越泰式異國料理餐廳
2019-11-07
最近天氣開始回暖,食得太多中西日韓菜,食到有啲膩?又無乜胃口?咁酸酸辣辣嘅開胃東南亞菜就啱晒您啦!今次就等小編同大家一齊尋找香港特色越泰料理!同大家一齊享受東南亞風情美食啦!

Pho Metro(銅鑼灣) 
銅鑼灣蘭芳道附近一向出名多食肆,最近又有間被網民譽為多倫多小鎮最佳嘅越南河粉-Pho Metro進駐,並以當地新鮮食材和色香味俱全嘅河粉吸引饕客。店面係美式風格,店舖裝修清新時尚,係銅鑼灣寧靜舒適嘅新派越式湯河小店!

龍蝦粉  
河粉上鋪著整隻新鮮波士頓龍蝦,仔細一看,蝦腳、蝦身已剝好殼,十分貼心!餐廳會係客人點餐後將蝦頭下鍋油炸逼出香氣,同龍蝦肉一起倒進熬8小時嘅牛大骨高湯,稍煮後盛碗上桌!龍蝦肉吸收晒牛肉湯嘅香甜,同時龍蝦保留本身嘅彈牙與清爽!

牛頸脊湯河  

牛湯顏色似剔透嘅琥珀,不見泛油,呷來醇厚不燥,嚥吞後嘴巴還縈繞着溫和嘅牛鮮及藥材香氣。牛湯烹調用上五、六十公斤嘅新鮮本地牛膝及牛筒骨(連骨髓),熬煮約8小時。牛肉選用牛頸脊部分;彈牙河粉配上多汁小核嘅越南青檸,仲有來自越南嘅九層塔、薄荷葉等,配埋食勁香!正統嘅越南口味!

順化牛肉粉
用濃郁嘅牛骨湯味道和牛骨湯一起燜燉,牛肉肉質鬆化,湯底酸甜帶點鮮辣,以及檸檬草嘅味道融合在一起,同越南生牛肉河粉相比,順化牛肉粉更濃味一些。彈牙嘅金邊粉配搭越南扎肉同微辣既牛,非常搭配!

蟹膏湯檬
蟹膏特製而成既湯,味道固然濃厚,鮮味,另外加入蕃茄,蕃茄正好為單調既蟹膏味加上點酸酸甜甜既味道,兩者非常合襯!配上由蟹膏,蟹肉同豬肉製成嘅肉丸蟹膏味突出而且好多汁,好夾!檬粉口感軟滑、仲吸收晒湯汁!加埋是拉差甜辣椒醬食,特別惹味!

越式燒牛肉三文治  
法式三文治烘烤得微暖,外層香脆,加入黑椒嘅燒牛肉餡很香很惹味,配上酸酸嘅紅白蘿蔔絲和青瓜,十分開胃!

Thai滿恩 (觀塘)       
位於觀塘碼頭熟食中心內一間不能錯過平嘅泰國菜! 菜式雖然較為大路,但勝在味道正宗,而且價錢實惠,主打讓食客以街坊價錢享受地道泰菜!

泰式船麵配雞排
湯底正宗又濃郁,十足小編係像泰國街頭食到嘅味道!湯底用上豬骨,豬血及多種泰國香料如指天椒、紅薑、香茅等熬製三小時以上而成。金邊粉吸收晒湯嘅味道,配上煎得香口,有肉汁嘅雞排,好正呀!

泰式海南雞飯
海南雞肉質香滑,鷄油飯味道正宗,香口得嚟帶有少少香茅味同薑味! 而且飯仲保持粒粒分明、富有口感! 配埋雞湯食,送飯一流!

辣椒香葉肉碎煎蛋飯
酸辣帶鹹香嘅正宗泰式風味!每一啖嘅肉碎都充滿住濃郁嘅金不換味道,又香又辣,伴飯一流!

青咖喱豬頸肉飯

青咖喱很香椰奶味,配上炸豬頸肉,非常惹味,好好送飯!

冬陰公豬排金邊粉
係夏天一道非常開胃嘅麵食! 湯底係超濃郁嘅冬蔭功,落咗檸檬葉、青檸、魚露骨熬煮,湯頭味道酸酸辣辣、香濃惹味,令人胃口大增! 


Milu Thai(銅鑼灣) 
餐廳非常着重食材新鮮度,仲特意請來全部泰藉班低廚師,務求為食客提供最正宗、最傳統嘅泰式味道。菜式均使用自製醬料烹調,誠意十足。而且食物份量十足,價錢合理,CP值超高! 環境方面,作為一間泰國菜餐廳,入邊竟然一尊佛像都無,店主反而運用咗塗鴉風格,以潑水節及當地街道特色為主題,型格得嚟又有休閒舒適嘅氣氛!係銅鑼灣嘅「泰」好味好去處!

咖哩三重奏
廚師將餐廳創新地將青咖哩、紅、黃咖哩混合於一到菜中!讓食客一次過有三種滋味!每款咖哩配搭唔同嘅海鮮同食材,搭配蒜蓉包粒蘸上咖哩食,令人食指大動呀!

乾冰生蝦刺身
餐廳每日都會搜購新鮮嘅越南蝦,食落新鮮又彈牙,肉質緊實富彈性,味道爽甜鮮美,再配上自家制生蒜、辣椒等調製而成嘅酸醬汁,酸酸辣辣又殺菌!配埋蒜片、辣椒同苦瓜片一齊食,口感十足!上碟時仲結合乾冰,好夢幻,好啱打卡呀!

爆炸炒蟹
大廚爆香金不換、甲猜、青胡椒、檸葉、泰國人蔘、甲拋、香茅等香料後加入每日新鮮搜購嘅時令大蟹,炒至香脆惹味!食客都會紛紛爭食鮮甜多汁嘅蟹肉!

泰式火焰燒雞  
上枱時店員會將酒同麥芽糖淋上雞上,再係客人面前點火,視覺效果勁吸引!打卡必備!燒雞用泰國香料醃足全日,夠哂入味!火焰將雞腿外皮燒到香脆可口,肉質卻結實嫩滑,配上自家製甜辣醬食,相當有驚喜!

青檸酸辣明爐烏頭
用上新鮮烏頭炮製,魚肉白滑鮮嫩,配搭香茅、 南薑、辣椒、芫荽及青檸等材料煮成酸辣魚湯, 湯底香濃惹味,底部仲有吸滿湯汁精華粉絲,令人食指大動!

VTaste (天后) 
VTaste位於銅鑼灣街市對面,主打越式料理,以鮮綠色為主調,裝修新穎refreshing,配以木製桌椅,比人一種簡潔有活力嘅感覺,難怪開業無耐就已經成為區內嘅熱門據點!

黃金軟殼蟹 
新鮮熱辣即叫即做,鹹蛋黃炒至起泡後加入炸到香脆嘅軟殼蟹,連殼都唔洗剝,一啖咬入口,蟹肉同外層軟殼在係嘴中交融,鹹蛋黃香十足,滋味濃厚!  

越式牛油雞翼  

牛油雞翼隻隻都脆卜卜,充滿蒜蓉牛油香,雖然邪惡,但總會令人忍不住一隻接一隻咁放入口,必食之選!  

湄南蝦鬆生菜包
用豬肉攪成肉碎,味道酸酸辣辣,加埋紅蘿蔔絲等,包著生菜食,口感清新爽口!

河內素扎肉冬菇撈檬
貌似午餐肉條嘅豆製嘅素扎肉同冬菇,加上入口順滑嘅檬粉,同大堆芽菜、青蔥、炸蒜片等,配埋碌冧(撈檬用的魚露酸甜汁),酸酸辣辣嘅醬料滲進麵條中非常惹味!

二人珍寶火車頭套餐 
套餐分量十足包括二人分珍寶火車頭湯粉同黃金脆魚皮拼盤!火車頭湯頭以慢火細熬七個鐘而成,牛味濃而顏色清澈,越南河粉帶米香,粉身薄且幼,吸晒湯底嘅精華,配料亦非常豐富,包括:安格斯牛肉,牛腩片,牛丸,牛展,蘿白,份量十足!另外可隨喜好加入新鮮金不換、辣椒、青檸、芽菜,增加味道層次!

Pak Soi Asian Kitchen (西環) 
係西營盤充滿車房嘅小巷中竟然有一間隱世小餐館(「Pak Soi」係泰文中意指小巷當中嘅餐館),裝修以木系風格為主,設有上下兩層室內室外餐桌,係Krua Walaiphan 嘅姊妹店,餐廳全由泰藉大廚主理,擅長融合泰國、越南、印尼等菜式,供應不含味精、防腐劑嘅餐點,亦提供多款素食者適用餐點,仲可以根據客人口味同要求調整飾品,非常貼心!食客可以係到安心地品嚐亞洲美食!

味噌芝麻醬豆腐沙律 (Tofu Salad with Miso Sesame Dressing) 
香滑嘅豆腐,甜甜嘅南瓜、營養高嘅番薯、嫩滑嘅BB菠菜配上日式味增芝麻醬,健康嚟來又好味,有「營」必選!

青芒果沙律 (Mango Salad)
酸酸甜甜嘅泰國青芒果,加上自製嘅炸香蔥、大蒜、花生,甜魚乾,配埋自家製甜魚露,入口爽脆,非常開胃!

印尼炒飯(Nasi Goreng) 
加入甜醬油、羅望子、蝦米、等炒製而成嘅炒飯,入口有微微羅望子嘅酸味,淡淡蝦米鹹香,好有印尼風味!配埋雞肉沙嗲、黃瓜、印尼蝦餅同煎雞蛋,成個套餐咁,超豐富!

泰式炒金邊粉 (Pad Thai)
煙韌嘅正宗泰國金邊粉,加入蝦、蝦米、豆芽、豆腐、泰國雞蛋、花生同秘製醬汁炒香,集酸甜鹹於一身,非常惹味!

泰式烤雞 (Gai Yang)
雞髀肉用自家製羅望子醬腌製後烤熟,皮脆肉嫩,雞肉保留到肉汁,同喺泰國街頭食到嘅味道,非常相似,風味十足!

心動不如行動!有興趣就快啲約埋三五知己去嘆下越泰式美食啦!快啲bookmark定啦!

*以上圖片只供參考,所有食品以實物為準. 食品供應因餐廳而異

相、文:Tiffany
關鍵字
東南亞
龍蝦
越菜
泰菜
銅鑼灣
觀塘
船麵
熟食中心
正宗
海南雞
雞湯
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
情人節去K11 MUSEA 一文睇晒浪漫餐廳
2020-02-06
【隨時更新】零食速報 每周新款零食、酒品點評
4天前
美國人氣肉桂卷抵港!煙韌原味/朱古力/焦糖胡桃卷(有片)
2020-02-06
全城抗炎 與醫護同行!提供醫護餐飲免費優惠餐廳一覽
2020-01-31
有平有貴 情人節餐各級價格攻略
2020-02-04