11月份好評餐廳十強
2020-12-03

疫情反反覆覆,對餐飲業影響都幾大,少咗人出街食飯,餐廳內用餐嘅人數又有限制,生意難做啊。而喺呢個時勢,出街食飯都變得唔容易,就更加要揀啲好餐廳食飯。以下呢十間,就係11月內獲得大眾寵幸嘅餐廳啦。

第10位  你妳

 圖:FavouriteFoodLifehyehyeon

連續兩個月上榜嘅荃灣小店,主打創意新派台灣菜,例如有珍珠魯肉飯同珍珠奶茶手作吐司咁,對於吸引一眾台灣迷同珍珠控係有一手。多款厚厚嘅三文治,好有台灣感覺,推介芋見紫薯吐司呀,一深一淺嘅紫色夾埋一齊,份外治癒。仲有大家最愛嘅仙草芋圓甜品,算係解一解大家對台灣嘅念掛。

第9位 椰粉湯紅(*新上榜)  

 圖:Ashleyyy_Hbbkok

呢間小店主打燉湯,另外亦有首創嘅竹絲海南雞椰香飯,又滋潤又有新鮮感,難怪咁受歡迎。竹絲海南雞椰香飯用椰漿同雞油煲出嚟,啖啖都有椰香,竹絲雞肉爽口實淨。湯品有多款選擇,亦可叫套餐跟杯食療拿杯湯,好似茶樹菇香菇淮山湯、蟲草花杞子燉雞湯等,呢排凍咗,飲多啖暖湯好重要。

第8位  甜姨姨私房甜品(*新上榜) 


圖:foodiechansfoodxgoodwest_hk

呢間甜品屋新開冇耐已經迅速打入十大,一啲都唔意外,話晒佢哋本店喺天后做咗成14年,一直深得民心。嚟到銅鑼灣嘅新店,仲推出首創刨冰系列,梗係吸引。刨冰味道創新又貼地,好似醬爆奶醬脆多味、楊枝甘露味等,就算凍都要凍住食啊。

第7位  LOST STARS LIVEHOUSE BAR & EATERY(*新上榜) 

 圖:ericalo12貓豬豬

位於大角咀嘅西餐廳,雖然現場音樂表演呢排要暫停一陣,但仍然靠住高質素嘅食物俘虜食客嘅心。威靈頓牛柳外層酥脆,口感豐富、肉味濃郁又juicy,當然推介。另外可以試下埃及風沙單骨棒棒雞,外脆內嫩,酸酸辣辣嘅清邁辣醬仲係自家製嘅添。

第6位  Wingman        

 圖:chowkayiFANKANA

隔咗幾個月再度上榜嘅雞翼專門店,超過10款口味選擇,每款都會醃過夜之後放暖水慢煮一個鐘,去到半生熟嘅狀態先拎去炸同調味,功夫多但就可以保證隻隻都皮脆多汁。黑芝麻蜂蜜海鮮、咖啡、死神醬同新加坡辣蟹味等等都有,絕對滿足到雞翼控。

餐飲券:任飲任食放題 包12款雞翼及4款小食(限時90分鐘)

第5位  雲壽司(*新上榜) 

 圖:比卡比獸food_enthusiasthk

今年多咗唔少Omakase嘅餐廳跑出,可能係因為大家都冇得飛日本但又好掛住日本美食啦~ 而呢間嘅Omakase算係幾親民,lunchtime嘅話唔使$400都食到。壽司同刺身款式都好新鮮。就算唔揀Omakase,呢度都仲有多款刺身丼飯供應呢。

第4位  原作養生湯米線(*新上榜)

 圖:purple_hyacinthusvenus_so

呢間米線小店同一般嘅米線舖唔同,佢哋特別注重湯底,有成14款湯底選擇,仲要係用新鮮食材熬8個鐘製作嘅靚湯,好似蟲草花膠雞呀椰子雞呀都有。佢哋嘅米線亦都相當有特色,例如椰子雞湯米線仲會加埋桃膠落去,啖啖清甜;招牌海龍皇仲有半邊龍蝦喺度,湯底鮮甜濃郁,食碗米線都好似高級咗咁。

第3位  Aurora Fusion Restaurant(*新上榜)

 圖:Tiffcws

由沙田石門開到嚟尖沙咀嘅呢間餐廳,最特別就係望落似酒吧,入到去揭開menu就發現日本嘢又有,西餐又有,無限fusion。先講日本嘢,有壽司師傅駐場手握壽司同切割刺身架,款款新鮮甜美;西餐就推介脆卜卜乳豬同油浸黃雞配普羅旺斯燴菜。咩都有得食,同朋友食飯就唔使就住就住,可以各取所需咯。

第2位  淥鼎記     

 圖:Tinydeskellatam

憑住咩都有得食嘅吸引力,淥鼎記成功進佔第二位。打邊爐佢又有,雞煲佢又有,甚至連酸菜魚同刺身、海鮮佢都有,任食得嚟仲可以冇限時,咁抵食梗係得人鍾意啦。酸菜魚大大盤,酸、麻、辣、香都有,仲好足料,夾極都有魚片。

第1位  My Ahjussi(*新上榜) 

 圖:yantung117。豐衣足食。

又係大角咀嘅餐廳,證明大角咀真係有好多好嘢食,大大們要搵食以後識路啦?呢間韓系咖啡店,靚就梗架喇,成幢牆都係花花,最啱打卡。但食物水準一樣有保證,食開嘅卡邦尼意粉,加埋泡菜落去,多咗重辣香反而可以中和到creamy嘅膩感,幾有驚喜。


文:Kar


關鍵字
十強
十強報榜
十強名單
大角咀
觀塘
尖沙咀
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
2021及歷屆米芝蓮香港澳門指南完全版
2021-01-27
情人節愛意滿瀉 甜蜜蜜堂食/外賣下午茶推介
2021-02-01
日本吉列牛排店京都勝牛進駐銅鑼灣 黃金六十秒炸法 推介京都勝牛三味套餐
2021-02-18
楚撚記新line!荃灣新開餃子店 必試黑松露什菌餃+香煎潮汕韭菜粿
2021-02-10
1月份好評餐廳十強
2021-02-09