限定蜜瓜花膠湯配台灣精釀啤 台式養生火鍋新開旗艦店(有片)
2018-12-03

又嚟到打邊爐嘅季節!呢間都可以話係香港台式養生火鍋店嘅始祖,最近佢地就喺銅鑼灣開咗間旗艦店,更大之餘仲新增一系列限定湯底、配料,同台灣精釀啤酒呀。加上唔少湯底同食材都有養生功效,食多幾次都唔怕熱氣!
 



老鍋台式火鍋銅鑼灣旗艦店日前正式開張,新店佔地約5,000平方尺,最得意嘅係一入門口就有個電子天燈牆,真係幾有十分老街氣氛。大家仲可以用平板電腦輸入願望模擬放天燈,係打卡位之一!叫得旗艦店,唔單止更大而且裝修更特別,仲有兩間VIP房,年尾飯局就最啱。
 

養生湯底介紹


美顏蜜瓜響螺花膠鍋($288)

旗艦店限定湯底就係呢個落咗半個蜜瓜,加上美國大響螺頭、精選花膠筒、金華火腿、 雞腳等等材料熬製嘅美顏蜜瓜響螺花膠鍋!蜜瓜清熱潤肺、響螺滋陰補腎、花膠滋補養血,加埋就有清熱養陰嘅功效。湯底味道清甜,上枱後落材料之前,記得飲返碗先呀!
 


鴛鴦湯底(左:美人鍋、右:酸菜白肉鍋)($158-$228)

麻辣、酸菜白肉、美人同養生鍋四大王牌當然繼續供應,唔少女士最愛嘅美人鍋用原隻烏雞同金華火腿熬足八個鐘,再加上桃膠、杞子、南棗等,滋陰養顏,而且唔會太濃搶走食材原味。另一邊酸菜白肉鍋就係用秘方醃製嘅東方大白菜加極品豬王花腩,白菜嘅酸味獨特,有啲似唔辣嘅韓式泡菜,酸香解膩。
 

精選新鮮配料


手切本地肥牛(小$228,大$368)


美國特級牛肋肉($218)

打邊爐又點少得肥牛?手切本地肥牛夠新鮮而且肉味濃郁,美國特級牛肋肉就嫩滑帶油香。
 


一品花雕醉雞件($88)


手工丸拼盤($108)

兩款都係落足心機,醉雞用花雕浸過一上枱就聞到香味,煮熟後依然帶淡淡酒香,證明夠入味。而所有丸都係手工製,嗌一碟拼盤就可以試勻墨魚丸、蝦丸、流心鹹蛋黃豬肉丸、梅菜豬肉丸同芝士牛肉丸。
 

更多【新店直擊】:
1. 茶迷必試靚茶+茶製小點 茶葉品牌BASAO旗艦店登陸灣仔
2. 酥炸咕咾肉配涼茶啤!尖沙咀新開本土小食店
3. 西營盤新開素食Cafe 嘆低糖蛋糕、無花果多士

 

紫淮山($58)

旗艦店新推嘅紫淮山唔單止有天然紫色賣相,亦含豐富花青素有助抗氧化。口感亦相當特別,煮一分鐘到會比較爽口,再煮耐啲又會有好似芋頭咁嘅軟腍效果。
 


(左)功能蔬菜拼盤(消脂系列)($88),(右)水蓮($68)

旗艦店亦特別推出三款蔬菜拼盤,分別係抗氧化、高纖,同消脂系列,例如呢份消脂系列就有羽衣甘蘭、有機秋葵、台灣萵筍及蘆笱,有助消脂同養顏。另外特別推介台灣水蓮,口感非常爽脆。
 


台灣豬血糕($58)


鮮炸響鈴($68)


咸蛋黃炸魚皮($68)

想食香口小食亦有推介,除咗台灣風味十足嘅豬血糕之外,特別推介呢度嘅即製響鈴同魚皮。雖然係即點即炸要等大概15分鐘,但響鈴薄脆而完全唔油膩,炸魚皮亦相當脆身,唯一有啲可惜嘅係鹹蛋黃可以再落多啲再香口啲。
 

台灣精釀啤酒


啤酒頭手工啤酒 二十四節氣系列($68/支)

台式火鍋當然要配台灣啤酒!餐廳引入台灣精釀啤酒品牌啤酒頭嘅二十四節氣系列,特點係將唔同台灣當地特產融入啤酒當中,好似以台灣烏龍、冬瓜茶、咖啡等,部分仲得過世界啤酒大賽獎項。
 


(左)沖繩黑糖烏梅汁($28/杯,$88壺),(右)杞子杭菊露($28/杯,$88壺)

唔想飲酒嘅話亦可以飲返杯餐廳用獨家秘方每日新鮮煲嘅兩款養生飲品,黑糖烏梅汁用台式方法製作,加入洛神花、黑棗等材料,生津解渴。而杞子杭菊露則選用頂級胎菊,配搭百花蜜味道清甜,有明目養肝功效。
 




老鍋台式火鍋
地址:銅鑼灣駱克道491-499號京都廣場2樓




文、相、片:Cathy

關鍵字
銅鑼灣
火鍋
蜜瓜響螺花膠鍋
美人鍋
紫淮山
台灣精釀啤酒
老鍋台式火鍋
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】便利店尋寶 每周新品速報
3天前
4月份好評餐廳十強
2019-05-07
實現夢想 開一間聯繫社區嘅咖啡館 上水獨立Cafe粉嶺重開
2019-04-29
泰國手標奶茶登陸香港!銅鑼灣ChaTraMue旗艦店直擊(有片)
2019-04-25
銅鑼灣新開$78新派素食自助餐 六十多款任揀 素食壽司、冰鎮咕嚕肉(有片)
2019-05-02