係「古味今品」。保留道地台菜功夫,再加入生活靈感,變出XO醬豬肝蘿蔔糕、三杯彈Q豬腳、青龍皮皮挫等創意菜式,成功打入年輕人市場。


圖:milkfans


各地菜式大集合

香氣誘人印度菜 番紅花印度美饌

以香料番紅花為名,呢間印度菜館由印度主廚主理,供應正統北印料理,而且門口就可以透過玻璃窗見到印度廚師炮製烤餅。各式咖喱都加入多款印度香料,無論配烤餅定番紅花飯都咁啱。難怪成功由之前嘅米芝蓮餐盤推薦變成車胎人推介。


圖:米兒情事


老布殊食過京菜老店 都一處

美國前總統老布殊都係座上客,呢間北京菜館創辦人徐繼聲嘅表叔正係慈禧御廚博繼昆,開店至今70年依然主打正宗北方菜。蔥油餅、褡褳火燒、醬肉芝麻燒餅都係必試推介。


圖:Cindy - Food Makes Me Happy


韓綜都去嘅川菜館 四川吳抄手

開業超過67年,而家由第三代主理嘅四川吳抄手出現過喺韓國綜藝節目《花樣爺爺》當中,去年已經得到米芝蓮餐盤推薦,今年「升呢」成為車胎人推介!雖然以抄手為店名,但其實佢地嘅麻辣鍋、成都水煮牛等麻辣菜式更受台灣人歡迎。


圖:蔡甜甜Evonne


老字號懷舊江浙菜 榮榮園

1965由師承上海老師傅嘅黃呈郎先生創立,集合上海、楊州、溫州、杭州、寧波、紹興等地菜式,堅持用正宗手法炮製。招牌烤排骨、外婆肉、砂鍋蟹粉獅子頭、紅燒托肺等都係相當耗時嘅手工菜。


圖:夢與幻的地圖


心機正宗雲南菜 人和園

1954年創業,係唔少老饕同日本遊客嘅心頭好之一,主打正宗雲南菜。現由第二代接手,每年都會帶廚造訪雲南。菜式選擇豐富,招牌菜之一干煸香菇用撕成一條條嘅菇先炸後炒,香脆惹味。


圖:Joyce美食地圖ubiquitously




文:Cathy

關鍵字
米芝蓮
台北
車胎人推介
牛肉麵
台灣菜
開飯專題
開飯仔為你提供各類型最新飲食情報及優惠,全面照顧你的飲食喜好。
本月熱門
【隨時更新】便利店尋寶 每周新品速報
2019-12-30
荃灣新開無敵海景日式放題 佔地過萬呎 新張期間88折!
2020-01-03
【2019回顧】 過江龍之年 逾50間海外人氣店登陸 + 2020年預告 (有片)
2019-12-30
【特約分享】新年去始創 食盡中、日、國際賀年佳餚
5天前
迎接全新2020 1-2月下午茶推介
2020-01-06