10月份好評餐廳十強
2020-11-09

10月份可以話係café同小店嘅天下,十強榜內大部分都係充滿獨特個性嘅小店,無論係裝修定係menu設計方面都富有諗法,展現小店靈活嘅創造力。

第10位  土生花(*新上榜)  

 圖:nutty_eaterFANKANA

香港本身都開咗唔少韓國菜餐廳,但韓式素食料理,仲要引入韓國寺廟飲食文化嘅,應該就冇乜幾間。所以呢間餐廳新開冇耐,已經吸引到一眾韓粉追棒喇。餐廳選用天然植物性食材,好似紫蘇葉籽芋頭湯咁,入面就包有燕麥脆、雪耳、木耳等,口感沙沙地,紫蘇葉味唔會太濃。而紅棗玉桂糖水煮香梨則選用韓國香梨,清香清甜。

第9位  Vivienne Westwood Café(*新上榜)    

 圖:annielwymjqueen7e

呢間由著名英國品牌開始嘅café,一直都有供應多款英國菜同下午茶等,最近更推出一系列嘅素食菜式,就連成個三層架下午茶都係素食呢,例如有蘆筍酥皮撻、迷你未來牛肉漢堡、柚子藜麥沙律等,款款健康。英式早餐中嘅熱狗腸都係植物熱狗嚟,以葵花籽製成,而家個個都咁注重健康,難怪一推出就大受歡迎。

第8位  Cafe Fabulous(*新上榜)     

 圖:starrychowTaniatt

今年大家都辛苦了,唔少樓上café就成為大家放鬆relax嘅地方,同朋友坐低食餐飯、吹下水玩下boardgame咁過返日。不過好多呢類型嘅café都係食物質素一般,但旺角呢間就幾有驚喜呀,食物份量夠大,而且味道唔錯,推介黑椒炸蝦天婦羅螺絲粉,微微辣幾香口。另外甜品都幾吸引,玩到咁上下,再食多件藍莓芝士餅作結就perfect池。

第7位  泰嘟嘟(*新上榜)    

 圖:kaylawytkoniw

大角咀都有幾多特色小店,呢間泰國酒吧概念嘅小店係其中一間,仲要有啲卡位做到好似泰國篤篤車咁,幾有feel。最多人叫嘅一定係炭燒豬頸肉,因為佢嘅present手法唔似一般傳統泰菜,而係好似日式燒肉咁,成個爐頭上,大家可以自己慢慢燒肉。肉味香得嚟仲保留到肉汁!

餐飲券:$100現金券-無限兌換!

第6位   Artisan Café(*新上榜)

 圖:yoli_lky_0115wingshuen1123

主打輕食,好似三文治、蛋糕同咖啡嘅中環咖啡小店,細細間座位唔多,但就幾有氣氛同文青氣息。首推磨菇芝士三文治,份量十足,外脆內軟,夠晒香口。三文治仲烘到有一條條坑紋,影出嚟好靚。想試特別少少嘅咖啡可以揀桂花latte,有淡淡清香呢。

第5位  魚事者 

 圖:e.wkyChuChuCheung

以魚肉為主題嘅小店,多款小食同麵食都加入魚肉製作,呢份新鮮感令佢成功繼續留守喺十強嘅位置。炸魚無薯條即係炸魚肉條,口感煙韌,啖啖魚香,配埋自家調製嘅醬汁就更香口,如果想要魚鮮味更突出嘅,就揀蟹皇醬啦~ 各款魚麵亦係餐廳招牌之作,無論係湯麵定撈麵,都比一般嘅粉麵彈牙煙韌,滿滿魚香,重點係唔腥呀。

第4位  淥鼎記(*新上榜)  

 圖:Chiuyu118 Beautylionbb

雖然唔係秋冬天先可以打邊爐,但近嚟涼涼地,又真係挑起咗唔少人嘅邊爐癮。呢間火鍋店性價比高,集雞煲、酸菜魚、任食火鍋於一身,刺身、海鮮、肥牛樣樣齊。湯底有養顔嘅花膠鮮雞美人鍋,或者刺激嘅重慶麻辣鮮雞煲等選擇,難得係任食冇時限,唔使食到趕頭趕命,當然輕易就可以成為一眾火鍋迷嘅寵兒啦。

第3位 Café Crêpe

 圖:eunice2046Moncarrey

上個月榜首嘅法式薄餅店,今個月微微下跌兩級,但依然保持喺三甲位置,人氣強勁。28款薄餅選擇有鹹有甜,遇著有選擇困難症嘅都咪話唔頭痕。抹茶控可試抹茶忌廉芝士配新鮮紅莓醬,薄餅皮係朱古力味,夾住抹茶忌廉芝士,味道濃郁,仲有開心果同麥皮脆脆等增加口感。蘋果金寶奶油醬法式薄餅亦係另一人氣款式。

第2位  你妳(*新上榜)   

 圖:sophiawong0127yuchiro

荃灣新開冇耐嘅台灣菜小店,食完真係會有啲掛住台灣。呢度啲菜式配搭新穎,好似魯肉飯咁又會加珍珠,手作吐司都會加珍珠,效果又比想像中夾,魯肉飯內嘅珍珠仲用台灣醬油同油蔥酥炆煮過,令到味道上多啲變化,微甜中又會滲有鹹香。珍珠控不妨試試啊。芋泥肉鬆三文治就更有台灣味道啦,厚疊疊der見到都滿足。

第1位  阿里郎熱狗棒 

 圖:iristsang852hkfood

喺韓國有超過80間分店嘅人氣熱狗連鎖店,以麵包糠混合麵糰、大米再現炸成熱狗外層,有多款口味,薯條鴛鴦芝腸熱狗棒係熱門之一,有一粒粒炸到脆口嘅薯條粒喺外層,趁熱食仲有拉絲效果,明知邪惡都會一啖一啖咬落去。建議灑埋砂糖、芝士粉同埋唧多一兩款芝士醬一齊食,就更加有風味!


文:Kar



關鍵字
十強
十強名單
報榜
旺角
荃灣
尖沙咀
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【隨時更新】零食速報 每周新款零食、酒品點評
1天前
優雅小聚 11月下午茶推介
2020-11-03
【訂座感謝祭】 快閃$20餐飲券第八彈 激抵燒烤優惠
2020-11-06
桔梗姐妹店進駐牛頭角 8,700呎自設炒豆房及餅房 手沖咖啡配輕食
2020-11-02
Wine & Dine 2020預告 免費網上學品酒 精選品酒套裝率先睇
2020-11-19