聖誕啤酒巡禮 酒迷必試手工啤配威士忌 (有片)
2017-12-19


酒呢家嘢,同朱古力一樣,開唔開心都會飲。特別係嚟緊聖誕節呢啲普天同慶嘅日子,就更加要開心chill chill佢啦~

手工啤x威士忌   掌門精釀啤酒

(上至下)55%小麥配The Singleton12年、聖誕燈配The Singleton18年、Double IPA配The Singleton18年

呢排好興將啲手工啤浸過橡木桶,等佢哋有陣醇香味。而尖沙咀呢間手工啤酒舖就直情搵埋蘇格蘭單麥威士忌品牌做聯乘,實行一啖whiskey一啖啤酒。今次嘅pairing有三pair六款酒。三pair有淡有濃,其中一對係聖誕燈配The Singleton 18年Cask Strength。呢隻whiskey冇加水,亦都唔經冷凝處理,本身一飲就飲到最原始嘅味道。而同聖誕燈pair up之後,就更加可以提升佢嘅果香同乾果嘅香甜味,同時聖誕燈嘅提子乾、焦糖同麥芽味亦更突出;另一對係Double IPA配The Singleton 18年,因為Double IPA本身嘅酒花回甘度高,一來一回,反而將whiskey嘅辛辣度降低咗,易入口咗。

(左起)聖誕燈、親密愛人、梅下梅下

另外,餐廳都推出咗幾款聖誕酒,親密愛人(Rye Porter)加入咗大量裸麥釀製,酒體較厚,麥芽味中帶有朱古力同咖啡香;而梅下梅下(Belgian Blonde Ale),就加入咗比利時嘅candi sugar釀製,飲落酸酸地甜甜地咁。

仲仲仲有隻,係暖酒嚟㗎,基底係麥芽味突出嘅Professor X,另外再加入龍眼、玉桂、蜜糖同玫瑰等材料去釀製,令到原本較甘嘅Professor X變得甜甜地,柔和咗,仲要暖笠笠,啱晒咁凍嘅天氣飲。

手工啤酒倒數日曆  HK Brewcraft

仲有廿日就聖誕節!開心嘅時刻係需要一早就開始倒數嘅~~ 有酒舖推出咗全港首個本地手工啤酒聖誕倒數月曆呀!一盒有24支唔同本地酒廠釀製、唔同類型嘅手工啤,酒鬼聽到表示興奮,一於啤到24號!遲咗幾日先買?唔緊要啦,一日兩支追返囉科科。

邊度有得買:
網上訂購(包送貨)、或於酒舖現購

聖誕本地黑啤  少爺啤酒

鍾意黑啤嘅朋友,少爺特地提煉咗呢隻Celebration Ale呀,porter嚟,結合肉桂、雲呢嗱豆、豆蔻等冬日嘅香料釀成,朱古力同咖啡焦香味濃,之前淨係得on tap先飲到,而家出埋樽裝,喺葵芳新都會嘅聖誕巿集都買到!仲有罐裝添~~ 呢個就去返黃竹坑廠度搵喇。

地址:黃竹坑路53號英基工業中心 G/F

罐裝手工啤  Heroes

想飲罐裝手工啤嘅,仲可以揀Heroes,聖誕限定禮物盒,一盒6罐,可以自選口味,IPA、洛神花味小麥啤、啡走黑啤等等,鍾意邊隻就揀邊隻,夠晒free。個罐仲換咗聖誕裝,都幾有氣氛,鍾意儲罐嘅朋友仔又多個收藏。

邊度買:糖廠街市集(12月10、17日) 、自由約 (12月10日)、愉景灣巿集(12月10日)





文:Kar
相:Kar、餐廳提供/官方Facebook


關鍵字
聖誕節
啤酒
手工啤酒
尖沙咀
威士忌
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
本月熱門
【隨時更新】零食速報 每周新款零食、酒品點評
4天前
日本吉列牛排店京都勝牛進駐銅鑼灣 黃金六十秒炸法 推介京都勝牛三味套餐
2021-02-18
楚撚記新line!荃灣新開餃子店 必試黑松露什菌餃+香煎潮汕韭菜粿
2021-02-10
食肉獸必收藏!牛年到 五間品牛餐廳介紹返
2021-02-11
1月份好評餐廳十強
2021-02-09