酒鬼必試期間限定 新酒廠手工啤酒、小食配搭(有片)
2018-12-14

Beer geek對精釀啤酒(a.k.a 手工啤酒)應該有一定認識,大約知道主要分有lager、ale、IPA、stout等等唔同類型,而有間新晉嘅本地酒廠H.K Lovecraft暫時都係主力釀製lager。而就算喺lager呢個category入面,都仲有好多種,今次佢哋就聯同咗4間餐廳合作進行Food pairing,畀大家可以一邊食好西,一邊飲酒,分分鐘你仲會發現lager嘅世界比你想像中大好多。

Smoked Doppelbock x酥炸鵪鶉    Second Draft

唔少酒迷都鍾意去呢間餐廳度飲酒食嘢,因為佢哋嘅嘢食水準真心高呀,今次仲特地為咗兩款新酒設計咗兩道新嘅菜式,講明先,期間限定嚟,之後冇得食㗎啦。

常見嘅lager通常都係比較金黃色啲,但偏偏Smoked Doppelbock就呈深紅啡色,酒體醇實,一入口係幾smoky嘅味道,慢慢香甜嘅焦糖味就偷偷跑出嚟,層次係幾豐富。而新菜酥炸鵪鶉先經過煙醃,而下面好似麵包糠嘅其實仲混入咗穀麥喺裡面,個醬都有啲煙燻味,所以配襯煙燻味重嘅Smoked Doppelbock,就好perfect池喇。兩者相輔相成,各自嘅味道都提昇咗。

Vienna Lager則係起源自維也納嘅lager,清爽中帶有烘烤同焦糖味,口感順滑。團隊將日本柑、食用菊花等食材加入帶子他他入面,配返清爽嘅啤酒,係會有種refreshing嘅感覺。但又為免成樣嘢太清淡,所以又加咗啲辣辣地嘅四季紅入去,刺激返下。

Second Draft
地址:大坑銅鑼灣道98號地舖

Vienna Lager x 牛肉漢堡   無問題

講到夠chill,西貢海旁嘅呢間餐廳一定有份。你試下合埋眼,想像下自己拎住杯酒,望住個海,吹住海風……好啦,返嚟啦。介紹返先,呢度飲到嘅都係Vienna Lager,但連埋佢哋自家牛肉漢堡扒配蘋果木燻煙肉及芝士一齊食,可能又有唔同嘅感覺。

上面講過,Vienna Lager係一隻比較清爽型啲嘅lager嚟,而呢個burger就相對比較濃味。塊扒係自家搓製嘅,100%澳洲牛肉嚟,煙肉又用蘋果木燻過,再加埋半溶美國芝士,大大份好足料。食落喺濃香嘅芝士味中,滲透住陣陣嘅煙燻味,塊扒仲好juicy添,就連個bun都好軟身,索晒啲肉汁。呢個時候,飲返啖啤酒,就可以減去漢堡嘅膩度,繼續大啖大啖食。

無問題
地址:西貢惠民街2號海濱公園1號舖

Vienna Lager x 雞翼配腐乳芝士汁    Tipsy tap

開業未夠半年嘅Tipsy Tap,迅速成為一眾beer geek嘅新蒲點。佢哋嘅水牛城雞翼一向都好受歡迎。平時食嘅可能係濕身嘅居多,但佢哋嘅就係乾身版,皮夠脆原來有竅妙,煎香完仲會放入焗爐度焗返乾。配嘅醬汁亦係坊間少有—自家調配嘅腐乳加藍芝士!選用最淡味嘅腐乳,混埋有「鬼佬腐乳」之稱嘅藍芝士一齊嘅口感又幾滑,鹹香中帶微辣。於是飲住帶有烘烤麥芽味同焦糖氣息嘅Vienna Lager,就可以中和返個辣度。

Tipsy Tap
地址:尖沙咀柯士甸路5號地舖

Helles x咖喱腸仔    Hoppy junction

第3款酒款要出場啦,Helles係一款德國風格嘅lager嚟,色澤金黃,口感輕盈、清爽,啤酒花嘅香氣亦夠鮮明,所以配啲清新或濃味嘅食物都容易夾到。

而呢間位於灣仔嘅酒吧餐廳,新開冇耐,主打本地精釀啤酒!呢度嘅咖喱腸仔,一款係牛肉腸,一款係紐倫堡腸,兩款都德國腸嚟,肉味濃郁,就連個咖喱茄汁都係德國嘅,成件事好德國風啊~ btw,佢嘅咖喱汁香而不辣,同Helles亦好夾。

Hoppy Junction
地址:灣仔莊士敦道2-12A文熙大廈地下G號舖

文、相、片:Kar


關鍵字
尖沙咀
西貢
灣仔
大坑
手工啤酒
精釀啤酒
飲食潮流
開飯仔為大家發掘香港這個美食之都的最新美食資訊,分享飲食潮流文化。
餐廳資料
更多
收起
本月熱門
【隨時更新】便利店尋寶 每周新品速報
3天前
【2019聖誕】早鳥優惠! 聖誕自助餐推介
5天前
【2019聖誕】年尾叉電 聖誕下午茶集合推介
2019-11-19
秋風起!5間大閘蟹放題食店集合
2019-11-19
【2019聖誕】約會之選 聖誕市集推介
2019-12-06