蔡瀾開越南粉專門店 即製河粉配澳洲名店秘方
2018-07-03


相信香港冇人唔識美食家蔡瀾,成日四出試菜嘅蔡San,曾推出零食、拌麵等食品,今次以個人名義開設餐廳蔡瀾越南粉,竟然係越南粉專門店!越南牛河Pho係蔡San最愛嘅美食之一,年輕時曾食到一碗完美的牛肉粉,描寫生牛肉河為「灼得剛剛夠熟的生牛肉,色澤如少女唇部之粉紅。河粉純白米製造,像她們身上的旗袍,如絲如雪。再將這一口湯喝進口,像一場美妙的愛情。」


今次開店並唔係突然決定,蔡San話:「已經構思咗25年,一直都有開餐廳念頭,但我有好多唔同興趣,開餐廳太癡身,直到遇上呢位於大陸開過兩百間餐廳的partner,先放心經營。」選址中環,舖頭以原木色為主,年輕新潮,由日本空間設計師Jo Nagasaka主理。先有如麵吧的格局,入面再有用餐區,面積相當大兼有兩層,門口為開放式廚房,見到廚師煮粉,未食已經聞到陣陣牛湯香!


舖頭最特別係設有石磨及製粉機,即場製作河粉!蔡San話:「做河粉技術未必贏到其他人,唯有以新鮮度取勝!有咩新鮮得過在自己店用機器即製即食?」每日新鮮選用越南大米磨成米漿,再以特別訂造的河粉機,製成厚約1mm河粉,大約抖氣一至兩個鐘即可使用。河粉軟滑富米香,而且唔會索湯發脹,亦唔會一夾即散。仲係可以無限任添!


湯底製法秘方就沿自澳洲墨爾本老字號名店勇記,由越南移民開設,唔少當地人及遊客幫襯。蔡San話試過全世界多間牛河,經過無數次比較,最後覺得這家牛河係自己心目中最好,更大讚為「天下第一牛肉河」。蔡San不時拜訪,25年間多次讚美,得到勇記的信任,極力誠邀下才肯傳授秘方。之後更作出無數次微調測試,先得出「黃金比例」,還原記憶中最極致完美嘅味道。


特別牛肉湯河粉即火車頭,有齊生牛肉、金錢腱、牛腩、牛筋、貝殼牛肉丸、銅錢牛鞭花及牛柏葉,都係跟足當地做法。湯頭用50公斤牛骨、牛肉及香料熬成,湯底非常清澈,蔡San教路先飲一啖清湯,味道帶甜,牛味濃香但唔霸道,而且一啲都唔油膩!之後再加入九層塔、鵝芥、短芽菜、青檸,將香草捏碎放入湯中,香氣更突出,即多了層次感。

特別牛肉湯河粉 $128


生牛肉湯河選用澳洲牛肉,加入滾熱湯底淥熟,牛肉軟腍,可蘸點是拉差辣醬或海鮮醬同吃。如想試多點配料,亦可以叫一碗越南牛肉粉在配料中任選兩份,只需$68,更可免費續加越南粉,大胃王啱晒!

生牛肉湯河粉 $88


湯檬反而有點新嘗試,紅油酸辣湯檬加入大量辣椒及紅油,帶點麻辣香氣,有點似川式酸辣粉,而越式酸辣湯檬辣度較輕盈,唔想飲湯亦有一款香茅烤豬頸肉春卷撈檬。呢度檬粉較似米粉及米線,質感較彈牙,唔似一般透明的檬粉易碎。

紅油酸辣湯檬、越式酸辣湯檬 各$68


小食有多款選擇,越式炸春卷食落香脆,香茅烤豬頸肉juicy唔乾身,黃金蝦扒、香芒凌波魚米紙卷亦係傳統小食變奏,幾特色。越式法包用本地製造麵包,size偏向迷你,鬆脆唔硬,餡料以豬肉及牛肉為主,唔同平時食開夾札肉嘅法包。

越式炸春卷 、香芒凌波魚米紙卷 各$48

黃金蝦扒 $78、越式蒸粉卷 $48

越南法棍三文治 $28、泰國金柚沙律 $38


飲品可試越南滴漏咖啡,味道冇當地咁濃郁甘苦,但亦唔會過甜。仲有越南多色冰、話梅青檸梳打等。免費嘅水加入蝶豆花同檸檬,味道微酸。只賣$19嘅青檸香茅凍,香茅味清新帶微酸,好開胃。


傳媒採訪當日以及開幕典禮蔡San亦親自落場監督,相當緊張出品,又同記者分享食法以及理念,開幕當日更有唔少好友包括倪匡到場支持。蔡瀾牛肉粉已經正式開業,去朝聖嘅人龍長到呢...蔡San預告深圳店將於三星期後開業,而開店大計唔止係越南粉,仲會有廣東點心呀!好期待!


蔡瀾越南粉

地址:中環威靈頓街15-25號UG樓


文、相、片:Perrins

關鍵字
牛肉粉
牛河
pho
越南菜
蔡瀾
中環
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
$298兩小時任食生蠔!尖沙咀靚景餐廳期間限定(有片)
2018-06-20
蔡瀾開越南粉專門店 即製河粉配澳洲名店秘方
2018-07-03
日本連鎖平民燒肉店殺入尖咀! $200有找食澳洲和牛
2018-07-06
6月份好評餐廳十強
2018-07-09
7月自助餐精選 異國菜·海鮮主題任揀
2018-07-05