呢間日式甜品店不時推出卡通甜品，不過今次居然唔係同卡通人物聯乘，而係同榴槤品牌合作，推出貓山王系列啊！用馬來西亞直送貓山王果肉製作多款日式甜品，必試貓山王Cremia新地！
 

山下菓子 x 榴槤BB貓山王Cremia新地（$68）（只限鑽石山及沙田店）

山下菓子3月30號起推出同榴槤BB合作嘅貓山王系列，為期兩個星期，當中呢個新地就最豐富！底部係自家製焦糖脆脆同乳酪，上面加Cremia雪糕、langue de chat雪糕筒，同貓山王果肉，最後再以圖案馬卡龍點綴。
 

Cremia雪糕係用北海道優質25%鮮奶油製作，啖啖幼滑鮮甜嘅牛奶香，配同樣香濃嘅馬來西亞貓山王果肉，無論係口感定味道都非常夾！不過略嫌底部嘅焦糖脆脆太甜。
 

山下菓子 x 榴槤BB貓山王千層蛋糕（$40/件）

近年千層蛋糕大熱，呢間甜品店亦用自家製班戟配D197貓山王果蓉同忌廉製作千層蛋糕，榴槤忌廉入口即溶，香味濃郁。
 

3.6牛乳貓山王布甸（$25）

一打開蓋就見到有唔少貓山王果蓉！3.6牛乳甜香配搭榴槤嘅濃郁，而且口感綿密滑溜。
 

 

貓山王芝士撻（$25）

牛油撻底上係貓山王果肉同芝士，而且可以選擇即場凍食享受幼滑口感，或者返屋企用焗爐翻熱令榴槤同芝士香味更突出。
 

貓山王泡芙（$25）

餐廳自製酥脆泡芙唔單止外面有菠蘿脆皮，今次裡面亦加入貓山王果肉同忌廉，一啖咬落去脆、滑、香、甜都有齊。
 

貓山王Pancake（$38/2件）

綠色嘅薄身Pancake皮裡面包住貓山王果肉同忌廉，外煙韌內柔滑，仲有陣陣榴槤香。
 

貓山王大福（$22）

柔軟麻糬裡面係100% D197貓山王榴槤蓉，所以啖啖都係榴槤天然味道，齒頰留香。
 

山下菓子
鑽石山店：鑽石山龍蟠街3號荷里活廣場1樓142號舖
馬鞍山店：馬鞍山鞍祿街18號MOSTown新港城中心(4期)2樓2040-2041號舖
沙田店：沙田沙田車站圍1號連城廣場零售層3號舖

文、相、片：Cathy