趕走鬱悶打打氣!5至6月下午茶推介
2019-05-20
一到五、六月,天氣又熱又濕。如果你做嘢冇心機,又成日覺得好攰嘅話⋯可能你患上咗「季節性懶惰症候群」!要及早求診,一個夠賞心悅目、夠特色嘅下午茶,畀自己relax吓,可能會令大家有返啲精神。下午茶放鬆一下呢嗰良方絕對係萬試萬靈!

  Mövenpick雪糕火鍋 香港逸東酒店普慶     
呢間下午茶係第一次同Mövenpick合作推出雪糕火鍋主題,有無限refill嘅黑白朱古力火鍋、加上20幾款配料選擇,生果、曲奇餅、蛋糕、蛋白脆餅、棉花糖等任你mix&mathch!完全唔使就住食~
雪糕有成10款口味揀,包括冧酒提子、意式芝士蛋糕、焦糖燉蛋等。而且仲有多款鹹點,點止得雪糕咁dry!仲有IG創意雪糕火鍋攝影比賽玩,真係準備又食又拎。

Mövenpick雪糕火鍋下午茶自助餐
價錢:$ 228 /位 (另收加一服務費)
供應日期:即日起至9月30日,逢週末及公眾假期(15:15-17:15)

越法風味之旅  帝苑酒店Le Soleil
主打越法菜嘅下午茶是咪唔多見呢?呢嗰好似迷你版嘅巴黎鐵塔架上放咗唔少清新嘅越南特色小食,最吸引嘅一定係乾冰上檯嘅波士頓龍蝦!另外今次餐廳仲同法國巴黎嘅醫學美容品牌英格蜜兒crossover,所以啲甜品都係以護膚品嘅材料、顏色做主題,啲蛋糕全部都好吸睛同colourful𠻹!依家嚟食嘅話仲有skincare禮品包,同免費療程體驗券送,先到先得啊~

越法風味下午茶
價錢:$ 438 /兩位 (另收加一服務費)
供應日期:即日起至6月30日(15:00-17:30)

 榴槤控必須出席 太子酒店add@Prince     
以榴槤為主題嘅下午茶,簡直就係榴槤Fans嘅天堂!到時成間餐廳都應該真係充斥住榴槤嘅飄香~而呢嗰下午茶就設計咗十幾款嘅榴槤蛋糕同甜品,而且全部都勁靚,嗰榴槤造型嘅忌廉蛋糕真心夠cute。既有住細膩嘅外表,濃濃嘅榴槤香更加係擋唔住。仲有一系列嘅榴槤燉蛋、榴槤撻、榴槤乜乜乜等,出面都未必可以一次過食到咁多!

榴槤週末下午茶
價錢:成人$ 268 /位,小童$ 168 /位 (另收加一服務費)
供應日期:即日起至6月30日,逢週末及公眾假期(15:15-17:00)

 Les Néréides首飾概念下午茶 香港嘉里酒店大堂茶座

呢嗰同著名法國首飾品牌Les Néréides合作嘅法式下午茶,應該係女仔見到都會心郁郁!因為呢嗰下午茶係以品牌嘅其中兩個首飾系列為主題而去創作餐點。以精緻嘅首飾為題,點會唔靚先?好似金箔可可豆咁,真係成粒耳環咁靚,真心邊捨得食㗎!Btw除咗喺度嘆完嗰下午茶之外,仲有限量版品牌手鍊同購物禮券送返㗎。不過數量有限,所以要快手先得啦~

大堂茶座法式華麗庭園下午茶
價錢:$ 638 /兩位(另收加一服務費)
供應日期:5月17日至8月18日,星期一至五(14:30-17:30),星期六、日及公眾假期(14:00-18:00)

 法式生活品味 港麗酒店樂聚廊
由法國Lillet利口酒做主題嘅下午茶,而Lillet嘅酒有獨特嘅柑橘果香,鍾意果香就啱晒~餐廳仲特別設計咗唔少法式小食畀你一路嘆酒一路食,有啲材料仲係真・法國嚟㗎!就好似入面件香烤法國鱈魚咁,就用咗法國南部盧瓦爾河嘅鱈魚伴上簡單嘅牛油醬汁,一啲都唔膩。講明法式生活就梗係有甜品啦,香橙蜂蜜芝士蛋糕就同Lillet利口酒味道最夾,一樣咁酸甜清新!

溫馨提示:下午茶包咗一杯Lillet Marie雞尾酒,而兩位嘅下午茶仲免費贈送法國歐萊雅柔潤啞緻唇膏,送完即止㗎。

French Chiu Summer下午茶
價錢:$318 /位,$ 538元 /兩位(另收加一服務費)
供應日期:即日起日至7月31日,5月31日除外,(15:00-17:30)

鑽石品牌典雅滋味 半島酒店大堂茶座
今次半島酒店同有「鑽石之王」之稱嘅珠寶品牌海瑞溫斯頓(Harry Winston)合作,以品牌旗下四個經典花卉系列嘅珠寶為靈感去設計menu。如果係品牌嘅Fans就要慢慢嘆(同埋欣賞)個tea了~因為唔止啲茶點設計造形靚,就連啲餐具都用咗海瑞溫斯頓特色圖案標誌,同埋經典嘅寶藍色色調做點綴~唔影返多幾張相都對唔住隻咁靚嘅碟啦!
呢幾款甜品嘅味道都唔會太甜,其中鮮芒果忌廉卷應該係最得人歡心,另外幾款朱古力亦各有花香,朱古力撻混入玫瑰茶、另一款則加入薰衣草!鹹點亦走清新健康路線,特別係香草青瓜蕃茄包,蕃茄味濃,用青瓜做餡仲夠晒健康。


而且惠顧下午茶嘅客人可以到半島購物商場海瑞溫斯頓專門店,以禮品券換領一對以「溫斯頓花園」為主題嘅茶匙𠻹~

Winston Garden at The Peninsula經典下午茶
價錢:$398 /位,$ 718元 /兩位(另收加一服務費)
供應日期:6月1日至7月31日,(14:00-18:00)

潮食科幻分子料理  DK Cuppa Tea     

透過「全息圖」嘅3D圖像投影技術,結合到精緻嘅下午茶上,真係邊食邊玩又邊睇,嗰感覺極度像真!除咗大玩投影之外,仲有高科技嘅嘢食,就好似用鮑魚分子料理製作嘅香草蕃茄凍湯,同埋加咗唔少潮流勁興嘅Superfood:藜麥、螺旋藻、凍乾生果之類,無論係對健康定貪靚都有用!

Btw呢嗰下午茶仲幫你靚埋個心,皆因下午茶收益嘅10%將會捐畀「尋覓燭光.燃點希望」呢個活動嘅相關受惠癌症機構㗎。

iJolly創新「全息圖」科幻下午茶
價錢:$298 /位(另收加一服務費)

文:Yanny

關鍵字
下午茶
酒店
Mövenpick
法國
榴槤
半島
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【隨時更新】便利店尋寶 每周新品速報
1天前
RubberBand成員開石燒牛扒專門店 8款靚牛+自家調製鮮甜燒汁 最平$80
2019-06-18
炎夏感bye-bye!6至7月下午茶推介
4天前
5月份好評餐廳十強
2019-06-14
經典扒房中環新址重開 即席分切招牌特級燒牛肉 銀色餐車再現
2019-06-04