裝修後重開!鐵板燒牛扒燉湯泡芙 新自助餐大玩7大「即煮」元素
2017-10-08

Café East最近裝修完重開,座位闊落咗之外,食物亦增添「即煮」元素,由廚師們即席煮出熱騰騰嘅食物畀食客,夠新鮮!當然唔少得港人最愛嘅海鮮刺身甜品啦,究竟有乜食?味道係點?睇下開飯仔試食報告!

入到餐廳,第一時間梗係走到海鮮區,望下有乜冰凍海鮮食先啦!

採訪當晚,有6款冰凍海鮮:龍蝦、麵包蟹、翡翠螺、蟹腳、青口及大蝦,而且refill速度快,係一大回本位。

麵包蟹、龍蝦都有膏,而且好鮮甜。

至於刺身,每晚固定供應5款:北寄貝、八爪魚、甜蝦、吞拿魚及三文魚。逢星期五、六、日仲會有大大粒珍寶帶子添!

壽司就有三文魚、吞拿魚兩款。

7大即煮廚房:

#1 鐵板燒

鐵板燒廚房會由廚師即席煮出牛扒、大蝦、三文魚扒及鵝肝,配以簡單調味就已經好正。

#2 即切牛扒

雖然鐵板燒都有牛扒,不過呢款既厚身又充滿肉感嘅牛扒,依然令人流晒口水。牛扒款式不時轉換,採訪當晚就係澳洲肉眼扒,肉質嫩,有咬口而不致於過韌,正!

另設3款配菜:洋蔥薯仔、西蘭花及番茄肉碎長通粉。

#3 滋味燉湯、即煮麵品

有燉湯、有即煮麵食聽落未必好特別,但café East勝在材料高檔。好似燉湯咁,開飯仔當晚飲到蟲草花淮山燉雞湯,湯頭好清,又夠火侯,係心機之作。而煮麵檔一定要試下足料雲吞,係熟客必食之選。

#4 火鍋

自助餐有得打邊爐?你無睇錯,為咗滿足火鍋迷,café East特設火鍋湯底及少許火鍋料,畀火鍋迷過下口癮!湯底分藥膳、麻辣兩款,味道好濃郁;配料有冬菇、豆腐、娃娃菜、牛丸及墨魚丸。

#5 印度飛餅

由印度籍廚師主理嘅廚房,主打睇頭十足嘅印度飛餅,將一嚿麵糰變成一塊薄薄嘅薄餅,可跟心水配料豐富口感架。

除咗飛餅,仲有3-4款印度美食,好似薯仔牛腩。

#6 甜品

開飯仔最愛食甜品啦!單計擺放出嚟嘅甜品都有8-9款,有栗子撻、番石榴玫瑰朱古力、栗子慕絲撻、熱情果車厘子慕絲、拿破崙千層酥、香橙cupcake等等。

此外,餐廳仲特別設置3個時段,每個時段都推出不同甜品,啱晒甜品控。

咁都未算,仲有即焗泡芙,廚師從焗爐拎出新鮮泡芙,加入haagen-dazs雪糕,再灑上綠茶粉而成,外脆內軟。

至於Haagen-Dazs雪糕有6-8款,有冧酒提子、芒果、牛奶拖肥、紅桑子雪葩等。

其他食物:

熱盤有分中式、西式,並分開擺放。呢4款西式熱盤,有鴨胸、炸魚柳等,旁邊仲有一籃子天婦羅添!

而中式熱盤會有蒸魚、炸蝦、炒飯等等,逢星期五、六、日會有鮑魚扣鵝掌添架!

常見嘅火腿、芝士等冷盤都有供應。

新裝修嘅餐廳,座位寬敞不少,而且吸收到室外光線,感覺好舒適。

自助午餐
供應時間:12nn-2:30pm
價錢:(星期一至五)成人$288/位、6-12歲小童$148/位;(星期六、日及公眾假期)成人$358/位、6-12歲小童$198/位

自助晚餐
供應時間:6:30pm-9:30pm
價錢:(星期一至五)成人$538/位、6-12歲小童$268/位;(星期六、日及公眾假期)成人$598/位、6-12歲小童$318/位

Café East
地址:尖沙咀麼地道72號千禧新世界香港酒店1樓


文:Joy

關鍵字
自助餐
酒店自助餐
buffet
尖東
尖沙咀
飲食潮流
開飯仔為大家發掘香港這個美食之都的最新美食資訊,分享飲食潮流文化。
餐廳資料
本月熱門
【隨時更新】零食速報 每周新款零食、酒品點評
2天前
日本吉列牛排店京都勝牛進駐銅鑼灣 黃金六十秒炸法 推介京都勝牛三味套餐
2021-02-18
楚撚記新line!荃灣新開餃子店 必試黑松露什菌餃+香煎潮汕韭菜粿
2021-02-10
食肉獸必收藏!牛年到 五間品牛餐廳介紹返
2021-02-11
1月份好評餐廳十強
2021-02-09