元朗「泰」滋味 5間特色泰國菜館
2017-04-13

講起食泰國菜,多數人都會諗起九龍城,但對於大西北嘅牛嚟講,九龍城似乎的確遠咗啲啲。近排開飯仔就發現,原來元朗都有唔少有特色嘅泰國菜館,今次就為大家逐一介紹吓啦。


年輕老闆活力泰菜 芭堤雅泰國餐館 

呢間泰國菜館嘅老闆年輕有活力,經常都會喺舖面向客人介紹當日精選菜色,又主動了解客人嘅需要,非常親切,開飯仔表示未開始食已經加晒分。雖然餐廳面積唔大,但裝修時尚,以簡約風格為主,座位舒適。鮮蝦金柚沙律令人驚喜,酸甜嘅柚子肉配上幾隻鮮蝦,再加入腰果,份量頗多,整體帶點鹹香嘅味道有別於其他地方。雞牛豬串燒本來已經燒得惹味,再配上一碟含有花生碎嘅秘製沙爹醬,大大碟可以盡情搽晒成串串燒,唔洗好似平時咁就住就住,食到令人充滿罪惡感。


呃Like潛力泰菜 薄荷葉泰國菜

                圖:Wildchildcarol胃食小王子

呢間泰國菜喺區內有一定嘅人氣,每個週末都座無虛席,主要因為呢到唔少菜色嘅賣相都幾有呃like潛力,而食物質素整體嚟講尚算穩定。特式菠蘿飯用木桶裝住,賣相靚之餘又做到保溫效果,可惜味道較淡。招牌菜廚師特式醬炒飯霸氣嘅賣相非常吸睛,帶點蝦醬香嘅炒飯用網狀蛋絲包住,旁邊有炸魔鬼魚乾,另有一隻蝦插喺炒飯上方,炒飯同香料攪拌之後帶點辛香,整體味道不俗。


人氣實力泰菜 亞萊嘜嘜

圖:lsying

「亞萊嘜嘜」其實就係泰文好味道嘅發音,絕對唔係虛有其名嫁,見呢到晚晚都有一大堆食客等位就知道呢到嘅實力啦。近乎每枱必叫嘅特色蒜香包,係將厚多士炸成金黃磚塊,咬落去非常脆身,而且帶有蒜香,實在會令人忍唔住一舊接一舊咁食。生蝦刺身個樣擺得靚靚,蝦肉上放上紅椒同蒜蓉,再配合上旁邊嘅苦瓜同甜酸醬,食落去簡直就係百般滋味在心頭,一試難忘。


份量十足泰菜 小茄子

圖:幸樂兒為食肥師奶

自問係大胃王,或者想食完飽到捧住個肚走嘅人,小茄子啱晒你喇,因為呢到嘅食物全部都係大大份。小食拼盤有齊炸蝦餅、魚餅、春卷同香葉雞,當中炸蝦餅比較出色,外脆而裡面彈牙。溫馨提示返大家,大拼盤嘅份量的確幾多,大家可以因應食量叫返細拼盤。咖哩軟殻蟹同樣都係份量充足,黃咖哩汁香濃,軟殻蟹炸得香脆,兩者配合得唔錯。


B仔涼粉隔離抵食泰菜 泰星海南雞飯

圖:Lemon_lamlam

就算唔係住新界嘅朋友,應該都聽過出名嘅B仔涼粉,原來喺B仔涼粉隔離就有一間相當抵食嘅泰國菜。招牌菜海南雞飯相當唔錯,雞肉嫩滑有鮮味,配合上少少辣嘅雞醬同甘香嘅黃油飯,只係收五十幾蚊,抵到爛。唔少食客推介呢到嘅古法鹽燒烏頭,魚肉燒得唔算太乾,配上泰式香料,魚肉無小骨,食起上嚟都幾方便。順帶一提,呢到仲有得買外賣串燒,食完甜品再買串燒做宵夜就最好不過啦。


文:Dap

關鍵字
泰國菜
元朗
九龍城
串燒
生蝦刺身
厚多士
炸蝦餅
海南雞飯
開飯專題
開飯仔為你提供各類型最新飲食情報及優惠,全面照顧你的飲食喜好。
相關文章
【新店直擊】青洲灶記咖啡氹仔新登場!
2016-08-09
今期熱話!平民正宗海南雞飯推介
2017-05-09
【編輯推介】一次過滿足你的星馬泰願望
2017-03-09
泰國名氣宮廷菜抵港 超軟滑三重芝士榴槤撻
2017-03-29
【生日飯局】同好朋友慶生食咩好? 窩心西餐篇
2017-01-04
夠麻甩夠地道 元朗4間香口車仔麵店
2017-02-22
餐廳資料
更多
收起
本月熱門
【隨時更新】便利店尋寶 每周新品速報
2天前
【2019聖誕】早鳥優惠! 聖誕自助餐推介
4天前
【2019聖誕】年尾叉電 聖誕下午茶集合推介
2019-11-19
秋風起!5間大閘蟹放題食店集合
2019-11-19
【2019聖誕】約會之選 聖誕市集推介
7天前