踏入黑白世界食花見甜品!灣仔新開打卡Fusion餐廳(有片)
2019-03-25

灣仔鬧市轉角處居然搵到間餐廳,門口到行上去全部裝修都係黑白色!原來係老闆特別搵大學生一筆一筆畫上去,瞬間好似去咗另一個空間咁。主打Fusion菜式,西餐為主但加入中式元素,甜品同飲品賣相都非常Fancy,最啱鍾意瘋狂影相嘅Foodie呀。
 


ULURU位於灣仔春園街,地下入口就已經夠搶眼,上到去全白牆身加上黑色手繪,有啲似行咗入去漫畫世界咁。負責人話係請咗幾位喺香港修讀美術嘅大學生畫咗兩個月,概念係將餐廳變成外國大宅,所以樓梯係上山見到嘅風景,餐廳就畫上書櫃、花園等圖案。
 


本身白色已經令餐廳更有空間感,加上餐廳本身佔地面積都唔細,可以坐到約一百人但都唔會覺得逼。而且打卡位超多,鍾意Selfie嘅朋友記得預留時間自拍啊。
 


紅菜頭野菌竹炭漢堡($138)

裝修係黑白雙色,食物反而非常Colorful!呢份紅菜頭野菌竹炭漢堡嘅漢堡包加入竹炭粉變成黑色,口感鬆軟。主角漢堡扒用紅菜頭、麥片、菇等材料整成,紅菜頭先炒去去除草青味,加埋麥片一粒粒咬口幾特別。
 


加上烤過嘅脆口多汁嘅彩椒口感層次豐富。亮點係用榨菜同筍代替一般嘅酸黃瓜,同樣有清新味蕾效果但其實係中式元素,有驚喜!
 


香煎虎蝦,蟹肉,煎鴨肝配香辣蝦味番茄忌廉汁扁意粉($188)

用蟹肉、蝦乾、茄汁、芫荽、乾辣椒粉等製作意粉醬汁,聞落比一般紅蝦汁更多一份辣味,加上海鮮鮮香,啖啖都好滿足!虎蝦分量十足又彈牙,鴨肝可以點少少碟上嘅黑醋汁享用,豐膄嫩腍,雖然無鵝肝咁入口即溶,但呢個價錢絕對收貨啦。
 


花見 Hanami($68)

非常Photogenic嘅甜品,上面透明嘅係加咗食用花嘅啫喱,下層係檸檬芝士餅,食嘅時候配埋旁邊嘅Crumble同玫瑰醬一齊食。因為啫喱只有食用花微微澀味,味道以檸檬芝士餅嘅酸香為主,整體感覺相當清新,當飯後甜品可以解膩。
 


點解呢份甜品叫花見?原來借用日本賞花嘅意思,唔同時節有唔同嘅花,每款一年只有一次機會,有要好好珍惜嘅意思。同樣呢款甜品之後會轉成不同口味,例如櫻花等,大家同樣要珍惜機會呀!
 


粉蝶花之丘 Nemofira no oka($78)

同樣靚到令人想哇一聲嘅賣相,而且成個甜品都食得!透明花盤係拉糖再噴上食用色素,泥土其實係Crumble,下面仲有朱古力Brownie同朱古力忌廉,放上食用花之後就係一個食得嘅小花丘。
 


食嘅時候要敲碎拉糖一齊食,拉糖脆身而且無想象中咁甜。對比起Brownie同忌廉就口感濕潤,有濃郁朱古力香。
 

更多【新店直擊】:
1. $188食海鮮火鍋套餐、半價食埋雞煲 深水埗新開雞煲火鍋專門店
2. 九龍終於有喜茶 新出一袋兩杯MINI喜茶 尖沙咀分店即將開業
3. 蓮香茶室老伙記不捨靚茶點心 延續老味道

 

(左)Lavender Dream($52),(右)ULURU Rose Tea($52)

飲品同樣落足心思,用Mocktail手法炮製,Lavender Dream係荔枝配搭薰衣草,甜得嚟富薰衣草花香,的確有種好似夢境咁Sweet嘅感覺。而Rose Tea就係Breakfast Tea為基底,加入玫瑰同士多啤梨,玫瑰香氣同士多啤梨嘅甜味相得益彰。
 


兩杯都特別喺杯邊噴上食用色素,再分別以糖霜同玫瑰花點綴,見到會少女心大發啊。
 


(左)ULURU Rose Tea($52),(右)Rose Latte($52)

Rose Tea熱飲相比凍飲無咁甜,可以品嘗更多Breakfast Tea嘅紅茶香。而Latte嘅拉花非常可愛,略嫌玫瑰香氣不及Rose Tea濃郁。
 


最後大家估唔估到點解餐廳要改名為ULURU呢?其實就係澳洲好出名嘅紅色岩石烏魯魯!被視為世界嘅中心,餐廳負責人話希望餐廳都可以烏魯魯咁屹立於沙漠中,亦希望大家可以當呢間餐廳係朋友們約飯局嘅中心點。為咗保持新鮮感,餐廳會定期更換餐廳,好似Lunch Menu現時每兩個星期就換一次,約多幾次飯局都唔怕悶啦。
 






ULURU
地址:灣仔春園街1-11號春暉大廈1樓




文、相、片:Cathy

關鍵字
灣仔
Fusion菜
漢堡
甜品
花茶
ULURU
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】便利店尋寶 每周新品速報
2019-07-30
3大散水餅推介 Last day派得體面又夠抵
2019-07-25
日本過江龍迴轉壽司登陸佐敦 近百款選擇 新開業優惠$12極上拖羅壽司
4天前
7月份好評餐廳十強
2019-08-06
【2019中秋】最新人氣話題+送禮靚盒月餅集合
1天前