馬來西亞8大食榴槤好去處 | OpenRice 香港開飯喇

榴槤季節又嚟到啦！作為榴槤原產地之一嘅馬來西亞已經推出咗各式各樣嘅榴槤甜品，香港一年四季都係吹緊抹茶風，嚟到馬國旅行梗係要試吓新嘢，見識吓「水果之王」嘅風采！

榴槤雪糕　　Wondermama

Photos by Wondermama Restaurant & Cafe
充滿懷舊風嘅餐廳，Wondermama嘅榴蓮Crêpe一路來都廣受歡迎。對於榴蓮控嚟講，佢更加係必點之選，香軟嘅可麗餅，搭配脆口嘅玉米片同雪糕，點可以唔滿足啊？得意嘅係，呢個甜品裝喺懷舊杯仔入面，餵飽個胃之餘相機都有得食。

榴槤控嘅天堂　　 Durian Durian

呢度簡直就係榴槤控嘅天堂，只要你諗得出嘅榴蓮甜品，呢度都會有！ Durian durian售賣各種各樣嘅榴蓮甜點，包括有榴蓮蛋糕、榴蓮塔、榴蓮角、榴蓮麻薯、榴蓮Crêpe、榴蓮pancake等。零食亦唔例外，有去東南亞必買手信榴蓮糖，選擇超多。值得一提嘅係，佢啲甜品全部以新鮮榴蓮肉製成，濃郁嘅榴蓮味散發喺嘴裡，原汁原味，實在太幸福啦！

3D榴蓮蛋糕　　 Moonlight Cake House

咦？點解呢度會賣原隻榴槤咁奇怪嘅？唔係......其實呢個係3D榴蓮蛋糕，仿真度超高，真係食落都驚驚地，怕個榴蓮殼會拮到自己啊！

榴槤批　　 The Humble Pie Co.

Photos by The Humble Pie Co.
旅行行到累累吓想食個tea？咁不如嚟貓山王派(Musang King Pie)！貓山王派是該店招牌甜品之一，非常受食客歡迎。貓山王派，聽起嚟幾有氣勢，其實就係榴槤批。餅皮上嘅榴蓮果肉，加上香滑濃郁榴蓮忌廉，食落回味無窮。最佳飯後甜品，非呢個莫屬！

榴槤泡芙　　Taste Better

Photos by Taste Better
士多啤梨同朱古力味嘅泡芙就食得多啦，榴槤味又試過未？呢個榴蓮泡芙外熱內冷，酥皮香脆，一咬落去滿滿榴蓮cream一湧而上。食咗口齒留香，榴蓮香味陪著你成日啊！

榴槤珍多冰　　Rojak & Cendol Shah Alam

Photos by Rojak&Cendol Shah Alam
呢個檔口最近喺網絡爆紅，只因佢有賣榴蓮口味嘅珍多冰！（印度傳統糕點，喺刨冰上加入綠色粉條，再淋椰汁最後撒上棕糖即成）。濃郁嘅榴槤香味完全滲透在嘴裡，感覺好幸福！喺呢度可以食到唔同品種嘅榴蓮，例如D24、D99、D101、紅蝦、貓山王等。檔口有超過100種珍多冰，如果你啲朋友唔鍾意食榴蓮，都可以試其他口味。

榴槤西米露　　7U Desserts

天氣熱想食冰？咁就嚟U Desserts啦！開飯仔特別推薦佢嘅榴蓮西米露，新鮮嘅榴蓮肉同西米露食落肚超級涼快。仲有消暑聖品榴蓮Pancake、榴蓮冰沙等。除咗呢啲榴槤甜品，仲有窩夫、熟食可以選擇，照顧哂唔同人嘅需要啊！

榴槤pizza　　 B.G.T Lakeview Restaurant & Bar

上面睇咗咁多榴蓮甜品，榴蓮味嘅pizza又點睇？除了可以食到濃濃口感嘅榴蓮，仲有pizza上面那層芝士，兩大濃味對決，唔知會擦出咩火花？而且餐廳靠近湖邊，環境幽雅，可以一邊欣賞湖畔美景，一邊享受美食，最啱旅客嚟到放鬆自己。

隨時接收最新資訊
讚好OpenRice專頁！