又有福音畀牛魔王啦~ 銅鑼灣新開咗一間以牛串燒為主打嘅餐廳，超多牛食就梗啦，仲要有成26款坊間少見嘅牛內臟，好似牛心管、牛沙瓜、牛腸等等都有得食！各位食得刁轉嘅朋友仔，要去探下路喇。

即叫即燒嘅牛串燒，選擇多多，仲要咁多刁轉部位，有啲可能真係未必食過：

 （左起）牛心、牛草肚、牛骨髓、牛心管、牛肺、牛膀

牛心管（右三）即係牛嘅大動脈，每隻牛得一條㗎咋，好罕有！食落爽脆有咬口，配柚子胡椒一齊食，帶有微微辛香，佐酒啱晒。

 （左起）牛小腸、牛大腸、牛肝、牛沙瓜、牛栢葉、牛筋

牛咪有4個胃嘅，牛沙瓜（右三）就係第4個胃袋，以韓式醬燒製，做到真正嘅外脆內韌，口感又幾特別。

牛小腸、牛大腸（左一、左二）
豬腸食得多，牛腸原來又係另一種口感。以鹽燒製，無論係大腸定小腸嘅油脂都相當香口，小腸鬆軟，大腸嘅油香爆發得更強，仲帶有陣陣牛香。係肥仔㗎喇，但一餐半餐就唔理啦~

 （左起）厚燒牛舌、牛鍵薄燒、牛舌根、牛肩、牛肋條、牛面

牛面肉（右一）唔算多，筋相對上會多啲，餐廳每日先起筋然後再燒至半生熟嘅狀態，食落又幾有肉香，不過每日限定10零串咋。

牛嘅橫隔肌係燒肉店嘅人氣部位之一，肉味甚濃，又有少少油脂香，餐廳自家調製咗4款醬汁配搭，分別係蜜糖芥辣、Wasabi、黑燒醬同蒜香，有辣有唔辣，吊到少少味之餘又唔會蓋過牛香。

月見免治牛肉棒混合咗多個唔同部位嘅牛肉製成，外層燒至脆脆地但內裡依然鬆化juicy，點埋雞蛋黃汁就更加惹味。

除咗以上嘅罕見部位，當然都唔少得靚牛啦。鹿兒島A4和牛牛冧肉、長崎A5和牛西冷等應該係牛魔王點都要留肚食嘅嘢。牛冧肉喎，呢個位本身已經軟腍，仲要係鹿兒島A4和牛，就更加有種入口即溶嘅快感；西冷嘅油花分佈平均啲，肉質亦爽口啲，油香豐腴。

 牛3點：安格斯牛小排他他配蒜片、火炙韓色生牛肉、牛肝醬配酒盜芝士。

 日本芫茜鮮菜沙律

呢度查實仲係間燒酎專門店，內藏近80款燒酎，包括名燒酎、米燒酎、麥燒酎等，細心揀嘅話會發現唔少驚喜。例如有啲特別口味，以金菇呀、青椒呀呢啲食材釀製嘅都有，很想試吧？各位動漫粉，應該會對北斗之拳聯乘佐賀光武酒造場推出嘅聯名燒酎有興趣，個樽超型啊！

牛惣居酎屋
地址：銅鑼灣登龍街28號永光中心22樓

文、相、片：Kar