穿梭巿區 尋訪日本的味道
2020-12-07

相信好多朋友仔同開飯仔一樣,已經好耐都冇去過日本喇,然後每日都好掛住日本嘅美食,嗚……好彩香港都有好多日本料理,由日本入貨,將食材運送過嚟。今次同大家介紹兩間位於巿區嘅日本菜,交通便利,掛住日本嘅話,隨時都可以去止一止個癮先。

浪人日本料理(灣仔) 

位於灣仔嘅呢間日本料理,地方寬敞,價位喺同區嚟講算係幾抵食,而且做任食而冇設用餐時限,大家可以慢慢食唔使急住chur晒啲嘢落肚,係幾吸引嘅。補充少少,呢度嘅任食係類似semi-buffet嘅形式,首先需要點選一款主菜,然後先可以享受喺紙仔度任剔任食多款日式美食,例如壽司、炸物、天婦羅、燒物、甜品等等。適逢餐廳開業六周年,由即日起至年底前,凡惠顧晚巿套餐(即半自助任食)全單都可以有85折。

炭燒日本水飼育豬鞍配柚子汁

晚巿套餐有牛、羊、豬、雞嘅選擇,其中呢道炭燒豬鞍都幾有特色。隻豬係喺日本由專人以穀物、粟米、日本米混合當地礦泉水打成嘅流質飼料飼養,飲嘅水都係礦泉水嚟,肉質較平時嘅豬鬆軟腍身,冇咗陣豬羶味,仲好juicy添。由於用濃汁烹調嘅話,就會蓋過咗原有嘅肉香,所以師傅特意選用酸咪咪嘅柚子汁去提味呢。

 


浪人特上刺身

晚巿套餐除咗有肉類選擇之外,仲可以揀要刺身。而浪人特上刺身,就總共有八款,包括三文魚、油甘魚、帶子、劍魚腩、八爪魚、北寄貝、牡丹蝦同海膽。大部分都係由日本運送到香港,即使係任食但質素依然新鮮,牡丹蝦鮮甜爽口。

 


壽司

任食落單紙上,有大約十款壽司選擇,生嘅熟嘅都有啲。除咗有大部分港人最鍾意嘅三文魚同鰻魚壽司之外,亦有蟹籽手卷同芥末八爪魚手卷等。每晚都有師傅駐場手握,保證新鮮。

 


吉列‧揚物

炸物嘅選擇則包括吉列廣島蠔、唐揚雞軟骨、唐揚魷魚圈、日式炸餃子、芝麻雞翼、芝士忌廉蝦同蟹肉忌廉餅。全部都炸到金黃色,香脆可口。其中,芝麻雞翼係最受客人歡迎嘅,幾乎枱枱都會點。雞翼先沾上芝麻漿,再落鍋炸,皮脆肉嫩。

 


燒物

燒物係任食中不能缺少嘅一環,餐廳採用易於保持恆溫、火力平均嘅日本燒爐製作燒物,藉以增加效率,以應付排山倒海嘅落單。雞翼控食完炸雞翼都會想食埋燒雞翼嘅,混入椒鹽同蒜粉調味,陣陣鹹香。一夜干(日本池魚)亦相當惹味。另外,燒海蝦、燒菠蘿、燒茄子等同樣都係留肚之選。

 


蔵鳶居酒屋(尖沙咀)  

漫行加拿芬道,會發現到有條樓梯通往地庫,通往兩間日本料理餐廳。一間係以Omakase為主嘅,另一間就係嚟緊同大家介紹嘅居酒屋。有吧枱,有卡座,幾有氣氛,仲要有個大魚缸,內有多款即日運到嘅新鮮海產。餐牌選擇多元化,由刺身、壽司、串燒、濱燒到丼飯都有供應。

KURA壽司

呢個壽司相當豐盛,以烏魚子盒做器皿,舖滿晒海膽、三文魚子同吞拿魚腩,面頭再放上蔥花同烏魚子,賣相吸睛。選用北海道七星米,粒粒米粒又大又剔透。建議輕輕一匙嗶晒所有食材落紫菜度享用,口感豐富。

 


魚子醬海膽炸蝦卷

除咗傳統壽司同卷物,呢度亦有多款創作卷物,嘗試唔同嘅組合配搭,帶出更多層次嘅可能性。就好似呢個魚子醬海膽炸蝦卷咁,魚子醬鮮香、海膽甘甜,然後炸蝦香脆,一啖就食到幾種味道同口感先後爆發,有夠開心。

 


二人時令濱燒盛

海鮮控唔使諗,點選二人時令濱燒盛無誤。一次過就可以食到多款時令海鮮,包括:虎蝦、鮑魚、生蠔、貴妃蚌、蛤、元貝同馬刀貝,而且仲會有店員幫手燒,控制好火喉同時間,咁就唔使怕自己唔識燒而浪費咗啲海鮮啦。其中日本蠔肉肥美爽口,海水味重;鮑魚亦夠彈牙。加上三款官配醬汁:七味麵豉、柚子胡椒同師傅自家調製嘅濱燒汁,更能提鮮。

 


鱈場蟹北海道牛乳鍋

聽聞今年冬天凍嘅時間會長咗,咁食返個熱辣辣嘅湯鍋暖身就最啱啦。呢個北海道牛乳鍋,以北海道360牛乳混和師傅自家秘調嘅湯底熬製而成,奶香低調平衡,絕對唔會搶咗鱈場蟹嘅風頭。鱈場蟹肉質飽滿,鮮甜多汁。至於牛乳鍋內則以蔬菜類為主要配料,索晒湯底嘅精華,甜甜der。

 


蝦丼定食

刺身丼飯一向都好受港人歡迎,成碗舖滿晒五花八門嘅刺身,又的確好吸引嘅。而呢度更有一個坊間好少見到嘅組合——由牡丹蝦刺身、牡丹蝦蓉同甜蝦蓉組成嘅蝦丼定食。名副其實嘅蝦,全部都係蝦!啖啖都係鮮甜嘅蝦肉,蝦迷梗要試。

心動不如行動!有興趣就快啲約埋三五知己去嘆下美食!快啲bookmark定啦!

*以上圖片只供參考,所有食品以實物為準. 食品供應因餐廳而異


關鍵字
大廚招牌菜
灣仔
尖沙咀
日本菜
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
本月熱門
【隨時更新】零食速報 每周新款零食、酒品點評
2天前
悠長假期 復活節下午茶推介
2021-03-26
【2021生日優惠】超爽著數!免費任飲任食日式燒肉/火鍋(持續更新)
2天前
【只想專注做好牛腩】金融經紀轉行灣仔開濃湯牛腩麵店 招牌牛骨濃湯崩沙腩河
2021-04-01
【最平$298最貴$938】佐敦新開日式和牛燒肉放題 獨家引入鹿兒島小田和牛
4天前