講到Fine Dining，好多人第一時間就會諗到高不可攀嘅價錢同打卡式體驗。不過其實香港都有唔少餐廳主打親民版，用相對合理嘅價錢，就可以享受到高質食材同大廚精心設計嘅菜式，氣氛同服務都一樣有水準。今次就精選咗4間親民嘅Fine Dining餐廳，等你下次想食好啲時有多個選擇。
高質西班牙紅蝦意粉 Senti 
圖：由曾經喺澳洲攞過米芝蓮一星嘅主廚Alex Law主理，餐廳最出名嘅紅蝦意粉真係必試，紅蝦蝦頭啲蝦膏濃郁到不得了，每條意粉都掛滿醬汁，海鮮味直衝味蕾。前菜方面，好似帶子天婦羅就相當有層次，帶子煎到半熟，再包住墨魚mousse同紫菜天婦羅，配埋西班牙凍湯，清新又開胃。龍蝦同樣出色，肉質爽彈，加埋白酒牛油汁同大根一齊食，味道濃郁之餘又有平衡感。另一道龍蝦 cappuccino就好有驚喜，濃濃龍蝦味帶住泡沫嘅輕盈口感，好特別。
屯門海景餐廳 L’Atlantis
圖：如果想搵一間環境靚又性價比高嘅Fine Dining餐廳，屯門黃金海岸呢間海景餐廳絕對係個好選擇。餐廳提供多款dinner set，由4道至8道菜都有選擇，價錢只係由$298起。以六道菜為例，前菜有薄切美國頂級生牛肉配柚子醋、阿根廷紅蝦刺身及芝士蟹肉焗大蘑菇等；主菜可以揀烤澳洲和牛肉眼扒，肉質juicy，火候掌握得好；甜品就有伯爵茶芝士蛋糕同Tiramisu，用心之餘賣相精緻，味道同樣出色。加上服務貼心、氣氛浪漫，無論係拍拖、慶祝生日或者同朋友chill吓，都係好好嘅選擇。
自家熟成扒房 The Victuals 
圖：餐廳裝潢典雅，細節中帶點玩味，仲擺滿復古唱片，氣氛輕鬆得嚟又有格調，無論朋友聚餐或情侶約會都啱晒。餐廳主打兩款晚餐menu，由$398起，價錢合理，菜式設計用心。前菜方面有五天昆布熟成北海道帶子及乾式熟成鵪鶉腿等；主菜選擇亦充滿創意，例如慢煮鴨髀鴛鴦腸焗飯，將潤腸、辣肉腸同手撕鴨肉混入飯中，再以松露黑醋提味，中西合璧又唔會膩。至於dry aged肉類更加係呢度嘅強項之一，無論係澳洲M7和牛或熊本豬柳，都做到肉質嫩滑多汁，味道平衡，食落層次豐富。甜品方面，招牌Tiramisu用咗輕盈芝士製作，口感順滑唔會覺得heavy；自家製朱古力亦非常出色，香脆得嚟甜度啱啱好，為整餐劃上完美句號。
高質西式私房菜 J.L. Private Kitchen
圖：KaWaiL
樓上私房菜，環境低調舒適，主打精緻西式多道菜套餐。五道菜晚餐包括前菜焗釀蟹蓋拼松葉蟹沙律，蟹肉絲絲分明，焗到金黃香脆，配埋清新嘅蟹沙律，層次感豐富；亦有三色魚碟，包括蒲燒鰻魚、煙三文魚卷同吞拿魚，味道細膩多變。主菜係全場重點，例如蒲燒鰻魚野菌燴飯既有油香又入味；黑松露海鱸魚粉紅汁通粉微酸開胃，口感有驚喜。想豪華啲可以加配「芝士焗澳洲龍蝦米多」，龍蝦起肉切粒混入龍蝦汁再焗，金黃香脆又唔會膩；又或者揀南非M8/9和牛柳，入口軟嫩冇筋，配埋牛骨髓多士更加濃香滿足。甜品選擇都幾有誠意，好似鮮果脆多士配自家製雪糕，外脆內軟，加埋雪糕奶香濃郁；有機鮮果綠茶拿破崙蛋糕酥皮層次分明，帶少少微甘茶香，平衡得啱啱好。
更多OpenRice詳細推介：
► 持續更新！ 2025生日優惠餐飲精選 送多款免費餐點 (按此)
► 2025最新糖水/甜品小店合集 首間日式芭菲專門店/手工芋泥杯/法式精緻甜品 (按此)
► 2025韓式居酒屋合集 海膽紫菜包飯/松露明太子卷蛋/荔枝味馬格利酒 (按此)
文：Yanica
編：Cathy
