自己燒日本A4黑毛和牛扒!尖沙咀新抵食自助扒房(有片)
2019-03-05

厚福街呢條食街最近有新力軍加入,主打美國安格斯、日本A4黑毛和牛嘅唔同部位,按重量收費。師傅幫大家燒至約一成熟之後,大家就用熱辣辣嘅火山石燒至理想熟度,加上多款自家製調味料,好玩又好味!
 



野郎Stone位於尖沙咀厚福街,餐廳宗旨係希望大家可以用親民價錢享用高質牛肉。大部分牛肉都供應200g、300g,同400g,大部分人食300g應該都夠。而且可以加$30轉套餐,主食、味噌湯同沙律都係無限添加,保證大胃王都一定飽。
 


牛肋間隔膜($138/300g)

用火山石板吱吱聲咁上枱,加埋離遠就聞到嘅肉香已經足夠令人流口水!牛肋間隔膜即係牛嘅橫隔膜部位,特質係脂肪較少,但不減其肉香,燒至全熟都唔會變韌。
 


所以第一次嚟食就可以點呢個,就算未識控制熟度都唔怕浪費咗塊肉扒吖嘛。師傅先以鐵板燒至一成熟,開飯仔之後再燒到大概半熟,牛肉鮮味突出有咬口。
 


牛舌芯($118/約200g)

點單紙上面無嘅Secret Menu,一方面因為數量有限,另一方面因為餐廳切走外面嘅筋只取最中心位置,大概1公斤嘅牛舌先切剩呢一份約200g嘅牛舌,得來不易呀。牛舌入口嫩滑得嚟咬落又夠爽口,同樣就算燒到全熟都唔會過韌。
 

更多【新店直擊】:
1. 私家魚缸飼養海鮮、生蠔 北角新開高質素意式蠔酒吧
2. 必試酥脆片皮鴨、全蟹蒸肉餅 尖沙咀新開名廚主理中菜館
3. 親民價歎正宗泰國菜!mango tree新線登陸元朗

 


A4和牛肩胛肉眼($478/300g)

餐廳現時每日供應唔同部位嘅A4和牛,因為油花多,所以唔同其他牛扒,A4和牛要師傅席前用火槍立刻燒香,逼出油香同時亦更有效鎖住肉汁!睇到油花分佈平均就知道食落有和牛嘅入口即溶感,口感軟嫩,滿嘴牛脂香。因為火燒前無落任何調味,記得加少少喜瑪拉雅山岩鹽同黑椒,先帶得出肉味呀。
 


(醬料碟左至右)自家製辣味噌、自家製白松露蒜蓉醬、柚子味酸汁

除左岩鹽同黑椒,呢度仲有其他調味料比大家自由配搭。開飯仔就推介佢地嘅辣味噌,鹹香同辣味平衡,刺激得嚟唔會蓋過肉味。而白松露蒜蓉醬就略嫌白松露香味唔夠突出,不過鍾意重口味嘅話可以加少少蒜蓉同牛扒一齊放喺火山石上燒,牛味加上蒜蓉香無得輸!而柚子味酸汁就酸香清新,可以配油花比較多嘅牛肉解下膩。
 


牛扒可以加$30升級做套餐,主食(薯蓉、意粉、飯三揀一),味噌湯,沙律呢三項無限添加,再加一罐汽水。雖然係任食但水準無馬虎,薯蓉灑上香草再用火槍燒過,帶淡淡香草味;味噌湯加入牛骨熬煮,裡面仲有本地蜆肉;沙律以爽脆椰菜絲為主,再加上薯片碎同帶辣味嘅醬汁增加口感同味道層次。
 


門口有部自助點餐機,可以用支付寶畀錢買食卷,好有日本餐廳Feel!未有支付寶嘅話,餐廳亦收取現金,自助點餐機稍後亦會增設八達通付款功能,進一步方便大家吖嘛。
 





野郎Stone
地址:尖沙咀厚福街7A號地下E號舖




文、相、片:Cathy

關鍵字
尖沙咀
厚福街
牛扒
牛舌芯
黑毛和牛
野郎Stone
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】最後倒數!即將結業的老字號及人氣小店
2020-04-01
【隨時更新】零食速報 每周新款零食、酒品點評
5天前
全城抗炎! 5間酒店自助餐轉型 任點任食海鮮/主食/甜品 變陣保衛生
2020-03-17
【特約分享】超抵外賣陪你抗疫 即睇將軍澳飲食地圖!
2020-03-10
【隨時更新】全城抗炎!多間集團餐廳及老字號宣佈 暫停晚巿或休業 (內附名單)
5天前