近年興食Omakase（廚師發辦），但唔少餐廳最平嘅Set都要四位數字起跳。有無可以輕嘗Omakase滋味但又錫住荷包嘅選擇？灣仔呢間新開嘅日本菜餐廳就得！用九段木層架上枱，可以揀食刺身、壽司或者種類更多嘅變化丼，最緊要嘅係最平$198有交易呀。
 

福岡.烏龍魚男就咁聽個名都係唔太清楚究竟有咩食，其實要拆開「福岡」、「烏龍」同「魚男」三項嚟理解：餐廳選用唔少福岡特色海鮮，仲有石丸製麵最出名嘅烏龍麵，最後「魚男」同餐廳Logo嘅魚釣係代表海鮮選擇非常多元化！
 

必食步步高升九層架

魚男九段壽司盛 9貫（極上）（$298）（目 $198）

未到農曆新年先祝大家步步高升？其實係呢度嘅招牌魚男九段盛會用九段木層架奉上，半圓上一級級都擺滿美食，夠架勢之餘仲最啱相機食先。
 

同一般Omakase一樣，9貫壽司會由師傅挑選當日最新鮮嘅海產，而兩款價錢可以按喜好選擇。例如極上Set會有牡丹蝦、池魚王等，不過比較平嘅Set亦必有福岡盛產嘅池魚。加上各地海產係每日新鮮直送，計返真係幾抵食！
 

魚男九段變化丼（特盛）（$238）

貪心啲想試多幾款，可以點呢個九段變化丼，有齊前菜、刺身、蛋卷、壽司、天婦羅。建議從底食到上最高。值得一讃嘅係刺身都非常新鮮，其他食物亦有板有眼，唯一要扣分嘅係蛋卷乾咗少少。
 

而魚男九段盛都可以選擇主食，好似丼飯或卷物，而比較特別嘅係茶壺烏龍麵。烏龍麵其實即係烏冬，而呢度特別選用日本石丸製麵嘅出品，口感特別滑同結實。而且湯底亦係用魚骨熬成，有鮮魚香而完全唔腥。
 

 
華麗刺身盛合+特色茶巾鰻魚飯

刺身盛合 二人前（時令）（$338）

餐廳其他菜式亦相當花心思，刺身盛合就特別用樹枝做餐具同裝飾，賣相先贏。二人前會有7款刺身，唔少都係從福岡或者九州嘅魚市場直送，好似最近時令推介就有目仁奈、仿佛同伊佐木魚。
 

溫馨提示一句，雖然師傅會按時令選擇當然最新鮮嘅海產，但如果你有唔鍾意食嘅海鮮，亦可以喺落單嘅時候同店員講，師傅會按情況配合嘅。
 

茶巾鰻魚飯定食（$158）

舖喺鰻魚飯上面嘅黃色茶巾，其實係食得嘅蛋皮！推介大家可以用蛋皮包住鰻魚同飯一齊食，微甜嘅蛋皮再添一層鬆軟嘅口感，非常討好。而鰻魚燒得夠香亦算厚身，不過開飯仔食到有一兩條細骨要扣返少少分。但勝在另上照燒汁，啱哂鍾意用汁撈飯食嘅香港人。
 

茶巾同鰻魚都介紹過，最後就要提到飯啦。白飯有咩好講？皆因餐廳特別選用宮城縣登米出產嘅稻米，當地耕地肥沃加上水源豐富，出產嘅米亦係高品質。飯粒食落口感帶煙韌，而且一年四季出產質素穩定，加上飯粒粘性較高嘅特色，當然最適合做壽司等日本菜！
 

福岡.烏龍魚男
灣仔灣仔道221A號地下

文、相、片：Cathy