輕鬆小聚 性價比高的飯局好地方
2020-06-29

今時今日出街食飯,餐廳環境、菜式、服務、理念等都好重要,想搵個地方同屋企人或者朋友輕鬆小聚一下,新界同港島都有好選擇。兩間餐廳都著重食材嘅配搭同運用,部分菜式例如麵包同窩夫等,都係自家製作!

Green Waffle Diner (元朗)  

店如其名,Green Waffle Diner唔止環境裝修好green,四圍都係綠色植物,就連menu內嘅選擇都夠晒green。無論係同屋企人定朋友嚟食,都一樣食得輕鬆自在。窩夫固然係主打,但佢哋亦有唔少健康嘅西式美食同清新素食,而且仲會提供少鹽少糖嘅菜式呢~

勁量早餐

叫得做勁量早餐,就梗係勁豐富啦,淨係蛋都有3隻!另外仲有香腸、煙肉、煙三文魚、多士、全份窩夫,炸薯粒/沙律/哈蜜瓜。兩條早餐腸同平時見開嘅唔同,比較幼身啲,係加入咗楓糖漿製作嘅正宗美式腸嚟。而外脆內軟,富蛋香同牛油香嘅窩夫,連埋甜甜酸酸嘅菠蘿果醬都係店家自家製作,誠意十足。窩夫仲可以揀轉做斑蘭、蕎麥味等都得。

牛肉粒薯仔鑊仔

要數最受歡迎嘅菜式就應該係牛肉粒薯仔鑊仔啦,幾乎枱枱都會嗌。用鐵鑊上枱,熱辣辣。面頭畀半溶嘅車打芝士鋪蓋住嘅牛肉粒同炸薯粒,會令人忍唔住食完一粒又一粒,香口惹味。仲有,幾唔捨得都好,記住要拮穿隻水波蛋,撈勻啲蛋汁滲晒落去層次又多咗。

美式鹹牛肉三文治

呢份三文治勁足料,煎到微脆嘅甘香裸麥包,夾住超厚超多層嘅鹹牛肉、仲有啲醃咗超過幾個月嘅酸菜同自製醬汁,係幾夾嘅。啖啖肉入口,有種治癒感。值得一提係跟配嘅薯條,係連埋薯皮架,薯條控們應該好開心了。

Green Cleans Smoothie Bowl

作為近乎係全港首間做smoothie bowl嘅餐廳,呢度有多款唔同顏色同食材配搭嘅Smoothie Bowl,有藍有紫有粉紅,而今次同大家介紹嗰碗則係綠色主題。面層有芒果啦、士多啤梨啦、香蕉啦,仲有多款穀物、奇亞籽同椰子片,七彩繽紛,未食都已經食指大動。底層嘅smoothie係以牛油果、芒果、香蕉同綠色螺旋藻製成,香滑帶果香。想揀杏仁奶、穀物奶或者豆奶都得,又好食又健康。

香脆雞翼

雞翼幾時都係香港人嘅comfort food,呢度幾款口味嘅醬汁都係自家製,所以就算係周圍都食到嘅水牛城雞翼,喺度食都會有種獨有嘅酸辣味;香蒜蜜糖味嘅蒜蓉味亦非常突出。每隻雞翼都係即叫即炸,炸完先再淋汁喺面,所以入口時,依然食到外皮香脆。

Off Town Kitchen (西營盤) 

「越簡單,其實越難做」,位於西環嘅Off Town Kitchen雖然選用簡單食材,但非常講究烹調技術同食物配搭。大廚仲為咗令食客品嚐到原汁原味嘅歐陸菜,經常搜集各國地道食譜。由自家製麵包到多國特色菜餚,食客仿如置身世外桃源。尤其係佢哋嘅柚子法包同德國酸種麵包,連居港嘅法國人都讚好!餐廳內啡色嘅枱布,食污糟咗都唔怕,正如大廚講:「最緊要食得輕鬆自在。」

Guinness燉牛面配德國麵糰

用黑啤炆過嘅牛面肉,比普通牛肉更香更嫩腍多汁,爽口得嚟唔黏牙。配埋彈牙手製德國麵糰,一粒粒嘅Spätzle淋上鮮甜濃稠牛肉汁,口感豐富,簡直係人間美食!

鴨肝肉汁芝士薯條

鴨肝配芝士,唔使諗都知邪惡。薯條即叫即炸,淋上用牛骨同香草熬製10幾個鐘嘅秘製醬汁,係會令人食到停唔到口!

海鹽菠蘿新鮮波士頓龍蝦

新鮮龍蝦嘅海水同鮮甜味,配上菠蘿汁有種夏日嘅感覺。再淋上用鮮龍蝦頭熬製嘅醬汁,龍蝦味馬上level up。

200g青醬日本水飼豬肉眼扒配意粉

水飼豬肉比普通豬肉更香更嫩,有種瞓咗喺彈弓床上嘅感覺。肉眼扒先煎後焗,將肉汁緊緊鎖住,肉食獸今次大滿足!

德國脆皮鹹豬手配黑啤酒汁

上菜時一陣啤酒香,原來係因為製作嗰陣會將焗完豬手嘅精華再加黑啤落去煮,煮香咗就會散發出嚟啦~ 鬆脆嘅外皮下係粉嫩嘅豬手肉,識食一定配埋肥膏一齊食,不過怕油嘅朋友可以配下旁邊嘅酸菜,解解膩。

心動不如行動!有興趣就快啲約埋三五知己去嘆下美食!快啲bookmark定啦!

*以上圖片只供參考,所有食品以實物為準. 食品供應因餐廳而異

關鍵字
大廚招牌菜
元朗
西營盤
西餐
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
本月熱門
【隨時更新】最後倒數!即將結業的老字號及人氣小店
2020-07-21
【隨時更新】零食速報 每周新款零食、酒品點評
2020-07-31
全城抗炎!屋企都嘆到三層架下午茶 Tea Set外送/外賣自取推介
1天前
全城抗炎!送上門懶人煮食包及套餐大合集2.0 花膠燉湯/火鍋/鐵板燒
3天前
全城抗炎!北角酒店最新應變 自助餐都有得外賣?
2020-07-17