行完山醫肚!7大香港郊遊熱點美食
2016-10-18

踏入秋天,香港嘅氣溫終於無咁熱,最啱約埋三五知己,或者同屋企人一齊去郊外或者離島嚟個一日遊。雖然行山或者郊遊路線未必夠大家熟悉,但講到嘢食,開飯仔都可以推介一下嘅。以下喺其中七個郊遊熱點附近餐廳,睇下會唔會幫到你手?

馬鞍山  Cafe 1950歐陸餐廳


圖:小Y.咖喱妹

要睇芒草唔係得大東山嘅,如果選擇去昂平,行返出嚟經過耀安邨嘅話,可以去呢間西餐廳。畢竟大家可能都有聽聞馬鞍山被唔少網民稱為美食沙漠,呢間有生蠔食嘅平民西餐廳更顯得少有。除咗生蠔,皮脆肉嫩嘅德國式咸豬手都係必食推介,石鍋飯同燒豬仔骨都試得過。

彩虹  新龍城茶樓


圖:Sunny1948Cur

如果連新界都覺得遠,想一邊郊遊一邊睇芒草仲有飛鵝山呢個選擇。而無論行之前想嚟個一盅兩件,定行完夜晚嚟食小菜,呢間舊式茶樓就非常靠得住。早市要自己出點心車揀點心,無嘅話亦可以請侍應幫你落單。想飽肚嘅話記得嗌蒸大包,個皮夠鬆軟入面又多餡。晚市嘅小菜就勝在真材實料鑊氣十足,最多人推介佢地嘅籠仔荷葉蒸蝦,鮮甜香口。

元朗  Tasts Kitchen


圖:糖小妹

無論一年四季,元朗南生圍都係香港人其中一個郊遊兼影相嘅好地方。行完影完搭返小巴出返元朗站附近嘅話,就有呢間質素唔錯嘅扒房西餐廳,方便各位繼續大影特影。招牌菜烤美國黑毛豬肉味濃郁,烤特級安格斯肉眼香口富肉汁,就連配菜都絕不馬虎。全因主理餐廳嘅大廚曾經擔任酒店級行政總廚,不過佢亦為咗保持食物質素所以只開晚市,留意返。

西貢  金雞去骨海南雞專門店


圖:yuyuchu

由萬宜水庫出返市區其實有唔少選擇,無論係海鮮定西餐都有唔少選擇,不過玩到攰想有碗飯落肚嘅話,就可以嚟呢度食返碟去骨海南雞飯喇。雞肉幫你起埋骨,食落淡淡肉之餘雞肉仲好滑,稍嫌雞味唔係好濃郁,所以食得辣嘅可以試下麻辣雞飯。而油飯就夠哂味。識食就會食埋佢地嘅香煎手剁咸魚肉餅,香脆肉餅加埋咸魚香,食完立刻叉好電。

赤柱  Cafe Grouchos


圖:gigitangfoodlife

行山入門級別當中,衛奕信徑1段係其中一條熱門路徑,由陽明山莊行去赤柱後當然要坐低食嘢醫肚。浪漫嘅餐廳或者平時同另一半都試唔少,不如換個口味,嚟呢間Cafe食個漢堡!露天茶座仲見到海景,涼風送爽。菠蘿牛肉漢堡配搭得宜,清新菠蘿減低厚身Juicy漢堡扒嘅油膩感但一樣滿足。黑松露蘑菇忌廉意粉醬汁夠香濃,其他小食亦有板有眼,值得一試。

大澳  橫水渡小廚


圖:olfooddiary

時間充足嚟離島一日遊嘅唔少人都會入大澳,入大澳除咗食掃街小食之外,想一班人坐低食餐飯嘅話就可以嚟呢度。四大招牌菜當中以炭燒燒鵝同蝦乾荷葉籠仔飯最有特色,燒鵝雖然未必拍得上名店,不過炭燒燒鵝已經買少見少,入嚟試一兩次亦無妨吖。蝦乾荷葉籠仔飯有齊大澳特產魚仔乾、蝦乾、魷魚仔同鹹鮮魚肉,再加埋蝦醬真係香到一個點。

坪洲  勝興冰室


圖:bageladdiction

除咗大澳,坪洲亦係近年離島一日遊嘅熱點。早入去嘅話一定要嚟呢間冰室,唔好畀佢個名同門口呃咗,其實佢係間仲有點心車嘅茶樓!裡面仲有唔少而家比較難搵嘅懷舊點心,包括酥皮蛋黃蓮蓉包、蝦丸燒賣同鵪鶉蛋燒賣等,當中五香荔芋燒腩卷就最多食家推薦,腩肉入味帶脂香,同粉糯嘅芋頭一拍即合,最抵讃係比例啱啱好,小小邪惡但大大嘅滿足。

最後開飯仔都戴定頭盔溫馨提示一下,想食「好西」記得留意餐廳營業時間,有需要可以先訂定菜。另外去郊遊無論大人細路,都記得要愛護大自然,自己垃圾自己帶走,同埋唔好破壞環境呀!



開飯編輯推介:

1. 【專訪】西營盤平價點心飯店 67歲老闆堅持日做12小時

2. 9月份好評餐廳十強

3. Wine & Dine 2016 重點推介率先睇


熱門文章推介:

1. 牛頭角特色食店攻略

2. 邂逅蟹王 10月就是要任食大閘蟹 5個大閘蟹搵食點

3. 【開飯知識】食糖水要識揀 一碗糖分隨時超標!




隨時接收最新資訊
讚好OpenRice專頁!
關鍵字
郊遊
離島
芒草
元朗
西貢
大澳
開飯專題
開飯仔為你提供各類型最新飲食情報及優惠,全面照顧你的飲食喜好。
相關文章
【生日飯局】同好朋友慶生食咩好? 窩心西餐篇
2017-01-04
【生日飯局】同好朋友慶生食咩好? 特色日式篇
2017-02-15
【小不啦嘰1大口】聞名不如見面的世外桃源【華嫂冰室】
2017-04-28
元朗「泰」滋味 5間特色泰國菜館
2017-04-13
夠麻甩夠地道 元朗4間香口車仔麵店
2017-02-22
【無綠不歡Green Monday】大力素食
2017-03-20
餐廳資料
更多
收起
本月熱門
【隨時更新】便利店尋寶 每周新品速報
3天前
尖沙咀新商場開幕 過江龍餐廳一覽
2019-10-11
【特約分享】食魚生轉運 三種好意頭日本海產介紹
7天前
亞洲首間 Tiffany Blue Box Café 打卡必到!三層架下午茶 + 棉花糖雞尾酒
2019-10-08
日本人氣茶室登陸尖沙咀 招牌Tea Set、甜品推介(有片)
2019-09-25