超抵食$340十道菜鐵板燒套餐!灣仔新開親民日式鐵板燒專門店(有片)
2020-09-15

呢間本店位於觀塘嘅日式席前鐵板燒人氣爆燈,晚晚都坐無虛席,餐廳主打平民價日式鐵板燒,而且仲去埋灣仔開分店呀!灣仔新店地方更寬敞,座落於高樓大廈30樓,落地玻璃令景觀更開揚,更可一覽維多利亞港全景。菜單選擇方面豐儉由人,最平午市$340已經食到十道菜嘅套餐,以食物質素同個景嚟講真係超值。溫馨一提所有特選及海鮮套餐只於星期一至日 12:00 - 15:00供應。


美國牛肉特選鐵板套餐($340)

灣仔店獨有嘅優惠套餐!有齊10道菜,包括沙律、前菜、大蝦、牛肉、帶子/銀鱈魚/法國鵝肝 (三選一) 、季節野菜、炒飯、漬物、麵豉湯、雪糕或咖啡。而價錢係根據牛肉級數而定,由$340-$560不等。

最抵食嘅美國牛肉薄燒已經唔錯,將薄切牛肉放喺230度嘅鐵板上輕輕一燒捲起就食得,熟成程度啱啱好,入口軟腍,牛味亦突出,包住葱粒同乾蒜,香口之餘減低油膩感。大蝦亦新鮮彈牙。

套餐亦有海鮮食,可以喺帶子、銀鱈魚及法國鵝肝中三選一,銀鱈魚充滿魚油,一入口感受到香濃魚油香,魚肉亦夠滑身。鵝肝油脂同樣豐富,入口即溶,鵝肝亦大塊厚身。底下墊上麵包吸油減低膩感。


炒飯加入洋蔥、蔥粒、牛肉粒及蛋等材料炒香,乾身而且粒粒分明。


A5和牛特選鐵板套餐 ($560)

如果想食再靚啲嘅肉,推介厚切A5和牛,牛肉入口即溶亦充滿油脂香。套餐一樣有齊10道菜㗎!


海鮮套餐($340)

唔係太好肉類嘅朋友,海鮮套餐一樣$340就食到,包括主菜南非鮑魚、白鱈 魚、大蝦、前菜、沙律、季節野菜、炒飯、漬物、麵豉湯、雪糕或咖啡。南非鮑魚大隻兼新鮮,入口鮮甜彈牙!


晚市餐廳亦有供應幾款二人餐,共有 12 道菜,有齊刺身、肉類同海鮮,食材會更豐富。如果想用一個平民價錢去體驗一次日式席前鐵板燒,呢間餐廳係一個唔錯嘅選擇!


板神鉄板燒日本料理

地址: 灣仔軒尼詩道256號The Hennessy30樓






文: Yanica

相、片: Tom Li



關鍵字
日本菜
鐵板燒
灣仔
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】零食速報 每周新款零食、酒品點評
5天前
【2021生日優惠】持續更新!6月壽星送海鮮拼盤
2021-06-01
《優秀開飯熱店大賞2021》賽果公佈
2021-05-24
5月份好評餐廳十強
2021-06-04
一秒變出 招牌十八層海膽杯 佐敦小店全新體驗 魔術X鐵板燒
2021-06-11